ກະຊວງສາທາລະນະສຸກໄດ້ລາຍງານຍອດຜູ້ເສຍຊີວິດຈາກໄຂ້ຍຸງລາຍກຳລັງຢູ່ໂຕ ໃນຈຳນວນ 54 ຄົນໃນທົ່ວປະເທດ ຂະນະທີ່ຍອດຜູ້ຕິດເຊື້ອເພີ່ມຂຶ້ນ ອີກ 900 ກວ່າກໍລະນີ ນັບແຕ່ວັນທີ 11-15/08/2019.
ກົມຄວບຄຸມພະຍາດຕິດຕໍ່ໄດ້ລາຍງານວ່າ: ນັບແຕ່ທ້າຍເດືອນທັນວາ 2018 ມາຮອດ ວັນທີ 15/08/2019 ມີຈຳນວນຜູ້ຕິດເຊື້ອທັງໝົດ 23,949 ກໍລະນີ ແລະ ເສຍຊີວິດ 54 ກໍລະນີ.
ນະຄອນຫຼວງວຽງຈັນ ຍັງເປັນອັນດັບໜຶ່ງທີ່ ມີຜູ້ເປັນໄຂ້ຍຸງລາຍ 5,692 ກໍລະນີ ເສຍຊີວິດ 13 ຄົນ, ສະຫວັນນະເຂດ ມີ 4,094 ກໍລະນີ, ເສຍຊີວິດ 20 ຄົນ, ຈຳປາສັກ 3,005 ກໍລະນີ, ເສຍຊີວິດ 6 ຄົນ. ແຂວງທີ່ມີລາຍງານ ຄົນເປັນໄຂ້ຍຸງລາຍໜ້ອຍທີ່ສຸດ ແມ່ນແຂວງຫົວພັນ ມີພຽງ 1 ຄົນເທົ່ານັ້ນ.
ກະຊວງສາທາລະນະສຸກຍັງສືບຕໍ່ ສົມທົບກັບພາກສວ່ນທີ່ກ່ຽວຂ້ອງ ແລະ ການຈັດຕັ້ງທ້ອງຖິ່ນເພື່ອປຸກລະດົມປະຊາຊົນຊ່ວຍກັນ ໃນການທຳລາຍໄຂ່ຍຸງລາຍ ຕາມແບບ ວິທີປ້ອງກັນ 5 ປ. ກະຊວງສາທາລະນະສຸກ ຍັງໄດ້ລົງພົ່ນຢາຂ້າຍຸງລາຍໃນບາງເຂດທີ່ມີຄວາມສ່ຽງ.
ແຫຼ່ງຂໍ້ມູນ: ວຽງຈັນທາຍ