ທີ່ນະຄອນຫລວງວຽງຈັນ, ກົມອຸດສາຫະກຳ ແລະ ຫັດຖະກຳ, ກະຊວງອຸດສາ ຫະກຳ ແລະ ການຄ້າ ໄດ້ຈັດກອງປະຊຸມຫາລື ເພື່ອຜ່ານຮ່າງຂໍ້ຕົກລົງໃໝ່ ຂອງກະຊວງອຸດສາຫະກຳການຄ້າ ວ່າດ້ວຍການຄຸ້ມຄອງ ແລະ ຕິດຕາມໄມ້ສົ້ນເຂົ້າ ແລະ ສົ້ນອອກ ໃນຂະບວນການປຸງແຕ່ງ ແລະ ການຄ້າ, ໂດຍມີ ຕົວແທນຈາກຫ້ອງວ່າການສຳນັກງານນາຍົກລັດຖະມົນຕີ, ຫ້ອງການກວດກາລັດຖະບານ, ກະຊວງກະສິກຳ ແລະ ປ່າໄມ້, ກະຊວງການເງິນ ແລະ ບັນດາຕົວແທນຈາກພະແນກອຸດສາຫະກຳ ແລະ ການຄ້າແຂວງ ທົ່ວປະ ເທດເຂົ້າຮ່ວມ.
ທ່ານ ສົມຟອງ ສຸລິວັນ ຮອງຫົວໜ້າກົມອຸດສາຫະກຳ ແລະ ຫັດຖະກຳ, ກະຊວງອຸດສາຫະກຳ ແລະ ການຄ້າ ກ່າວວ່າ: ຂໍ້ຕົກລົງສະບັບນີ້, ແມ່ນບາດກ້າວໜຶ່ງທີ່ສຳຄັນ ໃນການເພີ່ມທະວີ ການຄວບຄຸມຕ່ອງໂສ້ການສະ ໜອງໄມ້ ໃນຂະແນໜງການປຸ່ງແຕ່ງໄມ້ ແລະ ການຄ້າໄມ້ ຢູ່ ສປປ ລາວ, ຄຽງຄູ່ກັນນັ້ນຍັງເປັນການປະຕິບັດ ແລະ ສົ່ງເສີມນະໂຍບາຍຂອງຄຳສັ່ງເລກທີ 15/ນຍ ວ່າດ້ວຍການເພີ່ມທະວີຄວາມເຂັ້ມງວດ ໃນການຄຸ້ມຄອງ ແລະ ກວດກາ ການຂຸດຄົ້ນໄມ້, ການເຄື່ອນຍ້າຍໄມ້ ແລະ ທຸລະກິດໄມ້, ເຊິ່ງລະບົບການຄວບຄຸມຕ່ອງໂສ້ການສະໜອງໄມ້ ແມ່ນຈະສະແດງໃຫ້ເຫັນແຫລ່ງທີ່ມາຂອງໄມ້ ແລະ ສາມາດຕິດຕາມໄດ້ ໂດຍການກວດສອບຜ່ານຜູ້ຄ້າໄມ້,ການເຄື່ອນຍ້າຍໄມ້ ແລະ ການປຸງແຕ່ງໄມ້ເພື່ອຮັບປະກັນວ່າ ຜະລິດຕະພັນທີ່ປຸງແຕ່ງຈາກໄມ້ ແມ່ນມີຄວາຖືກຕ້ອງຕາມກົດໝາຍຂອງ ສປປ ລາວ.
ທີ່ມາ: facebook.com/421087478095038