ວັດສີພູມ ວະຣາຣາມ ເມືອງຊະນະຄາມ ແຂວງວຽງຈັນ ເປັນວັດເກົ່າແກ່ ສ້າງມາແຕ່ສະໄຫມຂອງ ສົມເດັດພຣະເຈົ້າໂພທິສາຣາຊ ພຣະມະຫາກະສັດ ແຫ່ງອານາຈັກລາວລ້ານຊ້າງ ພາຍໃນວັດແຫ່ງນີ້ແມ່ນຍັງມີວັດຖຸບູຮານ ທີມີຄຸນຄ່າ ນັ້ນກໍ່ຄືພຣະທາຕຸ ທີສ້າງຂຶ້ນມາແຕ່ປີ ຄສ 1538.
ເຊິ່ງເມື່ອກ່ອນນັ້ນພຣະທາຕຸອົງນີ້ ແມ່ນມີຄວາມກວ້າງ 100 ແມັດມົນທົນ ແລະມີຄວາມສຸງ 45 ແມັດ ແລະມີຄວາມງົດງາມ ຕາມແບບສະບັບຕາມຮີດຕາມຄອງການສ້າງແບບສິລະປະລ້ານຊ້າງຕອນກາງ ເຊິ່ງອ້ອມຮອບໄປດ້ວຍກົມມະລຽນ ທັງ 4 ດ້ານ ແລະມີປະຕູເຂົ້າທັງ 4 ດ້ານ ປັດຈຸບັນມານີ້ເພິ່ນໄດ້ມີການ ບູຣະນະຂຶ້ນໃໝ່ ເຊິ່ງ ເຮັດໃຫ້ພຣະທາຕຸຈາກແຕ່ເດິມນັ້ນນ້ອຍລົງ, ຈົນເສຍຮູບຊົງໄປຫຼາຍເຕີບ,ເປັນຕາໜ້າເສຍດາຍ ອີຫລີ .
ໃນບໍລິເວນດັ່ງກ່າວ ຍັງມີວັດຖຸທີມີຄ່າອີກຢ່າງຫນຶ່ງ ທີບັນທຶກການສ້າງນັ້ນກໍ່ຄື ເສົາສິລາເລກ ແມ່ນບັນທຶກເລື່ອງລາວກ່ຽວກັບການສ້າງພຣະທາຕຸອົງນີ້, ໂດຍອອກພຣະນາມ ສົມເດັດພຣະເຈົ້າໂພທິສາຣາຊເຈົ້າ ໃນການສ້າງພຣະທາຕຸແຫ່ງນີ້ .
ແຫຼ່ງຂໍ້ມູນແລະຮູບພາບ: ພຣະມະຫາ ດຣ.ບຸນທະວີ ວິໄລຈັກຣ໌