ການຫຼິ້ນໂຊຊ້ຽວມີເດຍໃນປັດຈຸບັນ ນອກຈາກຈະມີຜົນດີໃນການຊອກຫາຂໍມູນຂ່າວສານຕ່າງໆໄດ້ງ່າຍຂຶ້ນແລ້ວ ມັນຍັງແຝງດ້ວຍໄພຮ້າຍ ທີ່ເຮັດໃຫ້ຄົນເຮົາເສຍສຸຂະພາບໄດ້ ຖ້າຫຼິ້ນຫຼາຍຈົນເກີນໄປ ຕໍ່ໄປນີ້ແມ່ນ 5 ໂຣກຂອງຄົນຕິດໜ້າຈໍ:
1. ໂຣກຊຶມເສົ້າຈາກ facebook (facebook Depression Syndrome): ອາການນີ້ເກີດຂຶ້ນເມື່ອຕິດຢູ່ແຕ່ໜ້າຈໍ ຈິ້ມໆກົດໆ ລົມກັບຄົນໃນໂລກອອນລາຍ ກໍກາຍເປັນການເພີກເສີຍຕໍ່ຄົນໃນໂລກຈິງ ຊຶ່ງອັນນັ້ນກໍເພາະໄດ້ສ້າງຄວາມເປັນຈິງທຽມ ຂຶ້ນມາ ຈາກການໂພດແຕ່ເລື່ອງດີໆ ແຕ່ເກັບ ຫຼື ອຳເລື່ອງບໍ່ດີໄວ້ ເຮົາຈຶ່ງເຫັນແຕ່ຄົນທີ່ມີຊີວິດສົມບູນແບບ ໃນໂລກອອນລາຍ ແລະເມື່ອນຳມາສົມທຽບກັບໂຕເອງ ກໍມັກຈະເກີດຄວາມຮູ້ສຶກ “ໄຮ້ຄ່າ” ຂຶ້ນມາ.
2. ລະເມີແຊັດ (Sleep-Texting): ອາການນີ້ຄື ເຖິງແມ່ນວ່າຈະນອນ ແຕ່ກໍຍັງລຸກຂຶ້ນມາພິມ ຊຶ່ງຄືກັບຄົນລະເມີນັ້ນເອງ. ສາເຫດກໍມາຈາກພຶດຕິກຳຕິດ ສະມາດໂຟນ ເກີນເຫດ ກະທົບມາເຖິງລະບົບການເຮັດວຽກຂອງຮ່າງກາຍ ເຮັດໃຫ້ສະສົມຄວາມຕຶງຄຽດ ສ່ຽງຕໍ່ການເປັນໂລກອ້ວນ, ຝັນຮ້າຍ, ກະທົບຕໍ່ການຮຽນ ແລະການເຮັດວຽກ.
3. ໂຣກວຸ່ນວາຍໃນຕາເສື່ອມ: ຖ້າຫາກເບິ່ງເຫັນຕານ່າງ ຫຼື ເສັ້ນອັນໃດບາງຢ່າງວົນໄປມາຄືຍຸງ ປັດເທົ່າໃດກໍຍັງບໍ່ຖືກ ນີ້ຄື “ໂຣກວຸ່ນວາຍໃນຕາເສື່ອມ”. ປັດຈຸບັນ ພົບວ່າ ຄົນອາຍຸນ້ອຍໆ ເປັນໂຣກນີ້ຫຼາຍຂຶ້ນ ຊຶ່ງສາເຫດຫຼັກໆ ກໍມາຈາກການແຊັດຕະຫຼອດມື້. ວິທີປ້ອງກັນກ່ອນເປັນໂຣກນີ້ກໍຄື ພຽງແຕ່ຮູ້ຈັກພັກສາຍຕາ ເບິ່ງໄປໃນບ່ອນກວ້າງໄກແດ່.
4. ໂນໂມໂຟເບຍ (Nomophobia): ແປຕາມໂຕກໍຄື ໂຣກຢ້ານບໍ່ມີມືຖືໃຊ້. ມັນເປັນໂຣກທາງຈິດປະເພດໜຶ່ງ ທີ່ຈັດຢູ່ໃນກຸ່ມກັງວົນໃຈ ໝົກໝົ້ນຢູ່ກັບການຊັດຂໍ້ຄວາມໃນມືຖື ຫຼືໃຊ້ເວລາໂອ້ລົມກັບເພື່ອນ ໃນໂລກອອນລາຍຫຼາຍກວ່າໝູ່ທີ່ຢູ່ຕໍ່ໜ້າ.
ຖ້າຜູ້ທີ່ມີອາການນີ້ ຕ້ອງລະວັງບັນຫາສຸຂະພາບໃຫ້ດີ ໂດຍສະເພາະນີ້ວລ໊ອກ, ປວດຕາ, ປວດເມື່ອຍຄໍ ແລະບ່າ, ໝອນຮອງກະດູກເສື່ອມກ່ອນໄວອັນຄວນ ເພາະນັ່ງຜິດທ່າເປັນເວລາດົນໆ ລວມທັງອາການນອນບໍ່ຫຼັບ ແລະ ໂຣກອ້ວນທີ່ເກີດຈາກມົວເມົາແຕ່ນັ່ງຫຼິ້ນມືຖືດົນໆ ໂດຍບໍ່ຍອມລຸກໄປໃສ.
5. ໂຣກສະມາດໂຟນເຟດ (Smartphone face): ເກີດຈາກການທີ່ເຮົາກົ້ມລົງເບິ່ງແຕ່ໜ້າຈໍ ເປັນເວລາດົນເກີນໄປ ເຮັດໃຫ້ກ້າມຊີ້ນຄໍເກີດອາການເຄັ່ງຕຶງ ແລະໄປເພີ່ມແຮງກົດບໍລິເວນແກ້ມ. ນອກນີ້ ກ້າມຊີ້ນບໍລິເວນມູມປາກກໍຈະຕົກໄປທາງຄາງອີກດ້ວຍ ຈົນເຮັດໃຫ້ໃບໜ້າອາດເບິ່ງຜິດແປກໄປ.
