ໃນຊ່ວງທີ່ອາກາດຮ້ອນອົບເອົ້າແບບນີ້ ນອກຈາກຈະເຮັດໃຫ້ເຮົາບໍ່ສະບາຍຕົວເພາະອຸນຫະພູມທີ່ສູງຂຶ້ນແລ້ວ, ເລື່ອງອາຫານການກິນ ກໍຕ້ອງລະມັດລະວັງເຊັ່ນກັນ, ເພາະໜ້າຮ້ອນ ເຮັດໃຫ້ອາຫານບູດງ່າຍ ເນື່ອງຈາກເຊື່ອພະຍາດສາມາດຈະເລີນເຕີບໂຕໄດ້ຫຼາຍ ແລະ ໄວຂຶ້ນ, ດັ່ງນັ້ນ ມາເບິ່ງນຳກັນວ່າ ມີວິທີຫຍັງແດ່ ທີ່ສາມາອດເກັບຮັກສາອາຫານບໍ່ໃຫ້ບູດງ່າຍໃນໜ້າຮ້ອນ.
- ບໍ່ຄວນວາງອາຫານໄວ້ບ່ອນທີ່ຮ້ອນຈັດ ແຕ່ຖ້າລືມອາຫານໄວ້ໃນລົດດົນ 3-4ຊົ່ວໂມງ ກໍບໍ່ຄວນນຳອາຫານເຫຼົ່ານັ້ນໄປກິນອີກ ເນື່ອງຈາກວ່າມີເຊື່ອພະຍາດແລ້ວ.
- ເລືອກອາຫານປະເພດຈືນໃສ່ກັບ ແທນອາຫານປະເພດອື່ນໆ ອາຫານຈືນອາດບູດຍາກກວ່າອາຫານປະເພດອື່ນທີ່ມີນ້ຳຫຼາຍ, ເນື່ອງຈາກເປັນອາຫານມີຄວາມຊຸ່ມໜ້ອຍ ດັ່ງນັ້ນ ການເກັບອາຫານຈືນບໍ່ວ່າຈະເປັນໄກ່ຈືນ, ເຕົ້າຮູ້ຈືນ ແລະ ອື່ນໆ ສາມາດໃສ່ກັບໄດ້ ແຕ່ຖ້າຈະປ່ຽນໃສ່ຖົງຢາງ ກໍຄວນໃຫ້ອາຫານເຢັນກ່ອນ.
- ອາຫານປະເພດຜັກລວກ ຄວນເຮັດໃຫ້ນ້ຳອອກໝົດ ແລ້ວຊັບດ້ວຍເຈ້ຍທິດຊູອີກຄັ້ງ ກ່ອນຈະນຳແຍກໃສ່ກັບ.
- ກ່ອງ ທີ່ໃສ່ຂອງກິນ ທີ່ເປັນສັດສ່ວນ ເໝາະສຳລັບໃສ່ອາຫານຫຼາຍຊະນິດ ທີ່ຕ້ອງການເກັບໄວ້ລວມກັນ ດັ່ງນັ້ນ, ກ່ອງ ຄວນມີສັດສ່ວນແຍກ ລະວ່າງຜັກ,ອາຫານຈືນ ແລະ ເຂົ້າ.
ນອກຈາກວິທີການເກັບອາຫານ ເພື່ອຫຼຸດຄວາມສ່ຽງ ເລື່ອງອາຫານບູດແລ້ວ ການເລືອກກິນອາຫານທີ່ປຸງສຸກໃໝ່ແທນການກິນອາຫານທີ່ຄ້າງຄືນ ເປັນສິ່ງທີ່ດີກວ່າ, ລວມໄປເຖິງ ການລ້າງມືໃຫ້ສະອາດກ່ອນກິນອາຫານແຕ່ລະຄັ້ງ ຈະເຮັດໃຫ້ເຮົາຫຼຸດຄວາມສ່ຽງອາຫານເປັນພິດໄດ້ອີກດ້ວຍ.