ຮອດໜ້າຝົນກັນແລ້ວ ການເດີນທາງໄປລ້າໄປການ ກໍອາດຈະບໍ່ຄ່ອຍສະດວກປານໃດ ໂດຍສະເພາະແມ່ນຜູ້ທີ່ຂັບຂີ່ລົກຈັກ ເຊິ່ງເຮົາບໍ່ຮູ້ວ່າຝົນຈະຕົກລົງມາຕອນໃດ ສະນັ້ນ, ສິ່ງທີ່ຈຳເປັນທີ່ຄວນຈະຕິດລົດໄວ້ໃນຊ່ວງໜ້າຝົນມີດັ່ງນີ້:
- ຄັນຮົ່ມ: ເປັນສີ່ງທີ່ຄວນເອົາຕິດລົດໄປນຳ ບໍ່ວ່າຈະຍາມຝົນ ຫຼື ຍາມຮ້ອນ ກໍເປັນສິ່ງຈຳເປັນ ໂດຍສະເພາະຄົນທີ່ມີລົດໃຫຍ່ຄວນຈະມີຕິດລົດໄວ້ ຈັກ 1-2 ອັນເພື່ອຄວາມສະດວກ.
- ເສື້ອກັນຝົນ: ຊື່ມັນກໍບອກແລ້ວວ່າເອົາໄວ້ໃຊ້ກັນຝົນ ສຳລັບໃຜທີ່ບໍ່ມັກເອົາຄັນຮົ່ມໄປນຳ ຫຼື ບໍ່ສະດວກກັ້ງຄັນຮົ່ມຂະນະທີ່ຂັບລົດ ເສື້ອກັນຝົນຊ່ວຍໄດ້ ເປັນຕົ້ນແມ່ນຜູ້ທີ່ຂັບຂີ່ລົດຈັກ ເພາະມັນໃຊ້ງ່າຍ ແລະ ຮັກສາໄວ້ສະດວກ ພຽງແຕ່ພັບໃສ່ກະເປົາເອົາຕິດຕົວໄປນຳທຸກບ່ອນ.
- ຢາແກ້ໄຂ້: ລະດູຝົນແບບນີ້ຫາກຕ້ອງພົບກັບອາກາດທີ່ປ່ຽນແປງຕະຫຼອດ ແລະ ຖືກຝົນເປັນປະຈຳ ຄວນເອົາຢາແກ້ໄຂ້ຕິດຕົວໄປນຳຈັກແຜງ ຫາກເກີດອາການປ່ວຍກະທັນຫັນ ຈະໄດ້ຊ່ວຍຫຼຸດໄຂ້ໄດ້ທັນ.
- ຖົງຢາງໃສ່ເຄື່ອງ: ນອກຈາກຄັນຮົ່ມ, ເສື້ອກັນຝົນແລ້ວ ຖົງຢາງກໍມີປະໂຫຍດເມື່ອຝົນຕົກລົງມາ ເພາະສາມາດນຳມາໃຊ້ປະໂຫຍດໄດ້ຫຼາຍຢ່າງເຊັ່ນ ໃສ່ເຄື່ອງຂອງທີ່ຈຳເປັນ ຫຼື ໃສ່ກະເປົາເງິນ ເຊິ່ງຈະຊ່ວຍປ້ອງກັນບໍ່ໃຫ້ຖົງຂອງເຮົາປຽກນ້ຳຝົນໄດ້.
- ເກີບແຕະ: ຝົນຕົກພື້ນປຽກ ນ້ຳຂັງເປັນເລື່ອງທຳມະດາຂອງລະດູຝົນ ດັ່ງນັ້ນການໃສ່ເກີບບັງຕຸບ, ເກີບຜ້າໃບ ຫຼື ເກີບສົ້ນສູງ ກໍຈະເຮັດໃຫ້ການເດີນທາງຂອງເຮົາລຳບາກຫຼາຍຂຶ້ນ ແຕ່ກໍຄົງຫຼີກລ້ຽງບໍ່ໄດ້ກັບການອອກໄປເຮັດວຽກທຸກມື້ ສະນັ້ນ, ເກີບແຕະ ຈຶ່ງເປັນອີກຢ່າງໜຶ່ງທີ່ເຮົາຄວນຈະມີຕິດລົດໄວ້ ເພື່ອຈຳເປັນຕ້ອງປ່ຽນຈະໄດ້ຈັບມາໃຊ້ທັນທີບໍ່ຈຳເປັນຕ້ອງໃສ່ເກີບທີ່ແຫ້ງຍາກໃນການລຸຍນ້ຳ.
