ໃນໄລຍະຜ່ານມາ ການສ້າງນັກວິຊາການ ຍັງບໍ່ທັນສອດຄ່ອງ ກັບໂຄງປະກອບ ເສດຖະກິດ-ສັງຄົມ ເທົ່າທີ່ຄວນ, ການກໍ່ສ້າງໄປຕາມຄ່ານິຍົມ ເຮັດໃຫ້ຂາດດຸນທາງດ້ານແຮງງານ ລະຫວ່າງ ການສະໜອງ ແລະ ຄວາມຕ້ອງ ການ ໂດຍສະເພາະ ໃນຂະແໜງບູລິມະສິດ ເປັນຕົ້ນ ວິຊາສະເພາະໃນສາຂາ ວິຊາກະສິກຳ, ຄູ ແລະ ພະຍາບານ ເພື່ອຕອບສະໜອງໃຫ້ແກ່ການພັດທະນາປະເທດຊາດທາງດ້ານປະລິມານ ແລະ ຄຸນນະພາບ, ເຊິ່ງມີຫລາຍສາເຫດ.
ໃນນັ້ນ ສາເຫດຫລັກ ແມ່ນສັງຄົມ ກໍຄືພໍ່ແມ່ຜູ້ປົກຄອງ ຍັງບໍ່ທັນຮັບຮູ້ ແລະ ເຂົ້າໃຈ ຕໍ່ແຜນພັດທະນາຊັບພະຍາກອນມະນຸດ, ຂີດຄວາມສາມາດຂອງພະນັກງານ ຈຳນວນໜຶ່ງຍັງຈຳກັດ ໃນການຄົ້ນຄວ້າ, ຜັນຂະຫຍາຍ ຍຸດທະສາດ ໃຫ້ເປັນໂຄງການ, ແຜນງານ, ງົບປະມານ ໃນການຊຸກຍູ້ສົ່ງເສີມ ແລະ ອຳນວຍຄວາມສະດວກ ຍັງມີລັກສະນະຈຳກັດ.
ທ່ານ ນາງ ແສງເດືອນ ຫລ້າຈັນທະບູນ ລັດຖະມົນຕີ ກະຊວງສຶກສາທິການ ແລະ ກິລາ ໄດ້ໃຫ້ຮູ້ໃນກອງປະຊຸມ ສະໄໝສາມັນເທື່ອທີ 7 ຂອງສະພາ ແຫ່ງຊາດ ຊຸດທີ VIII ໃນວັນທີ 5 ມິຖຸນາ 2019 ນີ້ວ່າ:
ປັດຈຸບັນ ລັດຖະບານ ຖືເອົາຊັບພະຍາກອນມະນຸດ ເປັນປັດໄຈ ຕັດສິນການເຕີບໂຕ ຂອງເສດຖະກິດ-ສັງຄົມ ກໍຄື ການພັດທະນາປະເທດຊາດ ໂດຍເຫັນໄດ້ ຄວາມສຳຄັນ ດັ່ງກ່າວ ກະຊວງສຶກສາທິການ ແລະ ກິລາ ໄດ້ຮ່ວມກັບພາກສ່ວນກ່ຽວຂ້ອງ ໄດ້ສືບຕໍ່ ພັດທະນາຊັບພະຍາກອນມະນຸດ ໃນຂະແໜງບູລິມະສິດ, ໃນນັ້ນຂະແໜງກະສິກຳ ແມ່ນສາມາດສ້າງໄດ້ນັກວິຊາການໃນຫລາຍລະດັບ ລວມທັງປະລິນຍາເອກ ແລະ ປະລິນຍາໂທ ດ້ານກະສິກຳ ທີ່ລົງເລິກໃນສາຂາ ວິຊາທີ່ຈຳເປັນ ເຊັ່ນ: ປູກຝັງ, ວິທະຍາສາດດິນ, ວິທະຍາສາດພືດ, ປ້ອງກັນພືດ, ສັດລ້ຽງ, ສັດຕະວະແພດ ແລະອື່ນໆ.
ສ່ວນຂະແໜງຄູໄລຍະຜ່ານມາ, ກະຊວງສຶກສາທິການ ໄດ້ສ້າງແຜນຍຸດທະສາດ ແລະ ແຜນປະຕິບັດການສ້າງຄູ ເພື່ອຕອບສະໜອງຄວາມຕ້ອງການ ທັງດ້ານປະລິມານ ແລະ ຄຸນນະພາບ ສອດຄ່ອງກັບການຂະຫຍາຍຕົວ ຂອງວຽກງານສຶກສາທິການ ແລະ ກິລາ, ໄດ້ປັບປຸງ ແຜນການ ກໍ່ສ້າງຄູຄືນໃໝ່ ໂດຍເພີ່ມທະວີການກໍ່ສ້າງ ຄູອະນຸບານ, ຄູປະຖົມ ແລະ ມັດທະຍົມສຶກສາ ເປັນຕົ້ນ ສາຍວິທະຍາສາດທຳມະຊາດ, ຄູເຕັກໂນໂລຊີ ຂໍ້ມູນຂ່າວສານ ແລະ ການສື່ສານ, ພື້ນຖານວິຊາຊີບ, ພາລະສຶກສາ ແລະ ສິລະປະສຶກສາ ນັບມື້ນັບເພີ່ມຂຶ້ນ ແລະ ສາມາດແກ້ໄຂ ບັນຫາຂາກຄູ ໃນວິຊາດັ່ງກ່າວ ໄດ້ໃນລະດັບໜຶ່ງ.
ສຳລັບຂະແໜງພະຍາບານ ຜ່ານການຈັດຕັ້ງປະຕິບັດ ຍຸດທະສາດ ການພັດທະນາ ພະນັກງານສາທາລະນະສຸກ ແລະ ທິດທາງປະຕິຮູບ ດ້ານພະນັກງານ ສາທາລະນະສຸກ ເຫັນວ່າມີຜົນສຳເລັດຫລາຍດ້ານ, ພະນັກງານແພດໝໍ, ພະຍາບານ ນັບແຕ່ສູນກາງ ຮອດທ້ອງຖິ່ນ ໄດ້ຮັບການພັດທະນາ ແລະ ຍົກລະດັບທັງດ້ານ ຈັນຍາບັນ-ຈັນຍາທຳ ແລະ ວິຊາສະເພາະ, ຈຳນວນ ແລະ ຄຸນນະພາບ ຂອງພະນັກງານ ໃນແຕ່ລະຂັ້ນເພີ່ມຂຶ້ນ ແລະ ອື່ນໆ.
ແຫຼ່ງຂໍ້ມູນ: ສຳນັກຂ່າວສານປະເທດລາວ