ເອື້ອຍນ້ອງແມ່ຍິງ 03 ບ້ານຂອງເມືອງອຸທຸມພອນໄດ້ຮັບນາມມະຍົດ ເປັນຄອບຄົວ ແລະ ບ້ານແມ່ຍິງ 03 ດີ ທີ່ຕິດພັນກັບການສ້າງບ້ານພັດທະນາຕາມທິດ 03 ສ້າງຄື:
ບ້ານໜອງບົວທອງ,ໂພນເດື່ອ ແລະ ບ້ານໂນນປ່າໄລ່.
ທ່ານ ນາງ ບຸນທະວີ ສີຊານົນ ປະທານສະຫະພັນແມ່ຍິງເມືອງກ່າວລາຍງານວ່າ:
ຜ່ານການປະເມີນຜົນການສ້າງຄອບຄົວແມ່ຍິງ 03 ດີ ຕິດພັນກັບການສ້າງບ້ານພັດທະນາ ຕາມທິດສາມສ້າງຂອງທັງສາມບ້ານຄື:
ບ້ານໜອງບົວທອງ, ຄອບຄົວແມ່ຍິງ 03 ດີ ປະກອບມີ 201 ຄອບຄົວ ຂອງຈຳນວນຄອບຄົວທັງໝົດພາຍໃນບ້ານ 206 ຄອບຄົວ, ໂພນເດື່ອ ຄອບຄົວແມ່ຍິງ 03 ດີ ມີ 420 ຄົບຄົວ, ຂອງຈຳນວນຄອບຄົວທັງໝົດ 437 ຄອບຄົວ ແລະ ບ້ານໂນນປ່າໄລ່ ມີຄອບຄົວແມ່ຍິງ 03 ດີ 188 ຄອບຄົວ, ຂອງຈຳນວນຄອບຄົວທັງໝົດ 229 ຄອບຄົວ, ເຊິ່ງການສ້າງຄອບຄົວ ແລະ ບ້ານແມ່ຍິງ 3 ດີ ຕິດພັນກັບການສ້າງບ້ານພັດທະນາ ຕາມທິດສາມສ້າງ ມີຄວາມຈຳເປັນ ແລະ ສຳຄັນຫຼາຍໃນແຕ່ລະຂົງເຂດ ເພາະມັນເປັນພື້ນຖານຕົ້ນຕໍໃນການສ້າງບ້ານ ແລະ ກຸ່ມບ້ານພັດທະນາ.
ເພື່ອເຮັດໃຫ້ວຽກງານນີ້ ບັນລຸຕາມເປົ້າໝາຍໂດຍໄວ ຈິ່ງຈຳເປັນຫັນເອົາວຽກງານພັດທະນາແມ່ຍິງໄປສູ່ຮາກ ຖານຊຸມຊົນໃຫ້ທົ່ວເຖິງດ້ວຍການສ້າງຄອບຄົວ ແລະ ບ້ານແມ່ຍິງ 3 ດີ, ຕິດພັນກັບການສ້າງບ້ານພັດທະນາ ຕາມທິດສາມສ້າງ,ຕິດພັນກັບການແກ້ໄຂຄວາມທຸກຍາກ ໃຫ້ໄດ້ຕາມ 4 ເນື້ອໃນ 4 ຄາດໝາຍ ແລະ ຖືເອົາການສ້າງບ້ານແມ່ຍິງ 3 ດີ ຕິດພັນກັບການພັດທະນາແມ່ຍິງໃຫ້ດີຂື້ນ,ເຊິ່ງໄດ້ຈັດຕັ້ງປະຕິບັດໄປຕາມ 5 ບາດກ້າວ ແລະ ເພື່ອເປັນການຢັ້ງຢືນເຖິງຜົນງານທີ່ເອື້ອຍນ້ອງແມ່ຍິງແຕ່ລະບ້ານຍາດມາໄດ້,ໃນພິທີຍັງໄດ້ມອບໃບຢັ້ງຢືນໃຫ້ແຕ່ລະຄົນ,ໂດຍແມ່ນທ່ານ ນາງ ບຸນທະວີ ສີຊານົນ ປະທານສະຫະພັນແມ່ຍິງເມືອງອຸທຸມພອນ ມອບໃຫ້ຢ່າງສົມກຽດ.
ເຊິ່ງພິທີແມ່ນໄດ້ຈັດຂື້ນທີ່ສະໂມສອນຂອງເມືອງ,ໂດຍການເປັນປະທານຂອງທ່ານ ນາງ ສີສະຫວັດ ໂຄດທະວົງສາ ປະທານສະຫະພັນແມ່ຍິງແຂວງ, ທ່ານ ສົມສັກ ສີຊານົນ ເຈົ້າເມືອງອຸທຸມພອນ.
ແຫຼ່ງຂໍ້ມູນ: Midia Laos
