ສະພາບອາກາດຊ່ວງນີ້ ຖືວ່າເປັນຊ່ວງທີ່ຮ້ອນທີ່ສຸດ ຄົນສ່ວນຫຼາຍຈະພັກຜ່ອນ ແລະ ເຮັດວຽກຢູ່ໃນຫ້ອງແອ ເມື່ອອອກໄປພາຍນອກອາຄານກໍຈະຮູ້ສຶກຮ້ອນ ແລະ ມີເຫື່ອອອກງ່າຍ ເຊິ່ງເປັນສາເຫດໃຫ້ຄົນສ່ວນຫຼາຍເຈັບປ່ວຍໄດ້ງ່າຍຂຶ້ນ.
ຫຼາຍໆ ຄົນອາດຈະເຄີຍປະສົບກັບເຫດການແບບນີ້ ໂດຍສະເພາຄົນທີ່ເຮັດວຽກຢູ່ໃນຫ້ອງແອ ແລະ ມີການອອກ ເຂົ້າ-ອອກເປັນເວລາຫຼາຍຄັ້ງຕໍ່ມື້ ເຊິ່ງເຮັດໃຫ້ຮ່າງກາຍປະສົບກັບການປ່ຽນແປງອຸນຫະພູມຢ່າງກະທັນຫັນ ບາງຄັ້ງຮ່າງກາຍກໍຍາກທີ່ຈະປັບໂຕ ຈຶ່ງສົ່ງຜົນໃຫ້ເກີດມີອາການເຈັບຫົວ, ເກີດມີຄວາມຜິດປົກກະຕິຕໍ່ລະບົບຫາຍໃຈ, ພູມຄຸ້ມກັນຕໍ່າ ແລະ ເປັນສາເຫດຫຼັກຂອງການເປັນໄຂ້ຫວັດ.
ດ້ວຍເຫດນີ້ຫຼາຍໆບ່ອນຈຶ່ງມີແນວຄິດສ້າງພື້ນທີ່ໃນການປັບໂຕລະຫວ່າງທາງຍ່າງພາຍນອກ ແລະ ພາຍໃນອາຄານ ເພື່ອໃຫ້ຄົນທີ່ຢູ່ພາຍນອກ ແລະ ພາຍໃນອາຄານໄດ້ມີພື້ນທີ່ໃນການຊ່ວຍໃຫ້ຮ່າງກາຍສາມາດປັບໂຕຕໍ່ກັບສະພາບອາກາດທີ່ແຕກຕ່າງກັນ. ເຖິງຢ່າງໃດກໍຕາມແນວຄວາມຄິດດັ່ງກ່າວນີ້ຍັງຖືກປ່ອຍປະລະເລີຍຈາກຫ້ອງການ ຫຼື ສຳນັກງານຂະໜາດນ້ອຍ ເນື່ອງຈາກມີພື້ນທີ່ຂ້ອນຂ້າງຈຳກັດ.
ດັ່ງນັ້ນ, ຖ້າຫາກທ່ານເປັນຄົນໜຶ່ງທີ່ໄດ້ຮັບຜົນກະທົບຈາກການປ່ຽນແປງອຸນຫະພູມກະທັນຫັນຄືກັບເຫດການທີ່ກ່າວມາຂ້າເທິງນີ້ ກ່ອນທີ່ຈະເຂົ້າຫ້ອງການຫຼື ສຳນັກງານ ຄວນຫາບ່ອນຮົ່ມເພື່ອຢຸດພັກໃຫ້ຮ່າງກາຍໄດ້ປັບໂຕ ຫຼື ໃສ່ເສື້ອກັນໜາວເມື່ອເຂົ້າໄປໃນຫ້ອງແອ ເພື່ອປ້ອງກັນອາກາດເຢັນຈາກແອທີ່ກະທົບຮ່າງກາຍໂດຍກົງ ເຊິ່ງວິທີນີ້ກໍສາມາດຊ່ວຍໄດ້ໃນລະດັບໜຶ່ງ.
#ອິນໄຊລາວ #insideLaos ສາລະດີໆ ມີຢູ່ບ່ອນນີ້.