ນ້ອງອ້ອຍ ວົງພັກດີ ນັກກີລາປັນຈັກສີລັດທີມຊາດລາວ ໃຫ້ສຳພາດເມື່ອບໍ່ດົນມານີ້ວ່າ: ພາຍຫຼັງທີ່ໄດ້ຮັບຫຼຽນນາມະຍົດຢ່າງສົມກຽດ ກໍ່ຄື ຫຼຽນໄຊແຮງງານ ຊັ້ນ II ເມື່ອບໍ່ດົນມານີ້ ໄດ້ສົ່ງຜົນຢ່າງໃຫຍ່ຫຼວງໃຫ້ນ້ອງມີບົດບາດໃໝ່ ແລະ ທາງຄອບຄົວກໍ່ມີຊື່ສຽງ ເປັນທີ່ຮູ້ຈັກຂອງປະຊາຊົນຊາວລາວຢ່າງກວ້າງຂວາງ ນ້ອງຮູ້ສຶກເປັນກຽດ ແລະ ພາກພູມໃຈຢ່າງສູງທີ່ເຮັດໃຫ້ຊາວລາວ ໂດຍສະເພາະ ພໍ່ແມ່ ແລະ ຍາດພີ່ນ້ອງທຸກຄົນມີຄວາມສຸກ ທັງນີ້ກໍ່ຕ້ອງຂໍສະແດງຄວາມຮູ້ບຸນຄຸນມາຍັງສະຫະພັນກີລາປັນຈັກສີລັດແຫ່ງຊາດ ຄະນະຄູເຝິກ ແລະ ຜູ້ໃຫ້ການສະໜັບສະໜູນເຮັດໃຫ້ນ້ອງມີວັນນີ້.
ເພື່ອສືບຕໍ່ຮັກສາມູນເຊື້ອອັນດີງາມ ແລະ ເປັນແບບຢ່າງທີ່ດີໃຫ້ນ້ອງເຍົາວະຊົນ ໂດຍສະເພາະປຸກລະດົມໃຫ້ນັກກີລາປັນຈັກສີລັດເຍົາວະຊົນທີມຊາດຮຸ່ນສືບທອດ ມີກຳລັງໃຈເຝິກແອບເຮັດໃຫ້ເຂົາເຈົ້າມີຄວາມແຂງແກ່ນຂຶ້ນກວ່າເກົ່າ ເພື່ອສ້າງຜົນງານໃຫ້ໄດ້ຄືນ້ອງໃນເວທີສາກົນ ປີ 2019 ນ້ອງຈະເຝິກຝົນຫຼໍ່ຫຼອມຕົນເອງໃຫ້ມີຄວາມແຂງແກ່ນ ມີທັກສະ ແລະ ເຕັກນິກທີ່ດີ ໂດຍຈະນຳເອົາປະສົບການທີ່ຕົນສ້າງຜົນງານໃນປີ 2018 ມາຖອດຖອນບົດຮຽນ ຈະເຂົ້າຮ່ວມແຂ່ງຂັນລາຍການຕ່າງໆທີ່ສະຫະພັນປັນຈັກສີລັດແຫ່ງຊາດ ຈັດຕັ້ງວາງແຜນໃຫ້ເປົ້າໝາຍສຳຄັນ ທີ່ນ້ອງຢາກຈະເຮັດໃຫ້ໄດ້ຄືການຄວ້າຫຼຽນຄຳ ໃນງານມະຫະກຳກີລາຊີເກມ ຄັ້ງທີ 30 ຢູ່ປະເທດຟີລິບປິນ ໃນທ້າຍປີ 2019.
ປັດຈຸບັນນາງ ນ້ອງອ້ອຍ ວົງພັກດີ ສຶກສາຕໍ່ສາຍວິຊາຊີບ ຄະນະວິທະຍາສາດການກີລາ-ກາຍະກຳ ມະຫາວິທະຍາໄລແຫ່ງຊາດ ສາຂາວິຊາຮຽນຄູພະລະ ແລະ ໄດ້ເຝິກຊ້ອມທຸກໆມື້ ມື້ລະ 2 ຊົ່ວໂມງ ຢູ່ສະໂມສອນປັນຈັກສີລັດຮ່ອງສຸພາບ ແລະ ສະໂມສອນປັນຈັກສີລັດກອງທັບ ປີ 2018 ນາງ ນ້ອງອ້ອຍ ວົງພັກດີ ຍາດໄດ້ 1 ຫຼຽນເງິນ ຈາກງານກີລາເອຊຽນເກມ ຄັ້ງທີ 18 ຢູ່ປະເທດອິນໂດເນເຊຍ 2 ຫຼຽນທອງ ຈາກງານກີລາປັນຈັກສີລັດປຣີຊີເກມ ແລະ ງານກີລາປັນຈັກສີລັດຊີງແຊັມໂລກ ຢູ່ປະເທດສິງກະໂປ ສຳລັບແຜນເຄື່ອນໄຫວປີ 2019 ຈະເຂົ້າຮ່ວມແຂ່ງຂັນປັນຈັກສີລັດທົ່ວປະເທດ ຈະຈັດຂຶ້ນໃນເດືອນມີນາ ແລະ ງານກີລາປຣີຊີເກມ ຢູ່ປະເທດຟີລິບປິນ ເດືອນມິຖຸນາ.
ທີ່ມາ: ວຽງຈັນໃໝ່