ປະຫວັດສາດຂອງກອງທັບປະຊາຊົນລາວຜ່ານມາກວ່າເຄິ່ງສະຕະວັດ ເປັນປະຫວັດສາດແຫ່ງການຕໍ່ສູ້ທີ່ພິລະອາດຫານ ແລະ ບໍ່ຍອມຈຳນົນ ເພື່ອຕ້ານກັບສັດຕູພາຍນອກຜູ້ຮຸກຮານ ໂດຍປະ ຕິບັດແນວທາງການຕໍ່ຕ້ານທົ່ວປວງຊົນຮອບດ້ານ ແລະ ຍາວນານຂອງພັກເຮົາ ກອງກຳລັງປະກອບອາວຸດຕ່າງໆ ໄດ້ຫັນທິດເຄື່ອນໄຫວແຈກຢາຍລົງສູ່ຊົນນະບົດ ຂຶ້ນພູດອຍ ປຸກລະດົມປະຊາຊົນ ຕິດພັນກັບປະຊາຊົນດຳເນີນສົງຄາມກອງຫຼອນ ທັງກໍ່ສ້າງຮາກຖານການເມືອງໃນໝູ່ມະຫາຊົນ 20 ມັງກອນ 1949 ຢູ່ຖ້ຳແມຜາລອງ ເຂດລາວຮຸ່ງ ພຽງສາ ເມືອງຊຽງຄໍ້ ທ່ານ ໄກສອນ ພົມວິຫານ ໄດ້ປະກາດສ້າງຕັ້ງກອງລາດຊະວົງ ເຊິ່ງເປັນຕົ້ນກຳເນີດຂອງກອງທັບປະຊາຊົນລາວ ຈະຄົບ 70 ປີພໍດີ ໃນວັນທີ 20 ມັງກອນ 2019.
ການປະກາດສ້າງຕັ້ງກອງທັບປະຊາຊົນລາວ ໃນວັນທີ 20 ມັງກອນ 1949 ນັ້ນ ຖືເປັນເຫດ ການປະຫວັດສາດຂອງການປະຕິວັດ ແລະ ກອງກຳລັງປະກອບອາວຸດທີ່ຮັກຊາດ ເຊິ່ງສາມາດເວົ້າໄດ້ວ່າ ມັນແມ່ນບາດກ້າວກະໂດດທີ່ສຳຄັນໃນພາລະກິດຕໍ່ຕ້ານ ແລະ ຂະຫຍາຍໄຊຊະນະຂອງກຳລັງປະກອບອາວຸດປະຊາຊົນເຮົາ (ໜ້າ 28 ສ້າງປະເທດລາວເປັນປະເທດສັນຕິພາບ… 1978 ໄກສອນ ພົມວິຫານ).
ພາຍໃຕ້ການນຳພາຂອງພັກ ກຳລັງປະກອບອາວຸດປະຊາຊົນຍາມໃດກໍ່ກຳປືນແໜ້ນຢູ່ສະເໝີ ທັງຫ້າວຫັນກ້າວຂຶ້ນກໍ່ສ້າງໃຫ້ເປັນກອງທັບມີແບບແຜນ ແລະ ທັນສະໄໝເປັນກ້າວໆ ທັງກຽມ ພ້ອມສູ້ຮົບ… ພ້ອມນັ້ນ ກໍ່ອອກແຮງເຂົ້າຮ່ວມສ້າງສາປະເທດຊາດ ປະກອບສ່ວນສຳຄັນໃນການປົກປັກຮັກສາເອກະລາດ ອະທິປະໄຕ ປົກປັກຮັກສາລັດປະຕິວັດ ແລະ ການອອກແຮງງານໃນສັນຕິພາບຂອງປະຊາຊົນ (ຄຳໄຕ ສີພັນດອນ ບົດ ຮຽນຄັດຈ້ອນດ້ານການທະຫານ 1986 ໜ້າ 140) ດັ່ງນັ້ນ 70 ປີກອງທັບປະຊາຊົນລາວທີ່ຜ່ານມາໃນອະດີດ ຈຶ່ງສາມາດເວົ້າໄດ້ວ່າ ເປັນກອງທັບຜ່ານແປວໄຟສົງຄາມ ແລະ ປົກປັກຮັກສາປະເທດຊາດ ເຊິ່ງຍຸດທະສາດຂອງກອງທັບແຕ່ລະໄລຍະນັ້ນ ແມ່ນໄດ້ກຳນົດໜ້າທີ່ແຕກຕ່າງກັນ ຂຶ້ນກັບເງື່ອນ ໄຂສິ່ງແວດລ້ອມຂອງສັງຄົມ ເຊັ່ນ: ປີ 1954 ກະ ຊວງປ້ອງກັນປະເທດຂອງລັດຖະບານລາວຕໍ່ຕ້ານ ໂດຍແມ່ນທ່ານ ໄກສອນ ພົມວິຫານ ເປັນລັດ ຖະມົນຕີ ໄດ້ເປີດກອງປະຊຸມການທະຫານຢູ່ເມືອງໂສຍ ແຂວງຫົວພັນ ໄດ້ວາງໜ້າທີ່ອອກວ່າ: ຕັ້ງ ໜ້າອອກແຮງປັບປຸງກໍ່ສ້າງກຳລັງປະກອບອາວຸດລາວອິດສະຫຼະໃຫ້ກາຍເປັນກອງທະຫານປະຕິວັດທີ່ເຂັ້ມແຂງ ມີຄວາມສາມາດຢ່າງພຽງພໍ… ໃນຍາວນານ ກອງທັບພວກເຮົາຈະກາຍເປັນເສົາຄ້ຳໃຫ້ແກ່ການປະກອບອາວຸດທົ່ວປວງຊົນ ເພື່ອດຳ ເນີນສົງຄາມປົດປ່ອຍປະເທດຊາດຢ່າງສົມບູນ… ກອງທັບປະຊາຊົນລາວ ມີທັງຫັນທິດການຕໍ່ສູ້ທາງດ້ານການທະຫານ ປະສົມກັບການເມືອງ (19591963) ແລະ ຕໍ່ຕ້ານສົງຄາມພິເສດ 19631968 ຕໍ່ສູ້ປົກປັກຮັກສາສັນຕິພາບ ຄວາມຖືກຕ້ອງປອງດອງຊາດ 19731975 ກໍ່ສ້າງກອງທັບປະຊາຊົນລາວເປັນກອງທັບປະຕິວັດ ມີລະບຽບແບບແຜນ ກ້າວຂຶ້ນທັນສະໄໝ ເຮັດສຳເລັດໜ້າທີ່ຍຸດທະສາດ ຄື: ປົກປັກຮັກສາ ແລະ ສ້າງສາປະເທດຊາດ 19761995 (ປະຫວັດສາດກອງທັບປະຊາຊົນລາວ 19452009).
70 ປີ ກອງທັບປະຊາຊົນລາວ ເປັນເວລາຫຼາຍກວ່າເຄິ່ງສະຕະວັດ ກອງທັບໄດ້ຜູກພັນຕໍ່ສູ້ກັບປະ ຊາຊົນບັນດາເຜົ່າທົ່ວປະເທດ ໄດ້ປະສານສົມທົບຮູບແບບຫຼາຍວິທີ ຈຶ່ງໄດ້ຮັບໄຊຊະນະ ພວກເຮົາຍິ່ງທະນົງໃຈ ເຫັນໄດ້ມູນເຊື້ອການຕໍ່ສູ້ກ້າຫານ ແລະ ບໍ່ຍອມຈຳນົນ.
ທີ່ມາ: ວຽງຈັນໃໝ່