ການນຳແຂວງ ອັດຕະປື ໄດ້ຈັດພິທີ ຫຼໍ່ພຣະພຸດທະຮູບ ທອງເຫຼືອງ ປາງຊະນະມານ 2 ອົງ ຂຶ້ນໃນວັນທີ 25 ມິຖຸນາ 2022 ທີ່ ວັດປ່າລະຍາວໃຕ້, ເມືອງ ສາມັກຄີໄຊ, ແຂວງ ອັດຕະປື, ໂດຍການເຂົ້າຮ່ວມຂອງທ່ານ ເລັດ ໄຊຍະພອນ ເຈົ້າແຂວງອັດຕະປື, ມີຄະນະຝ່າຍສົງ, ອົງການຈັດຕັ້ງທຸກພາກສ່ວນທີ່ກ່ຽວຂ້ອງ ແລະ ພຸດທະສາສະນິກະຊົນຜູ້ມີໃຈບຸນ ໃຈກຸສົນເຂົ້າຮ່ວມ.
ທ່ານ ເລັດ ໄຊຍະພອນ, ເຈົ້າແຂວງອັດຕະປື ໄດ້ມີຄຳເຫັນເປີດພິທີວ່າ: ການຫຼໍ່ພຣະພຸດທະຮູບຄັ້ງນີ້ ແມ່ນບົ່ງບອກເຖິງຄວາມຈະເລີນຮຸ່ງເຮືອງດ້ານຄວາມສັດທາຂອງບັນພະບຸລຸດລາວເຮົາຕໍ່ພຣະພຸດທະສາສະໜາ, ເພາະພຣະພຸດທະຮູບຄື: ຮູບເຄົາລົບທີ່ສູງສຸດ, ສັນຍາລັກເຄື່ອງໝາຍບອກເຖິງຄວາມດີ, ມີຄວາມກ່ຽວຂ້ອງກັບພຣະພຸດທະສາສະໜາ, ພຣະພຸດທະຮູບເຖິງແມ່ນວ່າຈະບໍ່ແມ່ນອົງແທນພຣະພຸດທະເຈົ້າກໍຕາມ, ແຕ່ກໍເປັນການສ້າງວັດຖຸມຸງຄຸນ, ມໍລະດົກທາງໃຈທີ່ແສນປະເສີດ, ມີຄຸນຄ່າຫຼາຍ.
ການຫຼໍ່ພຣະພຸດທະຮູບ ໃນຄັ້ງນີ້; ແມ່ນເພື່ອສືບສານ ພຸດທະສິນລະປະ ອັນຊົງຄຸນຄ່າຂອງບັນພຣະບູລຸດລາວ, ເພື່ອຮັກສາ ແລະ ພັດທະນາສີນລະປະລາວຮ່ວມສະໄໝໃຫ້ຈະ ເລີນຮຸ່ງເຮືອງເໝືອນໃນອະດີດ, ທີ່ສືບຕໍ່ກັນມາຍາວນານຫຼາຍຮ້ອຍປີ,ເພື່ອສ້າງບຸນກຸສົນໃຫ້ກັບຕົນເອງ ແລະ ຄອບຄົວ,ເພື່ອນຶກເຖິງພຣະທັມຄໍາສັ່ງສອນຂອງພຣະພຸດທະອົງ, ຈຶ່ງສ້າງຖວາຍເປັນພຸດທະບູຊາແດ່ອົງສົມເດັດພຣະສັມມາສັມພຸດທະເຈົ້າແລະ ເພື່ອເປັນເຄື່ອງກາບໄຫວ້ສັກກາຣະບູຊາທັງຫຼາຍຂອງພຸດທະສາສະນິກະຊົນ, ເພື່ອສືບທອດອາຍຸຂອງພຣະພຸດທະສາດສະໜາໃນດ້ານສາສະຫນາວັດຖຸໃຫ້ມີຄວາມຮຸ່ງເຮືອງເຫຼືອງເຫຼື້ອມຕໍ່ໄປ, ເພື່ອອຸທິດສ່ວນບຸນກຸສົນໃຫ້ກັບບັນພຣະບຸລຸດ ມີບິດາ-ມານດາ,ຄູອາຈານ,ບູລະພຣະກະສັດ, ຜູ້ນຳພັກລັດ, ແລະ ສັບພະສັດທັງຫຼາຍທີ່ລ່ວງລັບໄປແລ້ວ,
ພຣະພຸດທະຮູບທອງເຫຼືອງ ປາງຊະນະມານ ທັງ 2 ອົງນີ້ ມີນໍ້າໜັກລວມ ອົງລະ 600 ກິໂລ.
ໃນພິທີຄັ້ງນີ້, ຍັງໄດ້ມີການຕັກບາດຖະຫວາຍສັງຄະທານ, ໃຕ້ທຽນບູຊາພະລັດຕະນະໄຕ ລັ່ນຄ້ອງ 9 ບາດ, ໄຫວ້ພຣະຮັບສີນ ຖະຫວາຍທອງວັດຖຸມຸງຄຸນມີຄ່າ ຄະລະວະ ຮັບພອນ, ຢາດນໍ້າ, ປ່ອນວັດຖຸມຸງຄຸນມີຄ່າ ຫຼາບເງີນ, ຫຼາບຄຳ, ຫຼາບທອງ, ພ້ອມຫຼໍ່ເກດພຣະ ແລະ ຫຼໍ່ອົງພຣະພຸດທະຮູບ ຢ່າງເປັນທາງການ.
ໂດຍ: ມະນີວອນ