“ຈະພັດທະນາຄົນອື່ນໄດ້ ຕ້ອງພັດທະນາໂຕເອງກ່ອນ” ນີ້ແມ່ນຄຳເວົ້າຂອງ ພຣະອາຈານ ປອ. ດາວສະເດັດ ເລີດມະນີ, ເຈົ້າອະທິການ ວັດໃໝ່ໂຊກຄຳ, ເມືອງ ໄຊເສດຖາ, ນະຄອນຫຼວງວຽງຈັນ. ເພິ່ນເປັນພຣະສົງອົງໜຶ່ງ ທີ່ມີແນວຄວາມຄິດໃນການສ້າງສາ ແລະ ພັດທະນາສັງຄົມໃນຮູບແບບໃໝ່ ໂດຍສະເພາະແມ່ນການພັດທະນາແນວຄວາມຄິດຂອງຄົນ ໃຫ້ເຂົ້າໃຈຫຼັກໃນການໃຊ້ຊີວິດປະຈຳວັນ ໂດຍໃຊ້ສື່ສັງຄົມອອນລາຍສະໄໝໃໝ່ເຂົ້າໃນການເຜີຍແຜ່ຄຳສັ່ງສອນຂອງພຣະພຸດທະເຈົ້າ ເພື່ອເປັນອີກສ່ອງທາງໜຶ່ງທີ່ເຮັດໃຫ້ສັງຄົມຮັບຮູ້ຫຼາຍຂຶ້ນ.
ເວົ້າເຖິງການພັດທະນາແລ້ວ ພຣະອາຈານ ດາວສະເດັດ ໄດ້ມີວິໄສທັດໃນການພັດທະນາ ໂດຍສະເພາະ ຢູ່ໃນວັດໃໝ່ໂຊກຄຳ ແມ່ນເພິ່ນຈະເນັ້ນຢູ່ 4 ຈຸດໃຫຍ່ຄື:
1. ເນັ້ນໃຫ້ວັດເປັນທີ່ໜ້າຢູ່ (ມີຄວາມສະອາດຈົບງາມ ແລະ ມີຄວາມຮົ່ມເຢັນ).
2. ເນັ້ນໃຫ້ວັດມີກິດຈະກຳຕາມພຸດທະພິທີ (ພຣະສົງພາຍໃນວັດຈະມີການສູດມົນ ເຊົ້າ-ແລງ ທຸກໆມື້ ແລະ ຈະຈັດພິທີສູດມົນທຸກໆວັນສິນໃຫຍ່ 15 ຄ່ຳ).
3. ເນັ້ນໃຫ້ວັດມີການຮັກສາສິ່ງແວດລ້ອມ (ຄືການປູກຕົ້ນໄມ້ໃຫ້ຫຼາຍຂຶ້ນ ແລະ ພາຍໃນວັດຈະບໍ່ມີການສ້າງທາດ ຫຼື ເອົາໄຫກະດູກໄວ້ໃນວັດ ຊຶ່ງເວົ້າໄດ້ວ່າ ເປັນວັດດຽວໃນນະຄອນຫຼວງວຽງຈັນ ທີ່ບໍ່ມີທາດ ຫຼື ໄຫກະດູກ).
4. ເນັ້ນການພັດທະນາສັງຄົມ (ເມື່ອຄົນເຂົ້າມາໃນວັດແລ້ວໃຫ້ໄດ້ຄວາມຮູ້ອອກໄປພັດທະນາຕໍ່ ເປັນຕົ້ນແມ່ນການປະຢັດ, ຄວາມພໍພຽງ ແລະ ການໃຊ້ຊີວິດດ້ວຍຄວາມເໝາະສົມ ບໍ່ຟູມເຟືອຍ…).
ນອກຈາກນີ້, ເພິ່ນຍັງບອກອີກວ່າ: ການທີ່ຈະເຮັດໃຫ້ຄົນເຮົາພັດທະນາໄດ້ ກໍຕ້ອງໄດ້ມີການພັດທະນາຢູ່ 4 ຢ່າງ ຄື:
- ພັດທະນາ ທາງກາຍ.
- ພັດທະນາ ລະບຽບວິໄນ.
- ພັດທະນາ ຈິດໃຈ.
- ພັດທະນາ ປັນຍາ.
ຊຶ່ງທັງ 4 ຢ່າງນີ້ ຈະຊ່ວຍໃຫ້ຄົນຜູ້ນັ້ນມີການດຳເນີນຊີວິດທີ່ດີໄດ້ໃນຊີວິດປະຈຳວັນ.
ສ່ວນການພັດທະນາ ວັດໃໝ່ບ້ານໂຊກຄຳ ແມ່ນເພິ່ນເລີ່ມນຳພາສ້າງມາແຕ່ປີ 2014 ຊຶ່ງເປັນວັດທຳອິດທີ່ ພຣະອາຈານ ດາວສະເດັດ ນຳພາອອກຕົນຍາດໂຍມສ້າງສາ ແລະ ກໍຍັງມີອີກຫຼາຍໆ ບ່ອນທີ່ເພິ່ນໄປຊ່ວຍເຫຼືອ ເຊັ່ນ: ຊ່ວຍສ້າງ ຫ້ອງນ້ຳໂຮງຮຽນປະຖົມບ້ານ ໂຊກຄຳ, ໄປຕັ້ງໂຮງທານເຂົ້າປຽກທີ່ໂຮງໝໍມິດຕະພາບ 150 ຕຽງ (ທຸກໆ ວັນສຸກ) ແລະ ບ່ອນອື່ນໆ ອີກທີ່ມີຄວາມຕ້ອງການຄວາມຊ່ວຍເຫຼືອ.
ພຣະອາຈານ ປອ. ດາວສະເດັດ ເລີດມະນີ ເກີດທີ່ບ້ານ ຕາດຂາແດງ, ເມືອງ ອຸທຸມພອນ, ແຂວງ ສະຫວັນນະເຂດ, ເພິ່ນເລີ່ມບວດໃນປີ 1992 ຕອນອາຍຸໄດ້ 11 ປີ, ຫຼັງຈາກບວດໄດ້ 2 ປີ ເພິ່ນກໍໄດ້ຢ້າຍໄປຢູ່ວັດບ້ານ ດົງເຫງັນ, ເມືອງ ອາດສະພັງທອງ 3 ປີ ຈຶ່ງໄດ້ຍ້າຍໄປຮຽນຕໍ່ຢູ່ໂຮງຮຽນອຸດົມສົງວັດໄຊຍະພູມ, ນະຄອນ ໄກສອນພົມວິຫານ, ເພິ່ນເປັນຄົນທີ່ມັກຮຽນຮູ້ ແລະ ພັດທະນາໂຕເອງຢູ່ສະເໝີ ພຣະອາຈານ ດາວສະເດັດ ຈົບການສຶກສາ ລະດັບປະລິນຍາຕີ ດ້ານພາສາອັງກິດ ທີ່ມະຫາວິທະຍາໄລ ມະຫາຈຸລາລົງກອນ, ແຂວງ ໜອງຄາຍ, ປະເທດໄທ ໃນປີ 2007, ຫຼັງຈາກສຶກສາຈົບກໍໄດ້ໄປເປັນຄູອາສາສອນພາສາອັງກິດຢູ່ຊຽງໃໝ່, ປະເທດໄທ 2 ປີ 2007-2008, ຈາກນັ້ນ ກໍກັບມາສອນຢູ່ທີ່ ວິທະຍາໄລສົງ ອົງຕື້ ໃນປີ 2008-2010.
ຈາກນັ້ນ ເພິ່ນກໍເສັງໄດ້ທຶນໄປຮຽນຕໍ່ປະລິນຍາໂທຢູ່ ປະເທດອິນເດຍ ແລະ ໄດ້ຈົບປະລິນຍາໂທ 2 ວິຊາ ຄື: ວິຊາ ພຸດທະສາສະໜາ, ຂະແໜງ ປັດຊະຍາ ທີ່ວິທະຍາໄລ DELIHI UNIVERSITY (DU) ປີ 2012 ດ້ວຍທຶນລັດຖະບານ ແລະ ວິຊາ Public Administration ທີ່ ວິທະ ຍາໄລ CMJ University ປີ 2012 ດ້ວຍທຶນສ່ວນຕົວ ແລ້ວກັບມາສອນອີກ 1 ປີ ແຕ່ 2012-2013, ຈາກນັ້ນ ໃນປີ 2014 ເພິ່ນກໍໄດ້ນຳພາອອກຕົນຍາດໂຍມສ້າງວັດໃໝ່ໂຊກຄຳຂຶ້ນ ແລະ ມີການພັດທະນາຂຶ້ນຢູ່ເລື້ອຍໆ. ຕໍ່ມາ ເພິ່ນກໍໄດ້ຮັບ ປະລິນຍາເອກ ໃນການຂຽນໂຄງການ ຮູບແບບການພັດທະນາ ວັດໃໝ່ໂຊກຄຳ ໃນທາງພຸດທະສາສະໜາ ປີ 2019 ທາງອອນລາຍ.
ການທີ່ເພິ່ນຈະກ້າວມາເຖິງຈຸດນີ້ໄດ້ແມ່ນ ເພິ່ນຕ້ອງໄດ້ຜ່ານຜ່າອຸປະສັກຫຼາຍຢ່າງທີ່ຕ້ອງໄດ້ໃຊ້ຄວາມອົດທົນພະຍາຍາມສູງ ເພື່ອໃຫ້ຜ່ານຈຸດນັ້ນມາໄດ້ ເຮັດໃຫ້ພໍ່ແມ່ພີ່ນ້ອງຊາວບ້ານໂຊກຄຳ ແລະ ເຂດອື່ນໆ ມີຄວາມສັດທາ ແລະ ເຫຼື້ອມໃສໃນຫຼັກຄຳສອນຂອງເພິ່ນ ເຮັດໃຫ້ເພິ່ນເປັນທີ່ເຄົາລົບນັບຖືຢ່າງກວ້າງຂວາງ. ມາຮອດປັດຈຸບັນ ພຣະອາຈານ ປອ. ດາວສະເດັດ, ອາຍຸ 41 ປີ, ບວດມາໄດ້ 30 ປີ ແລະ ບວດພຣະໄດ້ 21 ປີ.