ລາຍການບຸນເດືອນເກົ້າ ບຸນເຂົ້າປະດັບດິນ ບຸນຊ່ວງເຮືອ ທີ່ນະຄອນຫລວງພຣະບາງ ປະຈຳປີ 2019 ແມ່ນມີລາຍລະອຽດອອກມາແລ້ວດັ່ງນີ້ :
1. ວັນສຸກ ວັນທີ 23/08/2019 ແຮມ 8 ຄ່ຳ ເດືອນ 9 ປິ 2562 ແມ່ນມີການຊ່ວງເຮືອທີ່ ບ້ານຫາດຮ່ຽນ.
2. ວັນອັງຄານ ວັນທີ 27/08/2019 ແຮມ 12 ຄ່ຳ ເດືອນ 9 ປີ 2562 ແມ່ນການຊ່ວງເຮືອທີ່ ບ້ານສັງຄະໂລກ.
3. ວັນພຸດ ວັນທີ 28/08/2019 ແຮມ 13 ຄ່ຳ ເດືອນ 9 ປີ 2562 ເລິ່ມເວລາ 07:00-12:00 ໂມງ ແມ່ນມີພິທີໂລະລາດ (#ຕະລາດນັດມວນຊົນ) ທີ່ຖະຫນົນກາງເມືອງຫລວງພຣະບາງ.
4. ວັນພະຫັດ ວັນທີ 29/08/2019 ແຮມ 14 ຄ່ຳ ເດືອນ 9 ປີ 2562 ເປັນມື້ບຸນເຂົ້າປະດັບດິນແລະບຸນຊ່ວງເຮືອງ ຫລວງພຣະບາງ ທີບຶງນ້ຳຄານ ( ນ້ຳຄານ )
– ຕອນເຊົ້າໆ ເວລາ 05:30 ໂມງ ຈະມີພິທີໃສ່ບາດ ໃສ່ເຂົ້າຫໍ່ໂປ້ ເຂົ້າຕົ້ມເຂົ້າໜົມອາຫານຄາວ,ຫວານຕ່າງໆ ໃຫ້ພຣະພິກຂຸສົງ
– ເວລາ 08:00 – 08:30 ໂມງ ການນຳພັກ-ລັດ ແຂກຕ່າງດ້າວ ທ້າວຕ່າງແດນ ແມ່ນມວນຊົນເລິ່ມທະຍອນເຕົ້າໂຮມກັນຢູ່ສອງຝາກນ້ຳຄານ ເພື່ອເບິ່ງ ເພື່ອຊົມ ເພື່ອເຊີຍ ເພື່ອຮຽນຮູ້ປະເພນີວັດທະນະທຳອັນດີງາມຂອງບຸນຊ່ວງເຮືອທີຍິ່ງໃຫຍ່ທີສຸດໃນປະເທດລາວ ກໍ່ວ່າໄດ້ເພາະມີເຮືອປະເພນີທີເຂົ້າຮ່ວມຊ່ວງຫລາຍທີສຸດ ມາຈາກຫລາຍພາກສ່ວນ ມາຈາກຫລາຍແຂວງ ເປັນບຸນຊ່ວງເຮືອທີມ່ວນ ທີມັນ ທີກິນໃຈຫລາຍທີສຸດໃນປະເທດລາວໃນປັດຈຸບັນນີ້.
– ເວລາ 09:00 ໂມງເປັນຕົ້ນໄປເລິ່ມໄຂພິທີບຸນຊ່ວງເຮືອຢ່າງເປັນທາງການ ໂດຍເລີ່ມຈາກເຮືອນາງດຳ-ນາງດ່ອນ (ຈາກບ້ານຊຽງແມນ ຫລື ວັດຊຽງຍືນ ) ຊ່ວງລົງມາເປັນຄູ່ເປີດຫນ້ານ້ຳ ຈາກນັ້ນກໍ່ແມ່ນເຮືອຊ່ວງຈາກວັດ ຈາກບ້ານ ຈາກພາກສ່ວນຕ່າງໆ ໂດຍມີນາງເຮືອ ( ສາວງາມປະຈຳເຮືອ ) ຖືຂັນດອກໄມ້ທູບທຽນ ນັ່ງສະຫງ່າເປັນລາຣີ ໃຫ້ທຸກຄົນໄດ້ເຫັນໄດ້ຊົມ ເພື່ອໄປບູຊາ ເຈົ້າອາຣັກ-ຮັກສາບ່ອນຕ່າງໆ ຂອງເຂດບ້ານນັ້ນໆ ຈາກນັ້ນກໍ່ເລິ່ມມີການຊ່ວງກັນ ຈົນຮອດແລງແລະປະກາດຜົນແລະມອບລາງວັນໃຫ້ເຮືອຊ່ວງແຕ່ລະລຳ.
*ບຸນຊ່ວງເຮືອໃກ້ຈະມາຮອດນີ້ ຂໍຝາກເຖິງຄະນະກຳມະການຜູ້ຈັດບຸນດັ່ງກ່າວ ດັ່ງນີ້ :
1. ຄວນໃຫ້ມີແຕ່ເຮືອປະເພນີ ເທົ່ານັ້ນທີເຂົ້າຮ່ວມຊ່ວງ ຫລືຖ້າຫ້າມບໍ່ໄດ້ ກໍ່ຄວນມີມາດຕະການ ມາດຕະຖານຂອງເຮືອຊ່ວງວ່າ ຕ້ອງມີຫົວແຫງ່ມ ມີຫມາກເບັງ ມີຍອຍເຮືອຊ່ວງ ມີລາຍລາວ ມີສີແບບເປັນເອກະລັກ ( ບໍ່ໃຫ້ເອົາກາສັນຍາລັກການຄ້າມາເປັນລາຍ) ແລະທີສຳຄັນ ຕ້ອງມີການຫຍົ້ມແທ້ໆໆໆ ບໍ່ແມ່ນນອນໄສເອົາເນີ ມີການນັ່ງຄັດທ້າຍເຮືອ ( ຕາມເຫັນປະຈຸບັນແມ່ນບໍ່ມີແລ້ວ ) ແລະທັ່ງທ້າຍເຮືອ …
2. ແລວນ້ຳ ຖ້າເຮືອໃດຈັບສະຫລາກຢູ່ຝັ່ງຟາກພັນຫລວງຈະໄດ້ປຽບ ດັ່ງນັ້ນ ຄວນມີການຕໍ່ໃຫ້ເຮືອທີ່ຢູ່ຝັ່ງກົງກັນຂ້າມ ເພື່ອບໍ່ໃຫ້ເສຍປຽບ ຖ້າບໍ່ດັ່ງນັ້ນ ພ່ວງ ຫລື ຫໍຼ ໃນເຂດນ້ຳຄົດ ແຖວປາກຫ້ວຍ ກໍ່ບໍ່ຕ້ອງໃສ່ ເພາະເຮືອລຳທີ່ຢູ່ຝັ່ງທາງພູສີຈະບໍ່ຕ້ອງໂຄ້ງຫລາຍ .
3. ໄມ້ພາຍເຮືອ ດີແທ້ ກໍ່ຄວນໃຫ້ເປັນແບບເກົ່າ ແບບໄມ້ພາຍໃບດອກຈຳປາ ( ຄິດວ່າເລື້ອງໄມ້ພາຍຄົງຫ້າມບໍ່ໄດ້) ຖ້າໄດ້ຈະເປັນການດີທີ່ຈະເປັນການອະນຸລັກແບບຮູບດັ່ງເດີມໄວ້.
4.ການຮ້ອງເວລາພາຍເຮືອຂອງສີພາຍເຮືອຊ່ວງເມືອງຫລວງແຕ່ບູຮານ ເພິ່ນຈະຮ້ອງວ່າ ເອີກ…ຮົວໆໆໆໆ.. ແຕ່ປະຈຸບັນນີ້ ແມ່ນສີພາຍຮ້ອງເປັນເລກ ຄື 1.2.3.4.5…. ສຽງແບບເກົ່າກໍ່ມີໄດ້ຍິນໃນປະຈຸບັນແລ້ວ ຫລືໃຫ້ໃຊ້ຫມາກຫວິດ ກໍ່ໄດ້.
5.ຄວນຈະມີລາງວັນໃຫ້ແກ່ເຮືອຊ່ວງທີ່ຮັກສາຮູບຊົງແບບແຜນ ຂອງເມືອງຫລວງພຣະບາງ ໃຫ້ຫລາຍຂຶ້ນທັງຈຳນວນແລະລາງວັນ ເພື່ອທີ່ຈະເປັນແຮງຈູງໃຈໃຫ້ເຮືອແບບນີ້ເກີດຂຶ້ນມາອີກ ເພາະການເອົາເຮືອລົງຊ່ວງດ້ວຍຄວາມໄວຄົງບໍ່ຫວັງໄດ້ທີ່ດີໆ ແຕ່ເອົາເຮືອລົງເພື່ອຈະຮັກສາມູນມໍລະດົກຂອງຊາດທີ່ມີເອກະລັກແບບນີ້ໄວ້ ຄິດວ່າ ລາງວັນນີ້ຈະເໝາະສົມທີ່ຈະສົ່ງເສີມອີກທາງຫນຶ່ງໃນການກໍ່ເກີດໃຫ້ມີເຮືອແບບເກົ່ານີ້ໄວ້ໄດ້ເຊິ່ງເປັນແນວທາງອີກທາງຫນຶ່ງເນາະ?.
6. ສີພາຍເຮືອຊ່ວງ ຄວນກຳນົດໃຫ້ເປັນສີພາຍທ້ອງຖິ່ນເປັນສ່ວນໃຫຍ່ ຖ້າມີສີພາຍນອກຄວນຈະໃຫ້ເຮືອແຕ່ ລະລຳບໍ່ເກີນ 10 ຄົນ ແບບນີ້ເປັນຕົ້ນ ເພາະຈະເປັນການສົ່ງເສີມໃຫ້ສີພາຍທ້ອງຖິ່ນໄດ້ຮຽນຮູ້ປະສົບການໃຫມ່ໆ ແລະການເອົາສີພາຍທ້ອງຖິ່ນເປັນສ່ວນໃຫຍ່ກໍ່ເພື່ອປົກປັກຮັກສາມໍລະດົກເຮືອຊ່ວງແບບນີ້ໄວ້ໃຫ້ມີມົນຂັງແລະເປັນຈຸດທີ່ດຶງດູດຄົນໃຫ້ມາເບິ່ງດ້ວຍໃຈມັກແທ້ໆ ບໍ່ແມ່ນມາດ້ວຍການພະນັນ.
7.ເຮືອການເຮັດເຮືອຊ່ວງຂຶ້ນມາໃຫ້ໃນປະຈຸບັນນີ້ຄົງຫາເລື່ອງໄມ້ເປັນລຳມາເຮັດຄົງຈະບໍ່ໄດ້ແລ້ວ ແຕ່ທາງຫຼວງພຣະບາງຕ້ອງມີການກຳນົດ ຖ້າຈະເຮັດຄວນຈະໃຫ້ເປັນຮູບຊົງແບບເກົ່າ ທີ່ສາມາດຫຍົ້ມຫົວ ຄັດທ້າຍ ທັ່ງທ້າຍ ມີແຫງ່ມ ມີຫມາກເບັງ ມີຍອຍເຮືອຊ່ວງ ມີດອກດວງແບບຫລວງພຣະບາງ ຈະໄດ້ຫລືບໍ່ ? ຖ້າບໍ່ມີຂໍ້ກຳນົດ ເຮືອຊ່ວງແບບຫລວງພຣະບາງກໍ່ຈະຕາຍໄປຕາມການເວລາເລີຍ.
ຖ້າໃຜມີຄຳຕິຊົມທີ່ດີ ເພື່ອທີ່ຈະອະນຸລັກຮັກສາ ບຸນຊ່ວງແບບສະບັບຫລວງພຣະບາງໂດຍແທ້ ກໍ່ຂໍໃຫ້ມີຄຳຄິດເຫັນໄດ້ ເພື່ອວ່າ ຄະນະກຳມະການ ຈະໄດ້ເຫັນ ແລະນຳໄປແກ້ໄຂ ດັດແປງ ເພື່ອໃຫ້ບຸນຊ່ວງນີ້ຍັງມີມົນຂັງ ຢູ່ກັບລຳນ້ຳຄານຕະຫລອດໄປ .
ເພາະວ່າບຸນຊ່ວງເຮືອໃນປະເທດລາວເຮົາປະຈຸບັນນີ້ ທີມີເຮືອແບບເກົ່າ ຮີດເກົ່າຄອງເດີມນັ້ນ ຕາມທີ່ຂ້າພະເຈົ້າເຫັນແມ່ນມີແຕ່ແຂວງຫລວງພຣະບາງ ແຕ່ກໍ່ຍັງມີເຮືອສູດເລິ່ມມາ ບຽດຍຶດ ເຮືອປະເພນີຫລາຍແລ້ວ ແຂວງທີ່ສອງກໍ່ຄືເຮືອຊ່ວງຂອງເມືອງໄຊຍະບູລີ ລ່ອງນ້ຳຮຸ່ງ ທີ່ເປັນຫົວຫົງ ແລະແຂວງທີ່ສາມ ກໍ່ຄືແຂວງວຽງຈັນ ເຮືອປະເພນີໃນລ່ອງນ້ຳງື່ມ
ສ່ວນນະຄອນຫລວງວຽງຈັນກໍ່ມີເຮືອຊ່ວງອີ່ຫົງແກ້ວປ່າ … ສ່ວນເຂດແຕ່ບໍລິຄຳໄຊລົງໄປ ປະຈຸບັນນີ້ເປັນເຮືອສູດ ແບບໃຫມ່ໄປຫມົດແລ້ວ ປະເທດທີ່ຄວນເອົາເປັນແບບຢ່າງເລື່ອງຂອງເຮືອຊ່ວງກໍ່ຄືປະເທດກຳປູເຈຍ ທີ່ຍັງຄົງຮັກສາແບບແຜນປະເພນີອັນງົດງາມແບບສະບັບຂອງກຳປູເຈຍໂດຍແທ້ ເມື່ອຮອດບຸນຊ່ວງເຮືອຄືເດືອນ 12 ເພັງ ກໍ່ຈະມີເຮືອຊ່ວງເຂົ້າຮ່ວມ 300-400 ລຳ ເປັນຫນ້າປະທັບໃຈຫລາຍ ກົງກັນຂ້າມກັບປະເທດລາວເຮົາທີ່ ປະຈຸບັນນີ້ຫນ້າເປັນຫ່ວງທີ່ສຸດ ເພາະມີເຮືອສູດແລະທີ່ສຳຄັນ ມີຜູ້ອຸປະຖຳທີ່ມີເງິນມາສະໜັບສະໜູນສ້າງເຮືອສູດ ເພື່ອຫວັງແຕ່ໄຊຊະນະຢ່າງດຽວ ໂດຍເລີຍຕົວຕົນຂອງຮາກຖານວັດທະນະທັມເຮືອຊ່ວງຕົນເອງຈົນຫມົດສິ້ນດັ່ງມີຕົວຢ່າງໃຫ້ເຫັນຢູ່ຫລວງພຣະບາງເຮົານີ້ ອັນດັບເຮືອຊ່ວງທີ່ 1- 5 ແມ່ນແຕ່ເຮືອຊ່ວງເຄິ່ງສູດທັງນັ້ນ .
ແຫຼ່ງຂໍ້ມູນ: ພາບແລະຂ່າວຈາກ
#ຂ່າວສານຫຼວງພະບາງ