ໂຕ່ໂນ້ ພາຄິນ ນັກຮ້ອງ-ນັກສະແດງ ຈາກປະເທດໄທ ໄດ້ຖືກຕ້ອນຮັບຈາກແຟນຄລັບຊາວແຂວງ ຄຳມ່ວນ ຢ່າງອົບອຸ່ນ ພາຍຫຼັງທີ່ເດີນທາງມາຢ້ຽມຢາມ ໂຮງໝໍ ແຂວງຄຳມ່ວນ ກ່ອນທີ່ຈະເຮັດກິດຈະກຳເພື່ອການກຸສົນ “ລອຍນ້ຳຂ້າມຂອງ” ເພື່ອລະດົມທຶນຊ່ວຍໂຮງໝໍ 2 ຝັ່ງ ລາວ-ໄທ ໃນວັນທີ 22 ຕຸລາ 2022 ນີ້.
ດ້ານໜຸ່ມ ໂຕ່ໂນ້ ພາຄິນ ໄດ້ບອກວ່າ “ຕົນເອງຈະເຮັດໃຫ້ເຕັມທີ່ ຖ້າຫາກເຮັດໃຫ້ຄົນຫັນມາໃສ່ໃຈໃນສິ່ງແວດລ້ອມ” ເຊິ່ງກໍຖືວ່າ ເປັນອີກດາລາໜຸ່ມຄົນໜຶ່ງ ທີ່ທຸ່ມເທກາຍ-ໃຈ ເພື່ອຊ່ວຍເຫຼືອສັງຄົມຢູ່ຕະຫຼອດ, ໂດຍຫຼ້າສຸດ ໂຕ່ໂນ້ ກໍໄດ້ຈັດໂຄງການດີໆ ກຽມຟິດຮ່າງກາຍ ລອຍຂ້າມນ້ຳຂອງ ກັບໂຄງການ “One Man & The River ໜຶ່ງຄົນລອຍ ຫຼາຍຄົນໃຫ້ “ ເພື່ອລະດົມທຶນຊື້ອຸປະກອນ ທາງການແພດ ໃຫ້ກັບໂຮງໝໍ ສອງຝັ່ງຂອງ ລາວ-ໄທ.
ສຳລັບ ການລອຍນ້ຳຂ້າມແມ່ນ້ຳຂອງ ໃນຄັ້ງນີ້ ລວມໄລຍະທາງ ໄປ-ກັບ ແມ່ນ 15 ກິໂລແມັດ ໃນ 1 ມື້ ເຊິ່ງເປັນໄລຍະທາງທີ່ໄກທີ່ສຸດ ເທົ່າທີ່ ໂຕໂນ້ເຄີຍລອຍມາ.