ກະຊວງແຮງງານ ແລະ ສະຫວັດດີການສັງຄົມ ໄດ້ຮັບການອະນຸມັດຈາກລັດຖະບານລາວ ແລະ ລັດຖະບານຍີ່ປຸ່ນໃນການຈັດຕັ້ງປະຕິບັດໂຄງການຄັງແຮເຂົ້າຊ່ວຍເຫຼືອຜູ້ປະສົບໄພພິບັດ ປີ 2018 ໃນຂອບເຂດທົ່ວປະເທດ ພາຍໃຕ້ກອງທຶນເພື່ອນຮ່ວມງານ KR1 .
ນຳໂດຍທ່ານ ຄຳແພງ ໄຊສົມແພງ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ເພື່ອມອບໃຫ້ປະຊາຊົນຜູ້ປະສົບໄພພິບັດ ແຂວງຫົວພັນ ຊຽງຂວາງ ແລະ ໄຊສົມບູນ ລວມມູນຄ່າ 2 ຕື້ກວ່າກີບ ຕາງໜ້າຮັບໂດຍທ່ານເຈົ້າແຂວງ ແລະ ຮອງເຈົ້າແຂວງ 3 ແຂວງ ແລະ ຄະນະພະແນກແຮງງານ ຮສສ ແຂວງ.
ສຳລັບເຄື່ອງຊ່ວຍເຫຼືອທີ່ນຳໄປມອບໃຫ້ປະຊາຊົນແຂວງຫົວພັນ ປະກອບມີ ເງິນກອງທຶນ ນ້ຳມັນ 50 ລ້ານກີບ ເຂົ້າສານໜຽວຈາກກອງທຶນເພື່ອນຮ່ວມງານ KR1 ຈຳນວນ 97.860 ກິໂລ ມູນຄ່າ 787 ລ້ານກີບ ເຄື່ອງນຸ່ງຫົ່ມ ແລະ ເກີບ ຈາກ ສ ເກົາຫຼີ 100 ແກັດ ມູນຄ່າ 150 ລ້ານກີບ ລວມມູນຄ່າການຊ່ວຍເຫຼືອທັງໝົດ 987 ລ້ານກີບ.
ແຂວງຊຽງຂວາງໄດ້ຮັບເງິນກອງທຶນນ້ຳມັນ 50 ລ້ານກີບ ເຂົ້າສານໜຽວ 85.512 ກິໂລ ມູນຄ່າ 688 ລ້ານກີບ ເຄື່ອງອຸປະໂພກ-ບໍລິໂພກ ເຄື່ອງໃຊ້ຄົວເຮືອນ ມູນຄ່າ 72 ລ້ານກີບ ເຄື່ອງນຸ່ງຫົ່ມ ແລະ ເກີບ 100 ແກັດ ມູນຄ່າ 150 ລ້ານກີບ ລວມມູນຄ່າ 960 ລ້ານກີບ.
ສ່ວນແຂວງໄຊສົມບູນ ໄດ້ຮັບເຂົ້າສານໜຽວ 10.572 ກິໂລ ມູນຄ່າ 85 ລ້ານກີບ ເຄື່ອງນຸ່ງຫົ່ມ ແລະ ເກີບ 100 ແກັດ ມູນຄ່າ 150 ລ້ານກີບ ລວມມູນຄ່າ 235 ລ້ານກີບ ສຳລັບເຄື່ອງຊ່ວຍເຫຼືອດັ່ງກ່າວອຳນາດການປົກຄອງແຂວງ ກໍຄື ພາກສ່ວນກ່ຽວຂ້ອງຈະນຳເອົາໄປມອບໃຫ້ປະຊາຊົນຜູ້ທີ່ປະສົບໄພພິບັດຢ່າງທົ່ວເຖິງ ເພື່ອເປັນການບັນເທົາທຸກ.
ແຫຼ່ງຂໍ້ມູນ: ໜັງສືພິມວຽງຈັນໃໝ່