ວັດວິຊຸນນະຣາດ ເປັນວັດທີ່ເກົ່າແກ່ໃນຫຼວງພະບາງ ສ້າງຕັ້ງຂຶ້ນໃນປີ 1512 ໃນສະໄໝຂອງ ເຈົ້າຊີວິດວິຊຸນນະລາດ (1501-1520) ໂຄງຫຼັງຄາມີສອງຊັ້ນ, ເປັນຊົງສິລະປະແບບຊາວພວນ, ມີ 12 ເສົາ, ລວງສູງ 30 ແມັດ. ໃນຂອບເຂດວັດວິຊຸນມີສະຖາປັດຕິຍະກໍາທີ່ລະອຽດອ່ອນທີ່ຊົງຄຸນຄ່າ ແລະ ງົດງາມ.
ທິດຕາເວັນ ອອກສ່ຽງເໜືອມີທາດປະທຸມ (ດອກບົວ) 1 ລູກ, ຊາວບ້ານເອີ້ນວ່າ: ທາດໝາກໂມ ເພາະຄືມາກໂມຕັດເຄິ່ງ. ສິມຂອງວັດ ກໍ່ດ້ວຍດິນຈີ່, ມີສະຖາປັດຕິຍະກໍາທີ່ລະອຽດອ່ອນ ແລະ ສວຍ ງາມ ມີສຽນນາກປະດັບຄຸຍປ້ານລົມ, ເທິງຫຼັງຄາ ມີຍອດຊໍ່ຟ້າປະດັບດ້ວຍເສດຕະສັດ 17 ລູກ ແລະ ດອກກະຈັງດອກວັນແລນ, ຫຼັງຄາມຸງດ້ວຍດິນຂໍ.
ໂຄງສ້າງປະຕູຂອງສິມທີ່ເຮັດດ້ວຍໄມ້ ຍັງແມ່ນອັນເກົ່າທີ່ຖືກຮັກສາໄວ້ ແຕ່ຕົ້ນສັດຕະວັດທີ 16, ບານປະຕູໃຫຍ່ແມ່ນຮູບຄວັດແກະສະຫຼັກລົງສີຟອກຄຳ ມີຄວາມປານິດວິຈິດບັນຈົງ ທີ່ສະແດງໃຫ້ເຫັນໃນຍຸກຮິນດູ. ມຸກດ້ານໜ້າເບື້ອງທາງເຂົ້າແມ່ນແຍກອອກເປັນຊັ້ນໆ, ຄໍ້າດ້ວຍເສົາໃຫຍ່, ລູກຕິ່ງທີ່ປະດັບປ່ອງຢ້ຽມທີ່ເຮັດດ້ວຍໄມ້ ມີລັກສະນະຄ້າຍຄືຜາສາດຫີນສະໄໝຂອມຄື: ອັງກໍວັດ ແລະ ວັດພູຈໍາປ່າສັກ ທີ່ຢູ່ພາກໃຕ້ຂອງລາວ.
ດ້ານໃນມີພະປະທານອົງຫຼວງປະ ດິດສະຖານຢູ່ ມີໜ້າຕັກກວ້າງ 5 ແມັດ 64 ຊັງຕີແມັດ ເຊິ່ງເປັນພະພຸດທະຮູບອົງຫຼວງທີ່ໃຫຍ່ກວ່າທຸກໆອົງທີ່ປະດິດສະຖານຢູ່ວັດຂອງຫຼວງພະບາງ.
ສິມແຫ່ງນີ້ໃນເມື່ອກ່ອນເຄີຍເປັນພິພິຕະພັນສາສະໜາສະຖານແຫ່ງຊາດກໍວ່າໄດ້ ເພາະມີບູຮານວັດ ຖຸ, ສິລະປະວັດຖຸ ບັນຈຸໄວ້ເປັນຈໍານວນຫຼວງ ຫຼາຍເຊັ່ນ: ພະ ພຸດທະຮູບທີ່ຟອກດ້ວຍຄໍາປິວ, ທີ່ເຮັດດ້ວຍທອງສຳລິດ, ໄມ້ ແລະ ປະທາຍປູນ ທີ່ມີອາຍຸຫຼາຍກວ່າ 400 ປີ ແລະ ຫີນສີລາຈາຣຶກ ໃນສັດຕະວັດທີ 15 ອີກດ້ວຍ.
ໂດຍ: Tourismluangprabang