ພະແນກໄປສະນີ ໂທລະຄົມມະນາຄົມ ແລະ ການສື່ສານນະຄອນຫຼວງວຽງຈັນ (ປທສ ນວ) ຈັດສຳມະນາຫົວຂໍ້ “ສົ່ງເສີມການຮຽນຮູ້ ແລະ ການນຳໃຊ້ໄອຊີທີ ເພື່ອກຽມຄວາມພ້ອມເຂົ້າສູ່ເສດຖະກິດດີຈິຕອນ” ເພື່ອແນໃສ່ຈັດຕັ້ງປະຕິບັດຄາດໝາຍສູ້ຊົນໃນມະຕິກອງປະຊຸມໃຫຍ່ ຄັ້ງທີ 6 ຂອງອົງຄະນະພັກ ນວ ກໍຄືແຜນພັດທະນາເສດຖະກິດ-ສັງຄົມ 5 ປີ (2016-2020) ແລະ ການຜັນຂະຫຍາຍ 1 ໃນ 6 ໂຄງການບຸກທະລຸຂອງ ນວ ກ່ຽວກັບການປັບປຸງລະບົບບໍລິຫານລັດ ເປັນທັນສະໄໝ (ບໍລິຫານແບບເອເລັກໂຕຣນິກ) ຈັດຂຶ້ນຢູ່ຫ້ອງວ່າການປົກຄອງ ນວ ເປັນປະທານຂອງທ່ານ ສີຄອນ ອ່ອນສີພັນລາ ຫົວໜ້າພະແນກ ປທສ ນວ ມີຮອງຫົວໜ້າພະແນກ ເຈົ້າເມືອງ ຮອງເຈົ້າເມືອງ ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານ ສີຄອນ ອ່ອນສີພັນລາ ກ່າວວ່າ:
ສຳມະນາຄັ້ງນີ້ແບ່ງເປັນ 4 ຫົວຂໍ້ ຄື:
ເສດຖະກິດດີຈິຕອນ ຄວາມສຳຄັນຂອງການເຊື່ອມໂຍງເຄືອຄ່າຍພາກລັດ ການນຳໃຊ້ໄອຊີທີໃຫ້ມີຄວາມປອດໄພ ແລະ ສະຕາສອັບ ປັດຈຸບັນ ພວກເຮົາກຳລັງກ້າວເຂົ້າສູ່ຍຸກແຫ່ງວິວັດທະນາການດ້ານວິທະຍາສາດ ແລະ ເຕັກໂນໂລຊີ ການພັດທະນາ ແລະ ສົ່ງເສີມນຳໃຊ້ອິນເຕີເນັດເຂົ້າໃນການຫັນປ່ຽນດ້ານອຸດສາຫະກຳ ການຄ້າ-ການບໍລິການທຸກຢ່າງໃຫ້ເປັນເອເລັກໂຕຣນິກ.
ເພື່ອສົ່ງເສີມເສດຖະກິດດີຈິຕອນ ການຄຸ້ມຄອງມີຄວາມປອດໄພທາງຄອມພິວເຕີ ເພື່ອສ້າງກົນໄກການຄຸ້ມຄອງອິນເຕີເນັດໃຫ້ດີຂຶ້ນ ຄວາມສຳຄັນຂອງການເຊື່ອມໂຍງເຄືອຄ່າຍພາກລັດ ໝາຍເຖິງການຫັນເປັນທັນສະໄໝ (ຫັນເປັນເອເລັກໂຕຣນິກ) ດ້ວຍການນຳໃຊ້ເຕັກໂນໂລຊີໄອຊີທີເຊື່ອມໂຍງເຂົ້າກັນ ການນຳໃຊ້ຊັບພະຍາກອນທີ່ມີປະສິດທິຜົນ ປະຢັດແຮງງານ ແລະ ເວລາ ສຳລັບການນຳໃຊ້ໄອຊີທີໃຫ້ມີຄວາມປອດໄພ ແມ່ນການນຳໃຊ້ໄອຊີທີທີ່ຕ້ອງຄຳນຶງເຖິງຄວາມປອດໄພ ເປັນຕົ້ນ ການນຳໃຊ້ສື່ສັງຄົມ ການເຂົ້າເຖິງອິນເຕີເນັດ ຫຼື ການໃຊ້ແອັບພລິກເຄຊັນຕ່າງໆ ຕ້ອງຄຳນຶງເຖິງຄວາມປອດໄພ ສ່ວນສະຕາສອັບ ໝາຍເຖິງຄວາມຄິດທີ່ແຕກຕ່າງ ແລະ ການສ້າງທີ່ແຕກຕ່າງໝູ່ແຕ່ມີປະສິດທິຜົນສູງ.
ແຫຼ່ງຂໍ້ມູນ: ໜັງສືພິມວຽງຈັນໃໝ່