Saturday, July 20, 2024
Lenovo

ກະກຽມ ຈັດພິທີສົມໂພດ ແລະ ມອບ-ຮັບ ຫໍຫຼັກເມືອງ ແຂວງໄຊສົມບູນ


ຫຼັງຈາກທີ່ໃຊ້ເວລາ 6 ປີກວ່າ ໃນການກໍ່ສ້າງ ຫໍຫຼັກເມືອງ ແຂວງ ໄຊສົມບູນ ທາງຄະນະຮັບຜິດຊອບ ຈຶ່ງໄດ້ມີການຈັດກອງປະຊຸມ ເພື່ອກະກຽມຄວາມພ້ອມໃນການ ຈັດພິທີສົມໂພດ ແລະ ພິທີ ມອບ-ຮັບ ຫໍຫຼັກເມືອງ ໃນວັນທີ 20 ເມສາ 2022 ຢູ່ທີ່ຫ້ອງປະຊຸມ ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແຂວງໄຊສົມບູນ, ໂດຍການເປັນປະທານ ຂອງທ່ານ ຕົ່ງມົວ ຊົວໂກ້, ຮອງເຈົ້າແຂວງໄຊສົມບູນ, ຜູ້ຊີ້ນຳວຽກງານວັດທະນະທຳ-ສັງຄົມ.


ທ່ານ ກິ່ງເພັດ ເພັດມະຈັນ, ຮອງຫົວໜ້າ ພະແນກ ຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແຂວງ ກ່າວວ່າ ໂຄງການກໍ່ສ້າງຫໍຫຼັກເມືອງ ແມ່ນໄດ້ເລີ່ມລົງມືຈັດຕັ້ງປະຕິບັດ ຕັ້ງແຕ່ວັນທີ 1 ມັງກອນ 2016 ເປັນຕົ້ນມາ ໂດຍແມ່ນ ບໍລິສັດ ພັດທະນາພູເບ້ຍ ກໍ່ສ້າງ ຈຳກັດ ເປັນຜູ້ຮັບເໝົາກໍ່ສ້າງ ໃນມູນຄ່າຕາມສັນຍາເບື້ອງຕົ້ນ ຈຳນວນ 25,598,000,000 ກີບ ແລະ ໄດ້ວ່າຈ້າງບໍລິສັດ ພິເອັມ ສຳຫຼວດ-ອອກແບບ ແລະ ທີ່ປຶກສາ ເປັນທີ່ປຶກສາ.

ມາຮອດ ປັດຈຸບັນ ໂຄງການດັ່ງກ່າວ ໄດ້ສຳເລັດໂດຍໃຊ້ເວລາໃນການກໍ່ສ້າງທັງໝົດ 6 ປີ ກັບ 3 ເດືອນ ຊຶ່ງຜ່ານການກວດກາຄວາມຄືບໜ້າ ຂອງຄະນະກຳມະການ ຄັ້ງສຸດທ້າຍ ໃນວັນທີ 3 ກຸມພາ 2022 ຄະນະກຳມະການໄດ້ຢັ້ງຢືນວ່າ ໂຄງການດັ່ງກ່າວ ໄດ້ສຳເລັດ 99% ບັນດາວຽກທີ່ຍັງບໍ່ທັນສຳເລັດ ແມ່ນເຮັດບົດບັນທຶກກັບ ບໍລິສັດຮັບເໝົາ ເພື່ອປັບປຸງບາງໜ້າວຽກ ທີ່ຍັງບໍ່ທັນສຳເລັດ ຫຼັງຈາກນັ້ນມາ ບໍລິສັດ ຜູ້ຮັບເໝົາ ກໍໄດ້ຈັດຕັ້ງປະຕິບັດ ຈົນມາຮອດ ປັດຈຸບັນ ເຫັນວ່າໜ້າວຽກທີ່ຕ້ອງໄດ້ສືບຕໍ່ປັບປຸງນັ້ນ ໄດ້ຖືກຈັດຕັ້ງປະຕິບັດ ຈົນເກືອບ ສຳເລັດ 100%.

ຊຶ່ງກອງປະຊຸມຄັ້ງນີ້ ຜູ້ເຂົ້າຮ່ວມ ໄດ້ສຸມທຸກສະຕິປັນຍາ ເຂົ້າໃນການປະກອບຄຳຄິດ-ຄຳເຫັນ ດ້ວຍຄວາມຮັບຜິດສູງ ທັງນີ້ ກໍເພື່ອຄົ້ນຄວ້າ ແລະ ປຶກສາຫາລື ກ່ຽວກັບການກຽມຄວາມພ້ອມຮອບດ້ານ ໃຫ້ແກ່ການຈັດພິທີສົມໂພດ ກໍຄືການມອບ-ຮັບ ໃຫ້ມີຄວາມເປັນເອກະພາບ ທັງສາມາດນຳເອົາເນື້ອໃນຈິດໃຈຂອງກອງປະຊຸມຄັ້ງນີ້ ໄປຈັດຕັ້ງປະຕິບັດ ໃຫ້ທັນຕາມກຳນົດເວລາ ແລະ ປະກົດຜົນເປັນຈິງ ເພື່ອເຮັດໃຫ້ຫໍຫຼັກເມືອງ ແຫ່ງນີ້ ກາຍເປັນສະຖານທີ່ສັກກາລະບູຊາ ຂອງຊາວແຂວງ ໄຊສົມບູນ ແລະ ຕ່າງແຂວງ ໃນອະນາຄົດ ຊຶ່ງມີຄວາມຈຳເປັນທີ່ຈະຕ້ອງໄດ້ຈັດພິທີສົມໂພດ ຕາມຮີດຄອງປະເພນີ ຂອງຄົນລາວຊາວພຸດ ເພື່ອເຮັດໃຫ້ສະຖານທີ່ດັ່ງກ່າວ ກາຍເປັນສູນລວມຈິດໃຈ, ເປັນສະຖານທີ່ສັກສິດ ແລະ ເປັນເອກະລັກອັນຊົງຄຸນຄ່າ ຂອງປະຊາຊົນບັນດາເຜົ່າ ຊາວແຂວງໄຊສົມບູນ ຕາບນານຊົ່ວນານ.

ສ່ວນວັນ ແລະ ເວລາ ໃນການຈັດພິທີສົມໂພດ ແລະ ພິທີ ມອບ-ຮັບ ນັ້ນ ແມ່ນຈະໄດ້ແຈ້ງຕື່ມໃນພາຍຫຼັງ.

ຂ່າວ: ນາງ ແກ່ນຈັນ ທຳມະນີ

More from author

Related posts

ຂໍຂອບໃຈນຳຜູ້ສະໜັບສະໜູນ

Latest posts

“ອົດອາຫານ” ບໍ່ຊ່ວຍໃຫ້ຫຼຸດນຳ້ໜັກ

ການອົດອາຫານນັ້ນ ສຳພັນກັບການຈຳກັດ ແຄລໍຣີ່ ຂອງອາຫານທີ່ເຮົາກິນໃນແຕ່ລະມື້, ການນັບ ແຄລໍຣີ່ ເປັນວິທີທີ່ໄດ້ຮັບຄວາມນິຍົມຫຼາຍ ຊຶ່ງມີທີມນັກວິໄຈດ້ານໂພຊະນາການ ໃນ ສະຫະລັດ ອາເມຣິກາ ໄດ້ລາຍງານລົງໃນວາລະສານ ການແພດ ເຈເອເອັມເອ (JAMA International Medicine) ເຖິງຜົນການລົງເລິກກວດຜູ້ໃຫຍ່ ທີ່ລະບຸວ່າ ອ້ວນເຖິງ 100 ຄົນ ໂດຍແບ່ງຈາກພຶດຕິກຳການກິນເປັນ 3 ກຸ່ມ ຊຶ່ງເປັນເວລາ 1 ປີ.

ຈົບມໍປາຍ ຈະຮຽນຕໍ່ສາຍໃດດີ?

ເມື່ອກ່ອນ ການສຶກສາຖືໄດ້ວ່າມີບັນຍາກາດຄຶກຄື້ນ ແລະ ເປັນຂະບວນການ ຫຼາຍຄົນແຂ່ງກັນຮຽນ ແຂ່ງກັນເສັງເພື່ອຈະໄດ້ເຂົ້າຮຽນສາຍທີ່ຕົນເອງມັກ ແຕ່ຕົກມາຍຸກປັດຈຸບັນນີ້ ດ້ວຍສະພາບເສດຖະກິດ ສະພາບແວດລ້ອມ ແລະ ຫຼາຍຢ່າງໃນສັງຄົມທີ່ຜັນແປໄປ ເດັກນ້ອຍສ່ວນໃຫຍ່ບໍ່ຢາກທີ່ຈະຮຽນຕໍ່, ບາງຄົນກໍຈຳເປັນຕ້ອງອອກໄປເຮັດວຽກເພື່ອຫາເງິນຊ່ວຍຄອບຄົວ, ຫຼາຍຄົນກໍອອກມາປະກອບກິດຈະການເຮັດທຸລະກິດ ເປັນນາຍຂອງຕົນເອງ ແຕ່ບໍ່ວ່າຈະຢ່າງໃດກໍຕາມ ຖ້າຄົນທີ່ມີເງືອນໄຂກໍຍັງສະໜັບສະໜູນໃຫ້ຮຽນຕໍ່ສາຍວິຊາຊີບໃຫ້ຈົບຈະເປັນການດີທີ່ສຸດ.

ຍຸກນີ້! ຕ້ອງອວດກັນປະຢັດ

ເມື່ອສັງຄົມເຮົາກ້າວເຂົ້າສູ່ຍຸກທີ່ເຂົ້າຍາກມາກແພງ ຫຼາຍຄົນ “ຫາເຊົ້າກິນເຊົ້າ” ບໍ່ແມ່ນ “ຫາເຊົ້າກິນຄໍ່າ” ຄືແຕ່ກ່ອນແລ້ວ ເຄື່ອງໃຊ້ຂອງສອຍຕ່າງໆ ກໍລ້ວນແຕ່ລາຄາສູງຂຶ້ນເທົ່າຕົວ, ເຮົາຍັງຈະພາກັນມາອວດລວຍໂຊລົດສະນິຍົມດີໆ ໃຊ້ຂອງແພງໆ ກິນອາຫານຫຼູຫຼາ ຕາມຄົນມີລາຍຮັບທີ່ໝັ່ນຄົງ ຫຼື ຄົນຮັ່ງມີບໍ່ໄດ້ແລ້ວ