Friday, July 19, 2024
Lenovo

50 ປີ​ ບໍລິສັດ ເບຍລາວ ຈໍາກັດ​ ມຸ່ງໝັ້ນ ໃນການພັດທະນາ ນະວັດຕະກໍາ ແລະ ການຂະຫຍາຍຕົວໃນປະເທດລາວ.​

ໃນວັນທີ 30 ພະຈິກ 2023​ ທີ່ຜ່ານມາ, ບໍລິສັດ ເບຍລາວ ຈຳກັດ ຜູ້ນຳໜ້າອຸດສະຫະກຳເຄື່ອງດື່ມ ໃນ ສປປ ລາວ ໄດ້ດຳເນີນທຸລະກິດ ແລະ ຢູ່ຄຽງຄູ່ກັບສັງຄົມລາວມາຍາວນານຄົບຮອບ 50 ປີ ໃນປີນີ້ ເຊິ່ງເປັນປີແຫ່ງຜົນສໍາເລັດຄັ້ງຍິ່ງໃຫຍ່ ແລະ ມີຄວາມໝາຍໃນໜ້າປະຫວັດສາດຂອງ ບໍລິສັດ ເບຍລາວ. ນັບຕັ້ງປີ 1973 ທີ່ໄດ້ກໍ່ຕັ້ງ ບໍລິສັດ ກໍໄດ້ມຸ່ງໝັ້ນໃນການຮັກສາມາດຕະຖານຄຸນນະພາບສິນຄ້າໃຫ້ທຽບເທົ່າສາກົນ ແລະ ສືບຕໍ່ພັດທະນາ ນະວັດຕະນະກຳໃໝ່ໆ ຢ່າງບໍ່ຢຸດຢັ້ງຢູ່ສະເໝີມາ.

ຕະຫຼອດໄລຍະເວລາຫ້າທົດສະວັດ, ທຸກຜະລິດຕະພັນຊັ້ນນຳຂອງບໍລິສັດເບຍລາວໂດຍສະເພາະ ຍີ່ຫໍ້ເບຍລາວ ບໍ່ພຽງແຕ່ເຕີບໃຫຍ່ຂະຫຍາຍໂຕ ແລະ ເປັນທີ່ຮັກຂອງທຸກຄົນ ແຕ່ຍັງກາຍເປັນສັນຍາລັກຂອງວັດທະນະທຳລາວອີກດ້ວຍ.

ງານລ້ຽງສະເຫຼີມສະຫຼອງ 50ປີ ໄດ້ຖືກຈັດຂຶ້້ນທີ່ ພັດຕະຄານເຊັນພິລາ ເຊິ່ງໄດ້ຮັບກຽດເຂົ້າຮ່ວມຈາກ ພະນະທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ, ທ່ານ ສະເຫຼີມໄຊ ກົມມະສິດ ຮອງນາຍົກລັດຖະມົນຕີ ແລະ ລັດຖະມົນຕີກະຊວງການຕ່າງປະເທດ, ບັນດາລັດຖະມົນຕີຈາກກະຊວງທີ່ກ່ຽວຂ້ອງ, ພ້ອມດ້ວຍຕົວແທນ, ຄູ່ຮ່ວມທຸລະກິດ, ຜູ້ສະຫນອງ ແລະ ສິນລະປິນ-ດາຣາ ຕະຫລອດເຖິງພະນັກງານເບຍລາວທຸກຄົນ.

ງານລ້ຽງດັ່ງກ່າວ ຖືເປັນການຊົມເຊີຍຕໍ່ຄວາມສຳເລັດອັນງົດງາມ ແລະ ເສັ້ນທາງອັນໂດດເດັ່ນ ຂອງ ບໍລິສັດ ເບຍລາວ ແລະ ຍີ່ຫໍ້ເບຍລາວ ໃນຕະຫຼອດໄລຍະເວລາ 5 ທົດສະວັດທີ່ຜ່ານມາ ໂດຍຈັດສະແດງການເດີນທາງຜ່ານນະວັດຕະກຳຂອງຜະລິດຕະພັນເບຍລາວແຕ່ລະຍຸກສະໃໝ ແລະ ພ້ອມດຽວກັນນັ້ນຍັງເປັນງານສະເຫຼີມສະຫຼອງໃຫ້ແກ່ຜົນງານຂອງພະນັກງານເບຍລາວ ຜູ້ທີ່ມີບົດບາດສຳຄັນໃນການສ້າງ ແລະ ຢູ່ຄຽງຄູ່ກັບຜົນສຳເລັດຂອງບໍລິສັດ. ເພື່ອເປັນການຍ້ອງຍໍຊົມເຊີຍໃນການມີສ່ວນຮ່ວມຕໍ່ສັງຄົມຂອງ ບໍລິສັດ ເບຍລາວ ລັດຖະບານໄດ້ມອບຫຼຽນໄຊແຮງງານຊັ້ນໜຶ່ງ ເປັນກຽດມອບໂດຍ ທ່ານນາຍົກລັດຖະມົນຕີ ແຫ່ງ ສປປ ລາວ ຕາງໜ້າບໍລິສັດຮັບໂດຍ ທ່ານ ກິດສະໜາ ວົງໄຊ ປະທານສະພາຜູ້ບໍລິຫານ ບໍລິສັດ ເບຍລາວ, ທ່ານ ເຮັນຣິກ ແອນເດິເຊັນ ຜູ້ອຳນວຍການ ບໍລິສັດເບຍລາວ, ທ່ານ ໂຈອາວ ອາເບຄາຊິດ ຮອງປະທານຜູ້ບໍລິຫານກຸ່ມຄາລສະເບີກຂອງອາຊີ ແລະ ທ່ານ ສິດທິໄຊ ເກດຕະວົງ ເລຂາຄະນະພັກຮາກຖານບໍລິສັດເບຍລາວຈຳກັດ, ອຳນວຍການຝ່າຍກິດຈະກຳເພື່ອສັງຄົມແລະບໍລິຫານ.

ພິເສດໃນຄໍ່າຄືນຂອງງານລ້ຽງແມ່ນໄດ້ມີການເປີດໂຕ ເບຍລາວກຣີນ ເປັນນະວັດຕະກຳທີ່ສະແດງເຖິງການຍົກລະດັບມາດຕະຖານການຜະລິດເບຍໃນປະເທດລາວ. ເບຍລາວກຣີນ ບໍ່ພຽງແຕ່ເປັນເຄື່ອງດື່ມ, ແຕ່ເປັນເບຍທີ່ຖືກສ້າງຂື້ນເພື່ອສະເຫຼີມສະຫຼອງຄວາມເປັນເລີດດ້ານການຜະລິດເບຍ ຂອງ ບໍລິສັດ ເບຍລາວ ຕະຫຼອດໄລຍະເຄິ່ງສະຕະວັດ, ສະທ້ອນໃຫ້ເຫັນເຖິງຄວາມພາກພູມໃຈໃນວັດທະນະທຳ, ມໍລະດົກຂອງປະຊາຊົນລາວ ແລະ ວິວັດທະນາການຂອງແບຼນເບຍລາວ.

ເບຍລາວກຣີນ ມີລົດຊາດສົດຊື່ນ ດື່ມງ່າຍ ແລະ ເປັນເອກະລັກ ຜະລິດຈາກເຂົ້າສາຍພັນດຽວ ທີ່ເປັນເຂົ້າສາຍພັນລາວດັ້ງເດີມ ໂດຍໄດ້ຜ່ານການພັດທະນາຈາກເຂົ້າ 2 ສາຍພັນຄື: ສາຍພັນຫອມເຊບັ້ງໄຟ2 ແລະ 3 ທີ່ໄດ້ມາຈາກໂຄງການປູກເຂົ້າແບບຍືນຍົງຂອງ ບໍລິສັດ ເບຍລາວ. ເຊິ່ງເຂົ້າສາຍພັນດັ່ງກ່າວ ເປັນສາຍພັນທີ່ມີຄວາມທົນທານຕໍ່ກັບການປ່ຽນແປງຂອງສະພາບດິນຟ້າອາກາດ ແລະ ສາມາດປູກໄດ້ຕາມລຽບລຸ່ມແມ່ນ້ຳຂອງ, ເປັນສັນຍາລັກຂອງຄຸນນະພາບແລະ ຄວາມຍືນຍົງຂອງ ບໍລິສັດ ເບຍລາວ.

ງານສະເຫຼີມສະຫຼອງ 50 ປີໄດ້ດຳເນີນໄປພາຍໃຕ້ຄຳຂວັນ “50 ປີແຫ່ງຄວາມພາກພູມໃຈ ກ້າວຕໍ່ໄປພ້ອມກັນ” ສະແດງໃຫ້ເຫັນເຖິງການເຕີບໃຫຍ່ຂອງ ບໍລິສັດ ເບຍລາວ ທີ່ກາຍເປັນໂຮງງານຜະລິດເບຍທີ່ໃຫຍ່ທີ່ສຸດອັນດັບ 2 ໃນທະວີບອາຊີ ໂດຍການນຳໃຊ້ເຕັກໂນໂລຊີການຜະລິດທີ່ທັນສະໄໝ, ການເພີ່ມຜະລິດຕະພັນ ແລະ ນະວັດຕະກໍາໃໝ່ ທີ່ເຮັດໃຫ້ ບໍລິສັດ ເບຍລາວ ເປັນໜຶ່ງໃນບໍລິສັດເບຍທີ່ມີນະວັດຕະກໍາຫລາຍທີ່ສຸດໃນໂລກ.

ຈຸດເດັ່ນອື່ນໆຂອງງານລ້ຽງສະຫຼອງ ແມ່ນໄດ້ມີການນຳສະເໜີວິດີໂອ ແລະ ການວາງສະແດງສິນຄ້າຂອງບໍລິສັດເບຍລາວທີ່ໜ້າສົນໃຈ ເຊິ່ງປະກອບມີທັງໝົດ 13 ຍີ່ຫໍ້, ສື່ໃຫ້ເຫັນເຖິງການມີສ່ວນຮ່ວມໃນການສະໜັບສະໜູນສັງຄົມ ແລະ ວັດທະນະທຳລາວຢ່າງກວ້າງຂວາງ.

ເມື່ອຫວນຄິດເຖິງການເດີນທາງເປັນເວລາເຄິ່ງສະຕະວັດຂອງ ບໍລິສັດ ເບຍລາວ, ທ່ານ ເຮນລິກ ແອນເດີເຊັນ,​ ຜູ້ອໍານວຍການ​ບໍລິສັດ ເບຍລາວ ຈຳກັດ​ ກ່າວວ່າ “ໃນກຸ່ມເຄືອຄາຣສເບີກໄດ້ເລັງເຫັນເຖິງຄຸນຄ່າຂອງການຕັດສິນໃຈຮ່ວມທຶນກັບ ບໍລິສັດ ເບຍລາວ​ ໃນປີ 2005 ເຊິ່ງຖືເປັນຈຸດໝາຍສໍາຄັນຄັ້ງປະຫວັດສາດຂອງພວກເຮົາ. ການປະສົມປະສານກັນລະຫວ່າງພື້ນຖານຂອງ ບໍລິສັດ ເບຍລາວ ທີ່ໄດ້ສະສົມມາເປັນເວລາ 50ປີ ສົມທົບກັບແນວທາງຂອງຄາລສະເບີກກຣຸບ ໄດ້ເພີ່ມທ່າແຮງໃຫ້ການເຕີບໂຕຂອງ ບໍລິສັດ ເບຍລາວ ໃນໄລຍະເວລາສອງທົດສະວັດທີ່ຜ່ານມາ.”

ທ່ານ ກິດສະຫນາ ວົງໄຊ ປະທານສະພາຜູ້ບໍລິຫານຂອງ ບໍລິສັດ ເບຍລາວ ໄດ້ກ່າວອີກຕື່ມວ່າ: “ການເຕີບໃຫຍ່ຂອງບໍລິສັດ ເບຍລາວ ຖືເປັນສັກຂີພະຍານທີ່ບົ່ງບອກເຖິງການສະແຫວງຫາຄຸນນະພາບ ແລະ ຄວາມມຸ່ງໝັ້ນຕໍ່ຜູ້ບໍລິໂພກຂອງພວກເຮົາຢ່າງບໍ່ຢຸດຢັ້ງ. ໃນຂະນະທີ່ພວກເຮົາສະເຫຼີມສະຫຼອງວາລະອັນສຳຄັນນີ້, ພວກເຮົາກໍຍັງສືບຕໍ່ສ້າງອະນາຄົດທີ່ເຕັມໄປດ້ວຍນະວັດຕະກໍາ ແລະ ການເຕີບໂຕເພີ່ມຂຶ້ນ.”

ເພື່ອເປັນການສະແດງຄວາມຂອບໃຈຕໍ່ການປະກອບສ່ວນຂອງພະນັກງານ, ບໍລິສັດເບຍລາວ ໄດ້ຍ້ອງຍໍຊົມເຊີຍພະນັກງານຈຳນວນ 58 ຄົນທີ່ມີອາຍຸການເຮັດວຽກຫຼາຍກວ່າ 25 ປີຂຶ້ນໄປ ດ້ວຍການມອບ “ຂັນລາງວັນ Long Service Awards” ພາຍໃນງານ. ພ້ອມດຽວກັນນັ້ນ, ກໍໄດ້ມອບ “ໃບຍ້ອງຍໍກຽດຕິຄຸນ Appreciation Awards” ໃຫ້ແກ່ຜູ້ສະໜອງຫຼາຍກວ່າ​ 80 ບໍລິສັດ ອີກດ້ວຍ.

More from author

Related posts

ຂໍຂອບໃຈນຳຜູ້ສະໜັບສະໜູນ

Latest posts

“ອົດອາຫານ” ບໍ່ຊ່ວຍໃຫ້ຫຼຸດນຳ້ໜັກ

ການອົດອາຫານນັ້ນ ສຳພັນກັບການຈຳກັດ ແຄລໍຣີ່ ຂອງອາຫານທີ່ເຮົາກິນໃນແຕ່ລະມື້, ການນັບ ແຄລໍຣີ່ ເປັນວິທີທີ່ໄດ້ຮັບຄວາມນິຍົມຫຼາຍ ຊຶ່ງມີທີມນັກວິໄຈດ້ານໂພຊະນາການ ໃນ ສະຫະລັດ ອາເມຣິກາ ໄດ້ລາຍງານລົງໃນວາລະສານ ການແພດ ເຈເອເອັມເອ (JAMA International Medicine) ເຖິງຜົນການລົງເລິກກວດຜູ້ໃຫຍ່ ທີ່ລະບຸວ່າ ອ້ວນເຖິງ 100 ຄົນ ໂດຍແບ່ງຈາກພຶດຕິກຳການກິນເປັນ 3 ກຸ່ມ ຊຶ່ງເປັນເວລາ 1 ປີ.

ຈົບມໍປາຍ ຈະຮຽນຕໍ່ສາຍໃດດີ?

ເມື່ອກ່ອນ ການສຶກສາຖືໄດ້ວ່າມີບັນຍາກາດຄຶກຄື້ນ ແລະ ເປັນຂະບວນການ ຫຼາຍຄົນແຂ່ງກັນຮຽນ ແຂ່ງກັນເສັງເພື່ອຈະໄດ້ເຂົ້າຮຽນສາຍທີ່ຕົນເອງມັກ ແຕ່ຕົກມາຍຸກປັດຈຸບັນນີ້ ດ້ວຍສະພາບເສດຖະກິດ ສະພາບແວດລ້ອມ ແລະ ຫຼາຍຢ່າງໃນສັງຄົມທີ່ຜັນແປໄປ ເດັກນ້ອຍສ່ວນໃຫຍ່ບໍ່ຢາກທີ່ຈະຮຽນຕໍ່, ບາງຄົນກໍຈຳເປັນຕ້ອງອອກໄປເຮັດວຽກເພື່ອຫາເງິນຊ່ວຍຄອບຄົວ, ຫຼາຍຄົນກໍອອກມາປະກອບກິດຈະການເຮັດທຸລະກິດ ເປັນນາຍຂອງຕົນເອງ ແຕ່ບໍ່ວ່າຈະຢ່າງໃດກໍຕາມ ຖ້າຄົນທີ່ມີເງືອນໄຂກໍຍັງສະໜັບສະໜູນໃຫ້ຮຽນຕໍ່ສາຍວິຊາຊີບໃຫ້ຈົບຈະເປັນການດີທີ່ສຸດ.

ຍຸກນີ້! ຕ້ອງອວດກັນປະຢັດ

ເມື່ອສັງຄົມເຮົາກ້າວເຂົ້າສູ່ຍຸກທີ່ເຂົ້າຍາກມາກແພງ ຫຼາຍຄົນ “ຫາເຊົ້າກິນເຊົ້າ” ບໍ່ແມ່ນ “ຫາເຊົ້າກິນຄໍ່າ” ຄືແຕ່ກ່ອນແລ້ວ ເຄື່ອງໃຊ້ຂອງສອຍຕ່າງໆ ກໍລ້ວນແຕ່ລາຄາສູງຂຶ້ນເທົ່າຕົວ, ເຮົາຍັງຈະພາກັນມາອວດລວຍໂຊລົດສະນິຍົມດີໆ ໃຊ້ຂອງແພງໆ ກິນອາຫານຫຼູຫຼາ ຕາມຄົນມີລາຍຮັບທີ່ໝັ່ນຄົງ ຫຼື ຄົນຮັ່ງມີບໍ່ໄດ້ແລ້ວ