ເພື່ອເປັນການສົ່ງເສີມການສຳພັນທະໄມຕີ ລະຫວ່າງ 2 ປະເທດ ລາວ-ໄທ ໃນວັນທີ 25 ກໍລະກົດ 2022 ທ່ານ ເຈດສະດາ ກະຕະເວທິນ, ເອກອັກຄະຣາຊະທູດໄທ ປະຈຳ ສປປ ລາວ ໄດ້ເປັນປະທານຮ່ວມໃນພິທີເປີດງານວາງສະແດງສິລະປະຮ່ວມສະໄໝ ລາວ-ໄທ ເພື່ອສົ່ງເສີມສຳພັນໄມຕີລະຫວ່າງໄທ ກັບ ສປປ ລາວ ທີ່ສະຖາບັນວິຈິດສິນແຫ່ງຊາດ, ນະຄອນຫຼວງ ວຽງຈັນ.
ໂດຍມີທ່ານ ຄຳສຸກ ແກ້ວວົງຊາຍ, ຜູ້ອຳນວຍການສະຖາບັນວິຈິດສິນແຫ່ງຊາດ, ດຣ. ກະມົນ ທັດສະນານຊະລີ ສິລະປິນແຫ່ງຊາດ ສາຂາທັດສະນະສິນ, ຜູ້ແທນຈາກກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແຫ່ງ ສປປ ລາວ. ແລະ ກະຊວງວັດທະນະທຳ ແຫ່ງຣາຊະອານາຈັກໄທ ລວມທັງ, ສິລະປິນແຫ່ງຊາດ, ສິລະປິນອາວຸໂສ ແລະ ສິລະປິນ ທັງຈາກໄທ ແລະ ສປປ ລາວ ເຂົ້າຮ່ວມ.
ງານວາງສະແດງດັ່ງກ່າວ, ເປັນການຮ່ວມມືລະຫວ່າງ ສະຖານເອກອັກຄະຣາຊະທູດໄທ ກັບ ສະຖາບັນວິຈິດສິນແຫ່ງຊາດ ສປປ ລາວ, ກະຊວງວັດທະນະທຳ ແຫ່ງຣາຊະອານາຈັກໄທ, ສະພາສິລະປະກຳໄທໃນສະຫະລັດອາເມລິກາ ແລະ ມູນິທິ ຈິດ ບົວບຸດ ຈັດສະແດງຜົນງານຂອງສິລະປິນໄທ ແລະ ສປປ ລາວ ຮ່ວມຈຳນວນ 39 ຜົນງານ ທີ່ສື່ເຖິງຄວາມສຳພັນອັນໃກ້ຊິດລະຫວ່າງປະຊາຊົນທັງສອງປະເທດ.
ນອກຈາກນີ້, ໃນຊ່ວງໄລຍະການຢ້ຽມຢາມ ສປປ ລາວ ເມື່ອວັນທີ 24 ກໍລະກົດ 2022 ຄະນະສິລະປິນໄທ ຍັງໄດ້ຈັດກິດຈະກຳສາທິດການຂຽນສີນ້ຳ, ການຂຽນລາຍໄທປະຍຸກດ້ວຍເຄຍອງ, ການເຮັດເຄື່ອງປັ້ນດິນເຜົາແບບບູຮານ, ການອ່ານບົດກະວີໂດຍອາຈານ ເນົາວະຣັດ ພົງໄພບູນ ສະມາຊິກວຸດທິສະພາ ແລະ ສິລະປິນແຫ່ງຊາດ ສາຂາວັນນະສິນ ແລະ ການບັນຍາຍສິລະປະກ່ຽວກັບສິລະປະຮ່ວມສະໄໝອີກດ້ວຍ.
ສຳລັບຜູ້ທີ່ສົນໃຈ ສາມາດເຂົ້າຮັບຊົມຜົນງານວາງສະແດງສິລະປະຮ່ວມສະໄໝ ລາວ-ໄທ ທີ່ ສະຖາບັນວິຈິດສິນແຫ່ງຊາດ ໄດ້ຕັ້ງແຕ່ມື້ນີ້ຈົນເຖິງ ວັນທີ 30 ສິງຫາ 2022 (ສະເພາະ ວັນຈັນ-ສຸກ) ເວລາ 08:00 – 16:00 ໂມງ.