ຕາດປາຍ, ຕາດກາງ ແລະ ຕາດຊາວວາ (ຫຼື ຕາກຊາວາ) ເປັນ 3 ນ້ຳຕົກຕາດ ທີ່ມີຄວາມສວຍງາມ ແລະ ອຸດົມສົມບູນ ເຊິ່ງຕັ້ງຢູ່ໃກ້ກັບບ້ານ ນ້ຳແຄ້, ເມືອງ ທຸລະຄົມ, ແຂວງ ວຽງຈັນ.
ທັງ 3 ຕາດນີ້ເວົ້າໄດ້ວ່າມີຄວາມງົດງາມເປັນອັນດັບຕົ້ນໆຂອງ ປະເທດລາວ ເລີຍລະ! ຕັ້ງຢູ່ໃນເຂດ ປ່າສະຫງວນແຫ່ງຊາກ ພູເຂົາຄວາຍ, ເຊິ່ງຕາດທັງ 3 ນີ້ແມ່ນຕັ້ງຢູ່ສາຍຫ້ວຍນ້ຳແຄ້ ແລະ ແຕ່ລະຕາດຢູ່ຫ່າງກັນປະມານ 500-1.000 ແມັດ, ມີຄວາມສູງແຕກຕ່າງກັນ ເໝາະສຳລັບນັກທ່ອງທ່ຽວສາຍຍ່າງປ່າ ແລະ Running Trail .
ສຳລັບ ການເດີນທາງແມ່ນສາມາດໄປໄດ້ທັງລົດຈັກ ແລະ ລົດໃຫຍ່ ເຊິ່ງເດີນທາງອອກຈາກສີ່ແຍກໄຟແດງ ດົງໂດກ ໄປຕາມເສັ້ນທາງ ທີ່ຈະໄປຫາ ບ້ານເກີນ, ເມື່ອຮອດສາມແຍກ ບໍລິເວນທາງເຂົ້າແດນສະຫວັນ ໃຫ້ລ້ຽວຂວາ ແລ້ວຂັບຕໍ່ໄປຍັງ ແດນສະຫວັນນໍ້າງື່ມ ຣີສອດ (ເຂດທ່າເຮືອ), ໃນກໍລະນີທີ່ຂີ່ລົດໃຫຍ່ ຈະຕ້ອງໄດ້ຈອດລົດໄວ້ຢູ່ທີ່ ແດນສະຫວັນ ແລ້ວຈ້າງເຮືອເພື່ອເດີນທາງຕໍ່ ໄປຫາບ້ານ ນໍ້າແຄ້ ເພື່ອທີ່ຈະໄດ້ຍ່າງຕໍ່ໄປຍັງນໍ້າຕົກຕາດ.
ແຕ່ຖ້າຂີ່ລົດຈັກ ໄປສາມາດຂີ່ລົດໄປເຖິງ ບ້ານນໍ້າແຄ້ ໄດ້ເລີຍ, ເຊິ່ງສາມາດຂັບຕໍ່ຕາມເສັ້ນທາງທາງດິນແດງ ໂດຍຂີ່ອອກຈາກ ປໍ້ານໍ້າມັນ ຂອງ ແດນສະຫວັນ ລຽບຕາມຂອບ ອ່າງນໍ້າງື່ມ 1 ໄປທາງທິດເໜືອ (ທາງຂ້ອນຂ້າງລຳບາກແດ່ ໂດຍສະເພາະໃນຍາມຝົນ) ເຊິ່ງເປັນໄລະທາງປະມານ 8 ກມ.
ເມືອໄປເຖິງ ບ້ານນໍ້າແຄ້ ແລ້ວ ໃຫ້ຍ່າງໄປຕາມ ສາຍຫ້ວຍນໍ້າແຄ້ ເຂົ້າໄປໃນ ປ່າສະຫງວນ ເພື່ອຈະຂຶ້ນໄປຍັງບໍລິເວນນໍ້າຕົກ ປະມານ 7 ກມ (ຫຼື ປະມານ 2 ຊົ່ວໂມງເຄິ່ງ) ກໍຮອດຈຸດໝາຍແລ້ວ.
ລອງໃຫ້ທ່ານອອກໄປພິສູດດ້ວຍຕົນເອງເບິ່ງວ່າ ສະຖານທີ່ຈິງຈະງາມຄືໃນພາບ ຫຼື ບໍ່?
Hits: 4
