Friday, July 19, 2024
Lenovo

ຮຽນຈົບໃໝ່! ຈະເອົາປະສົບການມາຈາກໃສ?

ຄຳຖາມໂລກແຕກທີ່ບັນດິດຈົບໃໝ່ມັກຈົ່ມ ເມື່ອເວລາໄປສະໝັກວຽກແລ້ວຖືກຖາມວ່າ “ມີປະສົບການເຮັດວຽກມາກ່ອນບໍ?” ເຊິ່ງມັກຈະບັນທອນຈິດໃຈຂອງຫຼາຍຄົນ ຍິ່ງໄປກວ່ານັ້ນ, ມີບາງຄົນບໍ່ກ້າ ທີ່ຈະໄປສະໝັກວຽກຍ້ອນຢ້ານຖືກຖາມມາແບບນີ້ ເມື່ອຕອບບໍ່ໄດ້ສຸດທ້າຍກໍວ່າງວຽກ.

ມີຫຼາຍຄົນກໍຮູ້ວ່າ “ປະສົບການ” ມັນສຳຄັນ ແຕ່ມັກເບິ່ງຂ້າມ ແລະ ມັກຄິດວ່າ ແລ້ວຄ່ອຍຫາ, ຈົບໄປຄ່ອຍເຮັດ ຈົນປີ 4 ກໍຍັງບໍ່ລົງມື ສຸດທ້າຍກໍກາຍເປັນຄົນຂາດປະສົບການ. ບັນດິດທີ່ຫາຈົບໃໝ່ ປຽບດັ່ງພ້າທີ່ຍັງບໍ່ຜ່ານການຝົນ ແຕ່ກໍຖືກຫຼໍ່ຫຼອມຈົນແຫຼມຄົມພ້ອມໃຊ້ງານໄດ້, ຖ້າຊ່ວງໄລຍະທີ່ຮຽນຢູ່ນັ້ນຕັ້ງໜ້າພັດທະນາຕົນເອງ ແລະ ການຊອກຫາປະສົບການ, ສ້າງຜົນງານໃຫ້ເຫັນເປັນຮູບປະທຳຫຼາຍເທົ່າທີ່ຈະເຮັດໄດ້ ບໍ່ແມ່ນຮຽນເພື່ອໃຫ້ໄດ້ແຕ່ຄວາມຮູ້ເກັບໄວ້ໃນຫົວເພື່ອໃຊ້ມັນຫຼັງຮຽນຈົບ.

ຮຽນຈົບໃໝ່ຈະເອົາປະສົບການມາຈາກໃສ? ເຊິ່ງຄຳຕອບຂອງແຕ່ລະຄົນອາດຈະບໍ່ຄືກັນ, ມື້ນີ້ Inside Laos ໄດ້ນຳເອົາເທັກນິກການຊອກຫາປະສົບການໃຫ້ຕົນເອງຂອງ ນ້ອງຕາມົນ ເຮືອງມີໄຊ, ອະດີດນັກສຶກສາສື່ສານມວນຊົນ ມະຫາວິທະຍາໄລແຫ່ງຊາດ ມາແບ່ງປັນກັບທຸກຄົນ ເຊິ່ງນ້ອງບອກວ່າ “ປະສົບການຈະມີໄດ້ ກໍຕໍ່ເມື່ອເຮົາລົງມືເຮັດມັນ” ບໍ່ວ່າຈະເປັນ:

1. ການເປັນອາສາສະໝັກ

ທີ່ຕ້ອງເອົາໂຕເອງໄປໃຫ້ຄົນອື່ນໃຊ້, ບາງງານບໍ່ມີຄ່າແຮງ, ກິນເຂົ້າກ໋ອງກາງດິນ, ເຮັດວຽກຈົນຮອດຄໍ່າມືດຈືດຕາ ເພື່ອໃຫ້ໄດ້ມາເຊິ່ງປະສົບການ.

2. ຊ່ວຍວຽກວິຊາການ ຫຼື ກິດຈະກຳໂຮງຮຽນ

ສ່ວນໂຕແມ່ນບໍ່ເຄີຍປະຕິເສດທຸກກິດຈະກຳທີ່ທາງພາກ ຫລື ຄະນະມອບໃຫ້ ເຊັ່ນ: ການເປັນຄະນະຫ້ອງ, ເປັນປະທານນັກຮຽນ, ຮັບຜິດຊອບວຽກຊາວໜຸ່ມ..ເຂົ້າຮ່ວມງານປະຊຸມ, ກີລາ, ສິລະປະ, ສະແດງລະຄອນ….)

3. ການຝຶກງານ

ຊ່ວງຮຽນໄດ້ຝຶກງານ 2 ຄັ້ງເປັນປະສົບການຍອດຍິ່ງທີ່ໄດ້ລົງເຮັດວຽກຕົວຈິງ, ໄດ້ລົງເກັບກຳຂ່າວ, ຂຽນຂ່າວ ອອກໜ້າໜັງສືຈິງ ມີໂອກາດໄດ້ຮຽນຮູ້ວິທີການເຮັດວຽກຂອງສຳນັກງານໃຫຍ່ໆເຊັ່ນ ໜັງສືພິມຄວາມສະຫງົບ, ສະມາຄົມ ARMI (ສພປ) ແລະ ວິທະຍຸ FM 98,8 ແລະ ອື່ນໆ

4. ເຂົ້າຄອສສຳມະນາ ຫຼື ຝຶກອົບຮົມ

ທັງທາງພາກວິຊາຈັດສັນໃຫ້ເຊັ່ນ ຝຶກອົບຮົມການຂຽນບົດລະຄອນ- ຮູບເງົາສັ້ນ, ການເຮັດ Animation, ການຜະລິດສາລະຄະດີ-ຮູບເງົາສັ້ນ, Workshop ຕ່າງໆ ນອກນັ້ນຊອກຫາຮ່ວມຝຶກອົບຮົມພາຍນອກ : ຄອດພັດທະນາທັກສະການເວົ້າ, ການນຳສະເໜີ, ການຂາຍ…

5. ການເຮັດວຽກເສີມ

ເປັນສິ່ງທີ່ເຮັດໃຫ້ເຮົາໄດ້ທັງປະສົບການ ແລະ ເງິນໄປພ້ອມກັນ ຕອນນັ້ນວຽກທີ່ເຮັດກໍມີ ພະນັກງານຂາຍ, ພະນັກງານເສີບ, ຄູສອນ, ພິທີກອນ ຫຼື ວຽກອື່ນໆຕາມຄວາມສາມາດຂອງຕົນເອງ.

6. ການເຂົ້າຮ່ວມງານແຂ່ງຂັນ ຫຼື ທຶນແລກປ່ຽນ

ສະໝັກທຶນຫລາຍແຕ່ມີໂອກາດເຂົ້າຮ່ວມໜ້ອຍ ດີກວ່າບໍ່ສະໝັກເລີຍ ແລະ ກໍບໍ່ໄດ້ເຂົ້າຮ່ວມເລີຍ, ປະສົບການພາຍໃນສຳຄັນແຕ່ປະສົບທີ່ໄດ້ຈາກຕ່າງປະເທດຍິາງສຳຄັນກວ່າ ແລະ ຊ່ວຍໃຫ້ເຮົາຕື່ນ, ຢາກພັດທະນາໂຕເອງຫລາຍຂຶ້ນ.

ຍັງມີອີກຫຼາກຫຼາຍຢ່າງທີ່ເປັນປະສົບການໃຫ້ເຮົາໄດ້ ພຽງເຮົາລົງມືເຮັດມັນ ແລະ ຕ້ອງຫາໃສ່ຕົວກ່ອນທີ່ຈະຈົບເພື່ອສິ່ງຕ່າງໆນີ້ຈະສາມາດຢືນຢັນຄວາມສາດເຮົາໄດ້ໃນລະດັບໜຶ່ງ ແລະ ຄຳເວົ້າທີ່ມັກວ່າ ເດັກຈົບໃໝ່ຂາດປະສົບການກໍຈະຫຼຸດໜ້ອຍລົງ ຫລື ເກືອບຈະບໍ່ໄດ້ຍິນຄຳຖາມນີ້!

ຖ້າເຮົາລົງມືເຮັດແຕ່ຕອນຮຽນພໍຈົບມາກໍບໍ່ຍາກ ຫາວຽກໄດ້ທັນທີ ແຕ່ເຮົາກໍຕ້ອງແລກມັນມາດ້ວຍຄວາມເສຍສະຫຼະ ແລະ ຍອມເມື່ອຍໃນຊ່ວງທີ່ຮຽນ ເພື່ອສະບາຍໃນເວລາທີ່ຈົບ ດີກວ່າຈະສະບາຍລັ່ນລາເວລາຮຽນ ແລ້ວຫົວໜຸນວຽນເພາະຊອກວຽກບໍ່ໄດ້ຫຼັງຮຽນຈົບ.

More from author

Related posts

ຂໍຂອບໃຈນຳຜູ້ສະໜັບສະໜູນ

Latest posts

“ອົດອາຫານ” ບໍ່ຊ່ວຍໃຫ້ຫຼຸດນຳ້ໜັກ

ການອົດອາຫານນັ້ນ ສຳພັນກັບການຈຳກັດ ແຄລໍຣີ່ ຂອງອາຫານທີ່ເຮົາກິນໃນແຕ່ລະມື້, ການນັບ ແຄລໍຣີ່ ເປັນວິທີທີ່ໄດ້ຮັບຄວາມນິຍົມຫຼາຍ ຊຶ່ງມີທີມນັກວິໄຈດ້ານໂພຊະນາການ ໃນ ສະຫະລັດ ອາເມຣິກາ ໄດ້ລາຍງານລົງໃນວາລະສານ ການແພດ ເຈເອເອັມເອ (JAMA International Medicine) ເຖິງຜົນການລົງເລິກກວດຜູ້ໃຫຍ່ ທີ່ລະບຸວ່າ ອ້ວນເຖິງ 100 ຄົນ ໂດຍແບ່ງຈາກພຶດຕິກຳການກິນເປັນ 3 ກຸ່ມ ຊຶ່ງເປັນເວລາ 1 ປີ.

ຈົບມໍປາຍ ຈະຮຽນຕໍ່ສາຍໃດດີ?

ເມື່ອກ່ອນ ການສຶກສາຖືໄດ້ວ່າມີບັນຍາກາດຄຶກຄື້ນ ແລະ ເປັນຂະບວນການ ຫຼາຍຄົນແຂ່ງກັນຮຽນ ແຂ່ງກັນເສັງເພື່ອຈະໄດ້ເຂົ້າຮຽນສາຍທີ່ຕົນເອງມັກ ແຕ່ຕົກມາຍຸກປັດຈຸບັນນີ້ ດ້ວຍສະພາບເສດຖະກິດ ສະພາບແວດລ້ອມ ແລະ ຫຼາຍຢ່າງໃນສັງຄົມທີ່ຜັນແປໄປ ເດັກນ້ອຍສ່ວນໃຫຍ່ບໍ່ຢາກທີ່ຈະຮຽນຕໍ່, ບາງຄົນກໍຈຳເປັນຕ້ອງອອກໄປເຮັດວຽກເພື່ອຫາເງິນຊ່ວຍຄອບຄົວ, ຫຼາຍຄົນກໍອອກມາປະກອບກິດຈະການເຮັດທຸລະກິດ ເປັນນາຍຂອງຕົນເອງ ແຕ່ບໍ່ວ່າຈະຢ່າງໃດກໍຕາມ ຖ້າຄົນທີ່ມີເງືອນໄຂກໍຍັງສະໜັບສະໜູນໃຫ້ຮຽນຕໍ່ສາຍວິຊາຊີບໃຫ້ຈົບຈະເປັນການດີທີ່ສຸດ.

ຍຸກນີ້! ຕ້ອງອວດກັນປະຢັດ

ເມື່ອສັງຄົມເຮົາກ້າວເຂົ້າສູ່ຍຸກທີ່ເຂົ້າຍາກມາກແພງ ຫຼາຍຄົນ “ຫາເຊົ້າກິນເຊົ້າ” ບໍ່ແມ່ນ “ຫາເຊົ້າກິນຄໍ່າ” ຄືແຕ່ກ່ອນແລ້ວ ເຄື່ອງໃຊ້ຂອງສອຍຕ່າງໆ ກໍລ້ວນແຕ່ລາຄາສູງຂຶ້ນເທົ່າຕົວ, ເຮົາຍັງຈະພາກັນມາອວດລວຍໂຊລົດສະນິຍົມດີໆ ໃຊ້ຂອງແພງໆ ກິນອາຫານຫຼູຫຼາ ຕາມຄົນມີລາຍຮັບທີ່ໝັ່ນຄົງ ຫຼື ຄົນຮັ່ງມີບໍ່ໄດ້ແລ້ວ