ສີວັນ ສີບຸນເຮືອງ ເປັນນັກແຕ້ມຮູບຜູ້ທີ່ບໍ່ຍອມແພ້ໃຫ້ກັບໂຊກສະຕາ ຊີວິດພິກຜັນຈາກອຸບັດເຫດເສຍແຂນທັງສອງຂ້າງ ເຝິກຝົນຕົນເອງຈົນກາຍເປັນສິລະປິນນັກແຕ້ມຮູບ ຜູ້ທີ່ສາມາດສ້າງຜົນງານໄປສະແດງສູ່ສາຍຕາຊາວໂລກ.
ກ່ອນທີ່ຈະມາເປັນນັກແຕ້ມຮູບບໍ່ແມ່ນງ່າຍ ປັດຈຸບັນ, ທ້າວ ສີວັນ ສີບຸນເຮືອງ (ວັນ), ອາຍຸ 27 ປີ, ຢູ່ບ້ານ ຕານມີໄຊ, ເມືອງ ໄຊທານີ, ນະຄອນຫຼວງ ວຽງຈັນ ໂດຍ ວັນ ໄດ້ເລົ່າໃຫ້ຟັງວ່າ ກ່ອນຈະມາແຕ້ມຮູບ ຕົນເອງຖືກອຸບັດເຫດໄຟຟ້າຊ໋ອດ ໃນຊ່ວງອາຍຸ 16 ປີ ເຮັດໃຫ້ເສຍແຂນທັງສອງຂ້າງ ເຮັດໃຫ້ບໍ່ສາມາດເຮັດຫຍັງໄດ້ເລີຍ ເຖິງຈະຢາກຮຽນໜັງສືແຕ່ກໍບໍ່ສາມາດຮຽນໄດ້ ເພາະບໍ່ສາມາດຂຽນໄດ້ຄືກັບຄົນອື່ນ ເລີຍເລືອກເດີນໃນເສັ້ນທາງສາຍແຕ້ມຮູບ ໃນຊ່ວງທຳອິດກໍໃຊ້ຕີນເຝິກແຕ້ມຮູບ ເຖິງຈະບໍ່ງາມ ແຕ່ກໍເຝິກມາເລື້ອຍໆເພາະຄວາມມຸ່ງໝັ້ນຈົນມາເຖິງປັດຈຸບັນ.
ນອກນັ້ນ, ຜົນງານທີ່ໂດດເດັ່ນຂອງ ວັນ ທີ່ແອັດເຊື່ອວ່າຫຼາຍໆຄົນໜ້າຈະເຄີຍເຫັນມາແລ້ວແມ່ນຮູບຂອງ ປາເຢັ້ງຊາ ລໍ Miss Universe Laos 2022 ໂດຍເພິ່ນໄດ້ໃຊ້ພຽງຕີນແຕ້ມພາບອອກມາໄດ້ງົດງາມຫຼາຍ.
ສຳລັບຜົນງານຫຼ້າສຸດ ເພິ່ນຍັງໄດ້ໄປຮ່ວມງານວາງສະແດງຜົນງານທີ່ ທະນາຄານເມແບ້ງ ກຸງກວ່າລາລຳເປີ ປະເທດມະເລເຊຍ ເຊິ່ງ ວັນ ໄດ້ໃຫ້ສຳພາດກັບອິນໄຊລາວວ່າ: ໃນຈຸດໆໜຶ່ງ ທາງຜູ້ໃຫຍ່ໃຈດີ ສັງຄົມຄົນອ້ອມຂ້າງ ໄດ້ຊ່ວຍກັນສົ່ງເສີມຜົນງານມາຕະຫຼອດ ແລະ ໄດ້ມອບໂອກາດໃຫ້ໄປວາງສະແດງຜົນງານ ຢູ່ປະເທດມາເລເຊຍ ເຊິ່ງຕົນກໍໄດ້ຮູ້ສຶກດີໃຈ ຕື່ນເຕັ້ນຫຼາຍ ທີ່ຜົນງານຂອງຕົນເອງໄດ້ອອກໄປສູ່ສາຍຕາປະເທດເພື່ອນບ້ານ. ນອກນັ້ນ, ຕົນຍັງໄດ້ແຮງບັນດານໃຈຈາກຜົນງານຂອງນັກແຕ້ມຮູບຄົນອື່ນຈາກເພື່ອນບ້ານເຊັ່ນກັນ ເຮັດໃຫ້ຕົນເອງຢາກພັດທະນາຝີມືຂຶ້ນໄປອີກ.
ແນວໃດກໍຕາມ ວັນ ກໍຍັງໄດ້ຝາກຂອບໃຈສັງຄົມ, ພໍ່ແມ່, ອ້າຍເອື້ອຍນ້ອງໝູ່ຄູ່ທີ່ຄອຍຊ່ວຍເຫຼືອ ແລະ ຜູ້ໃຫຍ່ໃຈດີທີ່ຄອຍສົ່ງເສີມຊຸກຍູ້ເຂົາຜົນງານມາຕະຫຼອດຈົນມາເຖິງປັດຈຸບັນ.
ຖ້າທ່ານໃດຢາກໃຫ້ ວັນ ສ້າງຜົນງານການແຕ້ມຮູບຕ່າງໆໃຫ້ ກໍສາມາດຕິດຕໍ່ໄປໄດ້ທີ່ ເບີໂທ ຫຼື WhatsApp: 020 5418 4349 ຫຼື ເຂົ້າໄປເບິ່ງຜົນງານຂອງເຂົາໄດ້ທີ່ Facebook: Vanh LikeDrawing.
