ຫຼາຍທ່ານອາດຈະສົງໄສວ່າ ພຣະທາດທີ່ຕັ້ງຢູ່ດ້ານຫຼັງຂອງກະຊວງ ພະລັງງານ ແລະ ບໍ່ແຮ່ ເປັນພຣະທາດຫຍັງ ແລະ ສ້າງຂຶ້ນມາຕອນໃດ? ອີງຕາມຂໍ້ມູນຈາກ ພຣະອາຈານ ມະຫາ ດຣ ບຸນທະວີ ວິໄລຈັກ ໃຫ້ຮູ້ວ່າ ພຣະທາດອົງດັ່ງກ່າວ ເປັນພຣະທາດທີ່ບັນຈຸອັດຖິ ຂອງພຣະອໍຣະຫັນ 2 ພຣະອົງ ຄື: ພຣະມະຫາສັດສະດີ ເຊິ່ງເປັນຜູ້ສ້າງວັດທາດຝຸ່ນ ແລະ ພຣະມະຫາພຸດທະວົງສາ ເຊິ່ງເປັນຜູ້ສ້າງວັດໂສກປ່າຫຼວງ, ໃນເມື່ອກ່ອນພຣະທາດອົງນີ້ ແມ່ນຢູ່ໃນເຂດພື້ນທີ່ຂອງວັດທາດຝຸ່ນ.
ຕາມປະຫວັດໄດ້ກ່າວໄວ້ວ່າ: ພຣະອໍລະຫັນສອງອົງນີ້ ເປັນໝູ່ສະຫາຍດຽວກັນ ເຊິ່ງເພິ່ນໄດ້ບວດຮຽນ ແລະ ເຜີຍແຜ່ພຸດທະສາສະໜາພ້ອມກັນ ແລະ ມໍຣະນະພາບລຽນມື້ກັນ, ດັ່ງນັ້ນ ທາງຄະນະສິດສານຸສິດຂອງເພິ່ນຈິ່ງໄດ້ຈັດພິທີ ຊາປະນະກິດສົບໃນມື້ດຽວກັນ ຫຼັງຈາກນັ້ນ, ຈິ່ງໄດ້ມາກໍ່ທາດໄວ້ບ່ອນນີ້.
ຕອນນັ້ນ ແມ່ນຍຸກສະໄຫມຂອງ ພຣະຍາບູລີຈັນອ່ວຍລ່ວຍ ເມື່ອປະມານ 2200-2300 ປີ ຜ່ານມາແລ້ວ ເຊິ່ງພຣະທາດອົງນີ້ ກໍໄດ້ມີການບູຣະນະຈາກບັນດາເຈົ້າຟ້າ-ເຈົ້າແຜ່ນດິນເລື້ອຍໆມາ. ພໍຕົກມາຍຸກສະໄໝເສິກ ລ້ານຊ້າງ-ສະຫຍາມ ກໍຖືກປະປ່ອຍ ແລະ ຂາດການເບິ່ງແຍງຮັກສາ ຈົນມາຮອດ ປັດຈຸບັນ.
ຂໍ້ມູນຈາກ: ພຣະອາຈານ ມະຫາ ດຣ ບຸນທະວີ ວິໄລຈັກ
ທີ່ມາ: ລາວ Temple
