ກອງປະຊຸມເປີດກວ້າງຄົບຄະນະບໍລິຫານງານພັກ ເມືອງຈັນທະບູລີ ນະຄອນຫຼວງວຽງຈັນ (ນວ) ຄັ້ງທີ 22 ສະໄໝທີ VI ຮ່ວມກັບອົງການປົກຄອງ ປະຈຳ 6 ເດືອນຕົ້ນປີ 2019 ຈັດຂຶ້ນໂດຍເປັນປະທານຂອງສະຫາຍນາງ ບົວລອນ ວົງດາລາແສນ ຄະນະພັກ ນວ ເລຂາຄະນະພັກເມືອງ ເຈົ້າເມືອງຈັນທະບູລີ ມີສະຫາຍ ອານຸພາບ ຕຸນາລົມ ຮອງເລຂາຄະນະພັກ ປະທານສະພາປະຊາຊົນ ນວ ພ້ອມດ້ວຍຮອງເລຂາພັກເມືອງ ຄະນະປະຈຳ ແລະ ພາກສ່ວນກ່ຽວຂ້ອງເຂົ້າຮ່ວມ.
ສະຫາຍນາງ ບົວລອນ ວົງດາລາແສນ ກ່າວວ່າ:
ໄລຍະຜ່ານມາສະມາຊິກພັກ ພະນັກງານ ແລະ ປະຊາຊົນບັນດາເຜົ່າທົ່ວເມືອງຈັນທະບູລີ ແມ່ນມີແນວຄິດທຸ່ນທ່ຽງ ອຸ່ນອ່ຽນ ມີຄວາມເຊື່ອໝັ້ນຕໍ່ແນວທາງການນຳຂອງພັກ-ລັດ ມີຄວາມຕື່ນຕົວສູງ ເປັນເຈົ້າການປະກອບສ່ວນທຸກຂົງເຂດວຽກງານ ສະມາຊິກພັກມີການຂະຫຍາຍຕົວ ແລະ ຮັກສາຄຸນທາດການເມືອງໜັກແໜ້ນ ສັງຄົມມີຄວາມສະຫງົບ ເປັນລະບຽບຮຽບຮ້ອຍ ການທຳມາຫາກິນ ຄ້າຂາຍຖືກຕ້ອງຕາມລະບຽບກົດໝາຍ ປາກົດການຫຍໍ້ທໍ້ໃນສັງຄົມ ການມ້າງຈຸດມົ້ວສຸມຕ່າງໆໄດ້ຮັບການແກ້ໄຂທັນການ ພື້ນຖານໂຄງລ່າງໄດ້ສືບຕໍ່ພັດທະນາ ການລົງທຶນພາກລັດ ແລະ ເອກະຊົນເພີ່ມຂຶ້ນ ການປຸກສ້າງຕ່າງໆເຂົ້າສູ່ລະບົບກົດໝາຍ ການເກັບລາຍຮັບເຂົ້າງົບປະມານແຫ່ງລັດມີຜົນງານດີເດັ່ນ ສະຖານທີ່ແອອັດ ການຈອດລົດຊະຊາຍ ແລະ ຄວາມບໍ່ເປັນລະບຽບຮຽບຮ້ອຍໄດ້ຮັບການແກ້ໄຂຢ່າງຕໍ່ເນື່ອງ ສະຖານທີ່ທ່ອງທ່ຽວທຳມະຊາດແຄມຂອງ ເຂດປະຕິສັງຂອນ ວັດວາອາຣາມໄດ້ຮັບການບູລະນະດີຂຶ້ນ ການສອບເສັງເລື່ອນຊັ້ນ-ຈົບຊັ້ນໄດ້ຕາມແຜນການ ແມ່ຍິງ ແລະ ເດັກນ້ອຍໄດ້ຮັບການສັກຢາ ແລະ ຢອດຢາຢ່າງທົ່ວເຖິງ ພ້ອມນີ້ ພະນັກງານບຳນານ ແລະ ເສຍອົງຄະໄດ້ຮັບນະໂຍບາຍຕາມລະບຽບການ.
6 ເດືອນຜ່ານມາ ຄະນະພັກ ອົງການປົກຄອງແຕ່ລະຂັ້ນ ໄດ້ເພີ່ມທະວີການຊຸກຍູ້ບັນດາຫົວໜ່ວຍທຸລະກິດ ປະຊາຊົນເອົາໃຈໃສ່ຜະລິດເປັນສິນຄ້າ ການບໍລິການ ການຄ້າ ການປຸງແຕ່ງ ແລະ ປະກອບອາຊີບອື່ນໆ ທີ່ບໍ່ຜິດຕໍ່ລະບຽບກົດໝາຍ ແລະ ມີລັກສະນະຂະຫຍາຍຕົວເພີ່ມຂຶ້ນຢ່າງຕໍ່ເນື່ອງ ການເກັບລາຍຮັບ ແລະ ຄຸ້ມຄອງລາຍຈ່າຍ ໂດຍຜ່ານລະບົບເອເລັກໂຕຣນິກ ເຊິ່ງມາຮອດວັນທີ 30 ມິຖຸນາ 2019 ປະຕິບັດໄດ້ 39,5 ຕື້ກວ່າກີບ ເທົ່າກັບ 53,08% ຂອງແຜນການປີ ທຽບໃສ່ໄລຍະດຽວກັນຂອງປີຜ່ານມາ ເພີ່ມຂຶ້ນ 5,1 ຕື້ກວ່າກີບ ເທົ່າກັບ 6,02% ສ່ວນລາຍຈ່າຍ 1,8 ຕື້ກວ່າກີບ.
ນອກນີ້ ຍັງໄດ້ສຸມກຳລັງເຂົ້າຮ່ວມທຸກຂະບວນການ ລົງກໍ່ສ້າງຮາກຖານ ແລະ ເຮັດວຽກງານ ຕ້ານ ສະກັດກັ້ນ ແກ້ໄຂປາກົດການຫຍໍ້ທໍ້ໃນສັງຄົມຢ່າງກວ້າງຂວາງ ສາມາດຮັກສາໄດ້ສະຖຽນລະພາບດ້ານການເມືອງຢ່າງໜັກແໜ້ນ ສັງຄົມມີຄວາມສະຫງົບ ເປັນລະບຽບຮຽບຮ້ອຍ ແລະ ປອດໄພໂດຍພື້ນຖານ 6 ເດືອນຜ່ານມາມີປາກົດການຫຍໍ້ທໍ້ເກີດຂຶ້ນ 148 ເລື່ອງ ແກ້ໄຂໄດ້ 66 ເລື່ອງ ກັກຜູ້ຕ້ອງຫາ 92 ຄົນ ຜົນເສຍຫາຍ ລົດໃຫຍ່ 6 ຄັນ ລົດຈັກ 50 ຄັນ ຄຳຮູບປະພັນ 14 ບາດ ເງິນ 85 ລ້ານກີບ 285.000 ບາດ 14.000 ໂດລາສະຫະລັດ ແລະ ເຄື່ອງຈຳນວນໜຶ່ງ ໃນນີ້ ສາມາດກູ້ຄືນມາໄດ້ລົດໃຫຍ່ 4 ຄັນ ລົດຈັກ 15 ຄັນ ເງິນ-ຄຳຮູບປະພັນ ແລະ ເຄື່ອງຈຳນວນໜຶ່ງ ແກ້ໄຂຄະດີຢາເສບຕິດ 63 ລາຍ ກັກຕົວ 126 ຄົນ ຢຶດຂອງກາງຢາບ້າ 6.588 ເມັດ ຢາໄອສ໌ 33,9 ກຣາມ ມ້າງຈຸດມົ້ວສຸມ 3 ຈຸດ ກັກຕົວ 30 ຄົນ.
ກອງປະຊຸມຄັ້ງນີ້ ໄດ້ຮັບຮອງເອົາແຜນວຽກຈຸດສຸມ 6 ເດືອນທ້າຍປີ 2019 ຄື:
ຂົງເຂດວຽກງານການເມືອງ ການປ້ອງກັນຊາດ-ປ້ອງກັນຄວາມສະຫງົບ ເສດຖະກິດ ວັດທະນະທຳ-ສັງຄົມ ການຄຸ້ມຄອງ ແລະ ບໍລິຫານລັດ ແລະ ການພົວພັນເມືອງແຮກສ່ຽວພາຍໃນ ແລະ ຕ່າງປະເທດ ຕື່ມອີກ.
ແຫຼ່ງຂໍ້ມູນ: ໜັງສືພິມວຽງຈັນໃໝ່