ຫຼາຍພາກສ່ວນໄດ້ສົມທົບສະບຽງອາຫານມອບໃຫ້ນະຄອນຫຼວງວຽງຈັນ ເຊິ່ງຊີ້ນຳໂດຍພະແນກຖະແຫຼງຂ່າວ ວັດທະນາທຳ ແລະທ່ອງທ່ຽວນະຄອນຫຼວງວຽງຈັນ ຄະນະສະເພາະກິດຕ້ານການລະບາດພະຍາດ Covid-19 ນະຄອນຫຼວງວຽງຈັນ, ໂທລະພາບນະຄອນຫຼວງ ແລະ ບັນດາຜູ້ປະກອບການຈາກສະພາການຄ້າ ແລະ ອຸດສາຫະກຳນະຄອນຫຼວງວຽງຈັນ ເພື່ອໄປມອບຊ່ອຍເຫຼືອຜູ້ທີ່ພົບຄວາມຫຍຸ້ງຍາກໃນການໄປທຳມາຫາກິນໃນໄລຍະກັກກັນ ເຊິ່ງຈັດສະບຽງອາຫານເປັນ 5.000 ຊຸດ ມູນຄ່າ 300 ລ້ານກວ່າກີບ.
ວິທີການແຈກຢາຍແມ່ນທາງອົງການປົກຄອງນະຄອນຫຼວງວຽງຈັນ ໄດ້ຊີ້ນຳຢ່າງໃກ້ຊິດເພື່ອບໍ່ໃຫ້ເກີດການຊຸມນຸມ ແລະ ບໍ່ໃຫ້ຄົນອອກມາ ເຊິ່ງຈະມອບໃຫ້ທາງເມືອງ ແລະ ນາຍບ້ານຈະມາຮັບແລ້ວໄປແຈກຢາຍໃຫ້ລູກບ້ານຂອງຕົນ. ໃນເບື້ອງຕົ້ນຈະມອບຢູ່ 5 ເມືອງກ່ອນດັ່ງນີ້:
1. ເມືອງຈັນທະບູລີ 2. ເມືອງສີໂຄດຕະບອງ3. ເມືອງສີສັດຕະນາກ 4. ເມືອງໄຊເສດຖາ 5. ເມືອງໄຊທານີ
ໂດຍມີຜູ້ຮ່ວມປະກອບສ່ວນຄື: ສະຖານວິທະຍຸ-ໂທລະພາບນະຄອນຫຼວງວຽງຈັນ, ບໍລິສັດ 3SD, ບໍລິສັດ AIDC, ບໍລິສັດ ຂວັນເມືອງກຣຸບ, ບໍລິສັດ ເມືອງລາວຟູດສ໌, ໂຮງງານນ້ຳກ້ອນອາວຫຼ້າ ແລະ ສະພາການຄ້າ ແລະ ອຸດສາຫະກຳ ນະຄອນຫຼວງວຽງຈັນ.
ແຫຼ່ງຂໍ້ມູນ: ວິທະຍຸຊາວໜຸ່ມລາວ