ທະນາຄານ ອຸດສາຫະກໍາ ແລະ ການຄ້າຈີນ ຈໍາກັດ ສາຂານະຄອນຫຼວງວຽງຈັນ ຫຼື ທະນາຄານ ໄອຊີບີຊີ (ICBC ) ມອບຄອມພິວເຕີ 33 ຊຸດ ໃຫ້ໂຮງຮຽນ 11 ແຫ່ງໃນນະຄອນຫຼວງວຽງຈັນ ເພື່ອປະກອບສ່ວນພັດທະນາວຽກງານການສຶກສາຢູ່ໃນ ສປປ ລາວ.
ພິທີມອບຮັບຄອມພິວເຕີ ຈໍານວນ 33 ຊຸດ ໃຫ້ໂຮງຮຽນປະຖົມ ແລະ ມັດທະຍົມສຶກສາ 11 ແຫ່ງໃນນະຄອນ ຫຼວງວຽງຈັນ ມີຂຶ້ນໃນວັນທີ 27 ສິງຫາ 2019, ທີ່ພະແນກສຶກສາທິການ ແລະ ກິລາ ນະຄອນຫຼວງວຽງຈັນ ໂດຍໃຫ້ກຽດມອບຂອງທ່ານ ຊຸນ ເຟີ້ງ ເລິ ຜູ້ອຳນວຍການທະນາຄານ ໄອຊີບີຊີ (ICBC) ແລະ ໃຫ້ກຽດຕາງໜ້າຮັບແມ່ນທ່ານ ບົວລານ ສິລິປັນຍາ ຮອງລັດຖະມົນຕີ ກະຊວງສຶກສາທິການ ແລະ ກິລາ ເຊິ່ງເຂົ້າຮ່ວມເປັນສັກຂີພິຍາມມີທ່ານ ຊົມພູ ແກ້ວປັນຍາ ຫົວໜ້າພະແນກສຶກສາທິການ ແລະ ກິລານະຄອນຫຼວງວຽງຈັນ ພ້ອມດ້ວຍພະນັກງານທະນາຄານ ໄອຊີບີຊີ ແລະ ຕາງໜ້າຈາກໂຮງຮຽນ 11 ແຫ່ງເຂົ້າຮ່ວມ.
ສໍາລັບຄອມພິວເຕີ ທີ່ນໍາມາມອບຄັ້ງນີ້ ມີຄອມພິວເຕີຕັ້ງໂຕະ 30 ຊຸດ ແລະ ຄອມພິວເຕີ ໂນດບຸກ 3 ເຄື່ອງ ໂດຍມອບຜ່ານທາງກະຊວງສຶກສາທິການ ແລະ ກິລາ ເພື່ອມອບໃຫ້ພະແນກສຶກສາທິການ ແລະ ກິລານະຄອນຫຼວງວຽງຈັນ ມອບຕໍ່ໃຫ້ໂຮງຮຽນ 11 ແຫ່ງ ໃນກຸ່ມເປົ້າໝາຍທີ່ຂາດເຂີນຄອມພິວເຕີ ຮັບໃຊ້ການຮຽນການສອນ ກໍ່ຄື:
ໂຮງຮຽນມັດທະຍົມສົມບູນໂພນທອງ, ພວງໄຊ, ບ້ານໂດນ, ໝາກນາວ, ທ່າດິນແດງ, ນາຂ່າ, ມັດທະຍົມຕອນຕົ້ນ ບ້ານພ້າວ, ດອນສ້າງໄຜ່, ໜອງຍາວ, ຫົວນາ ແລະ ໂຮງຮຽນ ປະຖົມສົມບູນ ສີບຸນເຮືອງ.
ທະນາຄານໄອຊີບີຊີ ສ້າງຕັ້ງຂຶ້ນໃນປີ 2011, ບົນພື້ນຖານການໃຫ້ຄວາມຊ່ວຍເຫຼືອ ແລະ ສະໜັບສະໜູນ ຈາກສັງຄົມລາວໃນທຸກຂົງເຂດ ຂະນະທີ່ ທຸລະກຳຫຼາຍໆປະເພດຂອງທະນາຄານ ກໍ່ໄດ້ຮັບການຂະຫຍາຍຕົວຢ່າງຕໍ່ ເນື່ອງ ເພື່ອເປັນສ່ວນໜຶ່ງໃນການປະກອບສ່ວນເຂົ້າໃນວຽກງານສ້າງສາເສດ ຖະກິດຂອງປະເທດລາວໃຫ້ເຕີບໃຫຍ່ຂະຫຍາຍຕົວ ຈົນທະນະຄານດັ່ງກ່າວ ໄດ້ຮັບຫຼຽນໄຊແຮງງານຊັ້ນ 3 ແລະ ໃບຍ້ອງຍໍ ຈາກ ພະນະທ່ານ ບຸນຍັງ ວໍລະຈິດ ປະທານປະເທດແຫ່ງ ສປປ ລາວ.
ແນວໃດກໍ່ຕາມ ທະນາຄານ ໄອຊີບີຊີ ໄດ້ໃຫ້ຄວາມສຳຄັນເປັນຢ່າງຍິ່ງຕໍ່ການຊ່ວຍເຫຼືອສັງຄົມ,ເປັນຕົ້ນແມ່ນການຊ່ວຍເຫຼືອຜູ້ເຖົ້າ, ເດັກກໍ່າພ້າ, ຊ່ວຍເຫຼືອດ້ານການສຶກສາ, ຊ່ວຍເຫຼືອແກ້ໄຂຄວາມຫຍຸ້ງຍາກທາງດ້ານເສດ ຖະກິດ ແລະ ດ້ານອຸທຸກະໄພຕ່າງໆທີ່ເກີດຂຶ້ນ ໂດຍໃນເດືອນ ມັງກອນປີ 2019, ໄດ້ມອບອາຄານຮຽນຫຼັງໃໝ່ ພ້ອມທັງປະກອບອຸປະກອນເຄື່ອງຮຽນ, ໂຕະ, ຕັ່ງ, ກະດານດຳ, ໂຕະຫ້ອງການຄູອາຈານ ໃຫ້ແກ່ໂຮງຮຽນປະຖົມສົມບູນບ້ານຫົວຊຽງ ເມືອງໄຊທານີ ນະຄອນຫຼວງວຽງຈັນ ພ້ອມດ້ວຍຖົງປຶ້ມ, ບິກ ແລະ ສໍ ໃຫ້ແກ່ນ້ອງນັກຮຽນໝົດທຸກຄົນອີກດ້ວຍ.
ຂ່າວໂດຍ: ປາກກາໃຕ້. ສູນໂຄສະນາຂ່າວສານ ການສຶກສາ ແລະ ກິລາ