ນັກວິໄຈຈາກ ມະຫາວິທະຍາໄລ ແຫ່ງ ອີລີນອຍ ສະຫະລັດ ອາເມຣິກາ ເປີດເຜີຍຜົນການສຶກສາ ວ່າ: ໄວໜຸ່ມສາວທີ່ມີຈິດໃຈເຫັນແກ່ຄົນອື່ນຫຼາຍກວ່າໂຕເອງ ມີທ່າອ່ຽງວ່າ ຈະເປັນໂຣກຊຶມເສົ້າໜ້ອຍກວ່າ ຜູ້ທີ່ເຫັນແກ່ໂຕເອງ.
ການສຶກສາໃນກຸ່ມໂຕຢ່າງໄວໜຸ່ມສາວອາຍຸປະມານ 15-16 ປີ ພົບວ່າ: ຜູ້ທີ່ມີຄວາມສຸກໃນການເຮັດກິດຈະກຳ ເພື່ອສັງຄົມຕ່າງໆ ແລະ ພ້ອມທີ່ຈະບໍລິຈາກເງິນຊ່ວຍເຫຼືອຜູ້ອື່ນ ຈະມີຄວາມສຸກ ແລະ ຍອມຮັບນັບຖືໃນໂຕເອງ ຫຼາຍກວ່າຜູ້ທີ່ເຫັນແກ່ໂຕ ຫຼື ພະຍາຍາມອອມເງິນໄວ້ສຳລັບໂຕເອງ ແຕ່ພຽງຢ່າງດຽວ.
ສະຖິຕິໄວໜຸ່ມສາວ ທີ່ມີລັກສະນະເຫັນແກ່ໂຕມາຕັ້ງແຕ່ຍັງນ້ອຍ ມີອັດຕາການເຈັບປ່ວຍ ແລະ ເສຍຊີວິດເພີ່ມຂຶ້ນຈາກ 200% ເປັນ 300% ເນື່ອງຈາກມີພຶດຕິກຳສ່ຽງ ຫຼັງຈາກເກີດພາວະໂຣກຊຶມເສົ້າ ຊຶ່ງຜູ້ປ່ວຍໂຣກຊຶມເສົ້າໃນກຸ່ມຄົນພວກນີ້ ມີຈຳນວນເພີ່ມສູງຂຶ້ນຄືກັນ.