ຍອມຮັບວ່າຊ່ວງໄວໜຸ່ມເປັນຊ່ວງເວລາທີ່ຫຼາຍຄົນຕ້ອງພົບຫຼາຍບັນຫາ ຄວາມກົດດັນ ຄວາມເມື່ອຍລ້າຈາກວຽກງານ ຄວາມຮັກ ແລະ ການໃຊ້ຊີວິດ ໜັກກວ່າໝູ່ກໍອາດຈະແມ່ນຄວາມກົດດັນຈາກວຽກງານລອງມາສັງເກດເບິ່ງ 5 ບັນຫາສຸຂະພາບຈິດຕໍ່ໄປນີ້ວ່າ ເຈົ້າ ຫຼື ຄົນອ້ອມຂ້າງພົບບັນຫານີ້ຢູ່ ຫຼືບໍ?
- ມີຄວາມຄຽດ ກັັງວົນແບບສະສົມ
ຈາກທີ່ເຮົາຕ້ອງເຮັດວຽກກັນມື້ໜຶ່ງຫຼາຍຊົ່ວໂມງ ເດືອນໜຶ່ງຫຼາຍອາທິດ ແລະ ປີໜຶ່ງກໍຫຼາຍເດືອນ ແຕ່ລະມື້ແນ່ນອນວ່າຈະຕ້ອງມີຫຼາຍບັນຫາເຂົ້າມາ ບາງຄົນກໍສາມາດຜ່ານມັນມາໄດ້ ແຕ່ບາງຄົກໍເອົາບັນຫານັ້ນມາກົດດັນຕົນເອງຈົນພາໃຫ້ທຸກໃຈ ເກີດອາການ ນອນບໍ່ຄ່ອຍຫຼັບ, ພຶດຕິກຳການໃຊ້ຊີວິດປ່ຽນໄປ, ເສົ້າໝອງ, ເບື່ອໜ່າຍຕໍ່ຊີວິດ ຖ້າໃຜມີອາການລັກສະນະນີ້ຮີບປັບວີທີການໃຊ້ຊີວິດ ວິທີການຄິດໃຫ້ດີຂຶ້ນ ເພາະຖ້າປ່ອຍໃຫ້ມັນເປັນໄລຍະເວລາດົນອາດຈະເກີດໂລກແຊກຊ້ອນອື່ນໆຕາມມາໄດ້.
- ພາວະໝົດໄຟໃນການເຮັດວຽກ Burnout syndrome
ໄວໜຸ່ມຍຸກໃໝ່ຈະພົບບັນຫານີ້ຫຼາຍທີ່ສຸດເພາະເປັນໄວທີ່ມີໄຟແຮງໃນການເຮັດສິ່ງຕ່າງໆ ແຕ່ຖ້າເຮັດສິ່ງໃດຊໍ້າໆ ຫຼື ເຮັດວຽກທີ່ໜັກຈົນເກີນກຳລັງຕົນເອງ ກົດດັນ, ເມື່ອຍ ຈົນສະພາບຈິດໃຈບໍ່ດີ ແບບນີ້ກໍສົ່ງຜົນໃຫ້ເກີດການເບື່ອວຽກທີ່ເຮັດຢາກລາອອກ ຢາກປ່ຽນວຽກ ຫຼື ບາງຄົນກໍບໍ່ຢາກເຮັດຫຍັງເລີຍ.
- ພາວະຂາດຄວາມພືງພໍໃຈຕໍ່ຕົນເອງ
ເຄີຍເປັນບໍທີ່ຮູ້ສຶກເສົ້າໃຈກັບຕົນເອງ, ບໍ່ພໍໃຈກັບການຕັດສິນໃຈຕົນເອງໃນຫຼາຍໆຄັ້ງ ຮູ້ສຶກວ່າເຮັດຫຍັງກະຍັງດີບໍ່ພໍ ຫາແຕ່ຂໍ້ເສຍໃຫ້ຕົນເອງ ເບິ່ງໂລກໃນແງ່ລົບ ບາງຄັ້ງກໍຮູ້ສຶກນ້ອຍໃຈຕົນເອງ ວິຕົກກັງວົນຈົນກ້າວໄປສູ່ການບໍ່ກ້າເຂົ້າສັງຄົມ, ບໍ່ກ້າປະຕິເສດຄົນອື່ນ ຫຼື ຂາດຈຸດຢືນຂອງຕົນເອງ.
- ກັງວົນຈົນ Panic : ເນື່ອງຈາກຄວາມຄຽດ ຄວາມກັງວົນທີ່ສະສົມຈົນເຮັດໃຫ້ລະບົບປະສາດທີ່ຄວບຄຸມສ່ວນຕ່າງໆໃນຮ່າງກາຍເຮັດວຽກຜິດປົກກະຕິເຊັ່ນ: ຫົວໃຈເຕັ້ນແຮງ, ໃຈສັ່ນ, ເຫື່ອອອກຫຼາຍຜິດປົກກະຕິ, ຫາຍໃຈຫອບ, ວິນຫົວ ປວດຮາກ, ຕີນມືຊາ ບາງຄົນຮ້າຍແຮງຈົນເຖິງຂັ້ນຄວບຄຸມຕົນເອງບໍ່ໄດ້ໃນໄລຍະໃດໜຶ່ງ.
- ພາວະຊຶມເສົ້າ
ເປັນອີກພາວະທີ່ພົບເຫັນຫຼາຍທີ່ສຸດ ຄົນທີ່ປະເຊິີນກັບພາວະນີ້ບໍ່ໄດ້ໝາຍຄວາມວ່າເຂົາເປັນຄົນອ່ອນແອ່ ຫຼື ໄຮ້ຄວາມສາມາດແຕ່ຍ້ອນຄວາມກົົດດັນ ຄວາມທຸກໃຈ ສະພາບແວດລ້ອມ ຄົນອ້ອມຂ້າງ ລ້ວນແຕ່ມີຜົນສົ່ງໃຫ້ມີພາວະຊຶມເສົ້າໄດ້ເຊັ່ນມີອາການ: ເສົ້າໝອງ, ຫົດຫູ່, ເບື່ອໜ່າຍຕໍ່ທຸກສິ່ງຢ່າງໃນຊີວິດ, ມັກຢູ່ຄົນດຽວຈົນຜິດປົກກະຕິ ຮ້າຍແຮງອາດເຖິງຂັ້ນຄິດຈະທຳຮ້າຍຕົນເອງ.
ຖ້າສັງເກດເບິ່ງແລ້ວມີອາການດັ່ງຂ້າງເທິງຄວນປັບໂຕໃຫ້ໄວຢ່າໃຫ້ຕົນເອງຢູ່ກັບສະພາວະແບບນີ້ດົນເກີນໄປ ຈັດເວລາການເຮັດວຽກໃຫ້ດີ ໃຫ້ຕົນເອງມີເວລາພັກຜ່ອນ, ອອກກຳລັງກາຍ, ກິນອາຫານທີ່ແຊບ, ເດີນທາງໄປຍັງສະຖານທີ່ທີ່ຢາກໄປເພື່ອປັບສະພາບອາລົມ, ມື້ໃດຮູ້ສຶກວ່າເມື່ອຍ ບໍ່ໄຫວໃຫ້ຍອມຮັບມັນ ຢ່າກົດທັບມັນໄວ້ ແລ້ວບອກວ່າ ຂ້ອຍໄຫວ ຂ້ອຍໄຫວ ກັບມາຟັງສຽງໃຈຕົນເອງຫຼາຍຂຶ້ນ ເຮົາບໍ່ສາມາດຫ້າມບໍ່ໃຫ້ສະພາວະເຫຼົ່ານີ້ເກີດຂຶ້ນ ແຕ່ເຮົາສາມາດເຂົ້າໃຈ ແລະ ຮັບມືກັບມັນໄດ້.
