ທ່ານເຄີຍເປັນບໍ່ວ່າ ໃນແຕ່ລະມື້ທີ່ມາວຽກ ຈະມັກມີອາການເພຍໆ, ບໍ່ສົດຊື່ນ ຫຼັງຈາກທີ່ນັ່ງເຮັດວຽກໄປໄລຍະໜຶ່ງ ຄ້າຍໆ ຄືກັບຄົນທີ່ພັກຜ່ອນບໍ່ພຽງພໍ ທັ້ງໆ ທີ່ເຮົາກໍນອນຫຼັບພຽງພໍແລ້ວ ແລະ ກໍກິນອາຫານທີ່ມີປະໂຫຍດປະຈຳ ແຕ່ເປັນຫຍັງຄືຍັງເປັນຢູ່. ເຊິ່ງສິ່ງທີ່ທ່ານເປັນຢູ່ນັ້ນອາດເປັນເພາະທ່ານເຮັດບໍ່ຖືກວິທີ ຫຼື ບໍ່ສົມດຸນ ສະນັ້ນ, ທ່ານຄວນລອງເຮັດວິທີຕໍ່ໄປນີ້ ອາດຈະເຮັດໃຫ້ທ່ານ ສົດຊື່ນໄດ້ໝົດມື້.
- ເລີ່ມຕົ້ນດ້ວຍການຍ່າງໄປກົດເອົານຳ້ຈອກໃຫຍ່ມາດື່ມ ເພື່ອໃຫ້ຊື່ນໃຈ ເຊິ່ງການດື່ມນຳ້ນັ້ນ ຈະເປັນການຕື່ມນຳ້ໃຫ້ຮ່າງກາຍ ຫຼັງຈາກຮ່າງກາຍເຮົາພັກຜ່ອນໝົດຄືນ ແລະ ເປັນອີກວິທີໜຶ່ງທີ່ຊ່ວຍໃຫ້ສະໝອງຂອງທ່ານປອດໂປ່ງ.
- ໃຊ້ເວລາປະມານ 5-10 ນາທີ ອອກກຳລັງກາຍ ຢືດເສັ້ນ, ຢືດເອັນ ແລະ ກ້າມຊີ້ນພາກສ່ວນຕ່າງໆ ພາຍໃນຮ່າງກາຍໃຫ້ຫ້າວຫັນຂຶ້ນ. ວິທີນີ້ ຈະຄືກັບວິທີບິດຄີງຂີ້ຄ້ານໃນຕອນເຊົ້າ, ແຕ່ເປັນການເຮັດຈິງຈັງຫຼາຍຂຶ້ນ ໂດຍການເນັ້ນການຢືດພາກສ່ວນທີ່ຕ້ອງການໃຊ້ເລື້ອຍໆ ໃນການເຮັດວຽກ ເຊັ່ນ: ຖ້າໃນຕຳແໜ່ງເຮັດວຽກຂອງທ່ານຕ້ອງຍ່າງຢູ່ຕະຫຼອດ ຕ້ອງຫາທ່າທາງທີ່ຢືດພາກສ່ວນໜ້າແຄ່ງ ແລະ ສົ້ນນ່ອງ ຫຼື ທ່ານໃຊ້ຄອມພີວເຕີ ເຮັດວຽກໝົດມື້ ຄວນເນັ້ນໃນການອອກກຳລັງກາຍພາກສ່ວນກ້າມຊີ້ນບໍລິເວນຄໍ, ບ່າໄຫຼ່, ແຂນ ແລະ ຂາ.
- ກິນອາຫານປະເພດທັນຍາພືດ ແລະ ອາຫານທີ່ມີໂປຣຕິນ ໃນຕອນເຊົ້າ, ຫຼຸດອາຫານຈຳພວກແປ້ງ ເຊິ່ງການກິນອາຫານໃນຕອນເຊົ້ານັ້ນ ມີປະໂຫຍດຕໍ່ຮ່າງກາຍ ເປັນການກຽມຄວາມພ້ອມໃຫ້ຮ່າງກາຍເຮັດວຽກ ຢ່າງມີປະສິດທິຜົນໝົດມື້.
- ການປ່ຽນເຄື່ອງດື່ມ ຄື ເຊົາດື່ມກາເຟ ແລ້ວຫັນມາດື່ມຊາຂິງແທນ ຈະຊ່ວຍໃຫ້ການໄຫຼວຽນຂອງເລືອດເຮັດວຽກດີຂຶ້ນ, ເຮັດໃຫ້ຮ່າງກາຍອົບອຸ່ນ ພ້ອມທັງຊ່ວຍໃຫ້ລະບົບການຍ່ອຍອາຫານເຮັດວຽກໄດ້ດີຂຶ້ນ.