ເຈົ້າເມືອງລົງນຳພາປະຊາຊົນ ທຳລາຍແຫຼ່ງເພາະພັນຂອງຍຸງ ເພື່ອຕ້ານ ແລະສະກັດກັ້ນການລະບາດຂອງພະຍາດ
ທ່ານ ປອ ແສງທອງ ວັງແກ້ວມະນີ ກຳມະການພັກແຂວງ ເລຂາພັກເມືອງ ເຈົ້າເມືອງອາດສະພອນ ພ້ອມດ້ວຍຄະນະ, ມີທ່ານ ພັທ ຟ້າຮ່ວນ ພິລາວັນ ຄະນະປະຈຳພັກເມືອງ ຫົວໜ້າກອງບັນຊາການທະຫານເມືອງ, ທ່ານ ດຣ ທອງບາ ແກ້ວບຸນຈັນ ຮອງຫົວໜ້າຫ້ອງການ ສາທາລະນະສຸກເມືອງ, ໄດ້ລົງໂຄສະນາ ແລະຊຸກຢູ້ພໍ່ແມ່ປະຊາຊົນບ້ານໂພນງາມ ເມືອງອາດສະພອນ ແຂວງສະຫວັນນະເຂດ.
ທຳລາຍແຫຼ່ງເພາະພັນຂອງຍຸງລາຍ, ໂດຍເມືອງອາດສະພອນຂອງພວກເຮົາແມ່ນເປັນເມືອງໜຶ່ງທີ່ມີການລະບາດຂອງພະຍາດໄຂ້ຍຸງລາຍຫຼາຍເປັນອັ່ນດັບໜຶ່ງຂອງແຂວງສະຫວັນນະເຂດ, ເລີ່ມແຕ່ຕົ້ນປີມາຮອດປະຈຸບັນມີຜູ້ຕິດເຊື້ອໄຂ້ຍຸງລາຍທັງໝົດ 573 ກໍລະນີ, ເສຍຊີວິດແລ້ວ 7 ກໍລະນີ.
ເຊິ່ງບ້ານທີ່ມີການລະບາດຂອງພະຍາດໄຂ້ຍຸງລາຍຫຼາຍກວ່າໝູ່ແມ່ນ:
ບ້ານ ໂພໄຊ, ບ້ານໂພນງາມ, ບ້ານກຸດຊຸງ, ບ້ານສອງຫ້ອງ, ບ້ານນາໝາກເກືອ, ບ້ານຊຽງອ້ວນ, ບ້ານໄຊໂພນສິມ, ບ້ານກະທິງໃຫຍ່, ບ້ານຜັກຂະຫຍ່າ, ບ້ານດົງໄຫວດິນ, ບ້ານຈອມຮາດ, ບ້ານກຸດຫີນ, ບ້ານນາມົນ, ບ້ານນາເຂົ້າໝີ້ນ, ບ້ານຕົ້ນໂພສີ, ບ້ານດອກກອງ ແລະບ້ານທາດດອກແກ້ວ;
ດັ່ງນັ້ນເຈົ້າເມືອງອາດສະພອນຈຶ່ງໄດ້ໃຫ້ທຸກພາກສ່ວນ, ທຸກຂະແໜງການພາຍໃນເມືອງ ຊ່ວຍກັນຕ້ານ ແລະສະກັດກັ້ນການລະບາດຂອງພະຍາດໄຂ້ຍຸງລາຍ ໂດຍໃຫ້ລົງປຸກລະດົມ ໂຄສະນາ ແລະຊຸກຢູ້ໃຫ້ພໍ່ແມ່ປະຊາຊົນ ທຳລາຍແຫຼ່ງເພາະພັນຂອງຍຸງລາຍ ໂດຍສົມທົບກັບອຳນາດການປົກຄອງບ້ານ, ມີການເຕົ້າໂຮມປະຊາຊົນ ເພື່ອໂຄສະນາໃຫ້ເຂົາເຈົ້າ ປະຕິບັດຫຼັກການ 5 ປ ຄື:
1. ປິດຝາພາຊະນະທີ່ເກັບນ້ຳໃນເຮືອນ ແລະ ນອກເຮືອນ ເພື່ອບໍ່ໃຫ້ຍຸງມາໄຂ່ໃສ່,
2. ປ່ຽນນ້ຳໃນພາຊະນະ ເຊັ່ນ: ເຕົ້າດອກໄມ້ ນ້ຳຮອງຕີນຕູ້ ຖ້ານຮອງຈອກນ້ຳ,
3. ປ່ອຍປາຫາງນົກຍຸງເພື່ອກິນໜອນນ້ຳ,
4. ປັບປຸງການອະນາໄມສິ່ງແວດລ້ອມອ້ອມເຮືອນ ບໍ່ໃຫ້ມີກະໂປະ, ກະປ໋ອງ ຢາງຕີນລົດເກົ່າທີ່ມີນ້ຳຂັງ,
5. ປະຕິບັດໃຫ້ເປັນນິໃສປະຈຳທຸກໆອາທິດ ເພື່ອໃຫ້ບັນລຸ 3 ບ ຄື:
ບໍໃຫ້ມີໜອນນ້ຳ, ບໍ່ໃຫ້ມີຍຸງລາຍ ແລະບໍ່ໃຫ້ມີໄຂ້ເລືອດອອກ. ຖ້າເປັນໄຂ້ບໍ່ໃຫ້ຊື້ຢາມາກິນເອງຄວນໄປພົບແພດໝໍດ່ວນ ພຽງເທົ່ານີ້ ທ່ານກໍ່ຈະສາມາດປອດໄພຈາກການເປັນພະຍາດໄຂ້ເລືອດອອກໄດ້ຢ່າງແນ່ນອນ.
ແຫຼ່ງຂໍ້ມູນ: Midia Laos