ສວນພຶກສາ ເປັນໜຶ່ງໃນສະຖານທີ່ທ່ອງທ່ຽວທາງວັດທະນະທຳຂອງ ນະຄອນຫຼວງ ວຽງຈັນ ທີ່ໄດ້ຮວບຮວມເອົາພູມປັນຍາ, ຫົວຄິດປະດິດສ້າງຂອງປະຊາຊົນລາວບັນດາເຜົ່າຕັ້ງແຕ່ອະດີດຈົນເຖິງປັດຈຸບັນ ໃນຂອບເຂດທົ່ວປະເທດ ມາລວມໄວ້ຢູ່ບ່ອນດຽວ.
ເພື່ອເປັນການເຕົ້າໂຮມຄວາມສາມັກຄີ ແລະ ຮັກສາວັດທະນະທຳ ຮີດຄອງປະເພນີຂອງບັນດາເຜົ່າ, ທັງເປັນສະຖານທີ່ສຶກສາຮຽນຮູ້ກ່ຽວກັບວັດທະນະທໍາບັນດາເຜົ່າ ໃຫ້ແກ່ບັນດາຊາວໜຸ່ມ, ເຍົາວະຊົນ, ນັກຮຽນນັກສຶກສາ ລວມທັງນັກທ່ອງທ່ຽວພ າຍໃນ ແລະ ຕ່າງປະເທດ ທີ່ມີຄວາມສົນໃຈກ່ຽວກັບວັດທະນະທຳ ປະເພນີບັນດາເຜົ່າຕ່າງໆ. ເພິ່ນຈຶ່ງໄດ້ສ້າງຫ້ອງວາງສະແດງ 50 ຊົນເຜົ່າແຫ່ງນີ້ ຂຶ້ນມາ.
ສະຖານທີ່ດັ່ງກ່າວ ແມ່ນເປັນບ່ອນຮວບຮວມປະຫວັດຄວາມເປັນມາຂອງ 50 ຊົນເຜົ່າແຫ່ງທຳອິດໃນລາວ ເຊິ່ງການວາງສະແດງໄດ້ຈັດເປັນ 5 ສ່ວນຄື: ບ່ອນຕ້ອນຮັບແຂກທາງດ້ານໜ້າທາງເຂົ້າ, ເປັນຫ້ອງສາຍຮູບເງົາ ທີ່ມີປະຫວັດຄວາມເປັນມາໂດຍຫຍໍ້ຂອງບັນດາເຜົ່າ, ຫ້ອງວາງສະແດງຮູບພາບແຕ້ມ ແລະ ຄວາມເປັນມາຂອງ 50 ຊົນເຜົ່າ; ນອກຈາກນີ້, ຍັງມີການວາງສະແດງພິທີກຳຕ່າງໆ ຂອງບັນດາເຜົ່າໃນ 4 ກຸ່ມພາສາ, ວາງສະແດງເຄື່ອງນຸ່ງຂອງຖືທີ່ເປັນເອກະລັກຂອງ 50 ຊົນເຜົ່າອີກດ້ວຍ.
