ພາຍຫລັງເກີດມີສະພາບພໍ່ຄ້າຄົນກາງຈາກຕ່າງປະເທດເຂົ້າມາເກັບຊື້ເຂົ້ານຳຊາວນາໂດຍພາລະການ ເພື່ອສົ່ງອອກໄປຕ່າງປະເທດ ເຊິ່ງໄດ້ມີການເກງລາຄາຂຶ້ນສູງກວ່າປົກກະຕິ ແລະ ສົ່ງຜົນກະທົບບໍ່ຊອບທຳໃຫ້ຫົວໜ່ວຍທຸລະກິດທີ່ປະຕິບັດພັນທະໃຫ້ລັດ.
ສະນັ້ນ ເພື່ອສະກັດກັ້ນສະພາບການປັ່ນປ່ວນດັ່ງກ່າວ, ລັດຖະມົນຕີກະຊວງອຸດສາຫະກຳ ແລະ ການຄ້າ ຈຶ່ງເນັ້ນໃຫ້ພະແນກອຸດສາຫະກຳ ແລະ ການຄ້າ ນະຄອນຫລວງ ເອົາໃຈໃສ່ຄື: ເພີ່ມທະວີການຄຸ້ມຄອງ, ຕິດຕາມກວດກາເຂັ້ມງວດ ຫ້າມເດັດຂາດບໍ່ໃຫ້ພໍ່ຄ້າຊາວຕ່າງປະເທດເຂົ້າມາເກັບຊື້ເຂົ້າຢູ່ພາຍໃນແຂວງ ແລະ ປັ່ນປ່ວນລາຄາໂດຍບໍ່ມີທະບຽນຖືກຕ້ອງຕາມລະບຽບກົດໝາຍຂອງ ສປປ ລາວ, ຖ້າພົບເຫັນມີການລະເມີດແມ່ນໃຫ້ຢຶດ ແລະ ປັບໄໝຕາມລະບຽບການວາງອອກ, ເອົາໃຈໃສ່ຄຸ້ມຄອງລາຄາຊື້-ຂາຍເຂົ້າທຸກຊະນິດຕາມທ້ອງຕະຫລາດແຕ່ລະທ້ອງຖິ່ນ ເພື່ອຫລີກລ້ຽງການສວຍໂອກາດຂຶ້ນລາຄາຕາມລຳພັງ, ກ່ອນຂຶ້ນລາຄາຕ້ອງໄດ້ຮັບອະນຸຍາດຈາກຄະນະຄຸ້ມຄອງລາຄາສິນຄ້າ ແລະ ຄ່າບໍລິການຂັ້ນແຂວງ, ເມືອງ ເນື່ອງຈາກເຂົ້າແມ່ນນອນໃນລາຍການສິນຄ້າຄວບຄຸມຂອງລັດ.
ນອກນີ້ ຫ້າມໃຫ້ບຸກຄົນ, ຫົວໜ່ວຍທຸລະກິດ ຫລື ໂຮງສີຕ່າງໆຢູ່ທ້ອງຖິ່ນເປັນຕົວແທນເກັບຊື້ເຂົ້າໃຫ້ຊາວຕ່າງປະເທດ ໂດຍອາໄສໃບທະບຽນວິສາຫະກິດຂອງຕົນ ຫລື ຮັບເອົາເງິນເພື່ອເກັບຊື້ ແລະ ກັກຕຸນສິນຄ້າ, ສ້າງຄວາມປັ່ນປ່ວນທາງດ້ານລາຄາ, ຖ້າພົບເຫັນການກະທຳດັ່ງກ່າວແມ່ນໃຫ້ຢຶດ ແລະ ປັບໄໝຕາມລະບຽບການຢ່າງເຂັ້ມງວດ. ຜູ້ມີສິດເກັບຊື້ເຂົ້າຈາກຊາວນາ ຫລື ກຸ່ມຊາວນາໄດ້ຕ້ອງແມ່ນສະມາຄົມ, ກຸ່ມໂຮງສີ ຫລື ທຸລະກິດຊື້-ຂາຍເຂົ້າທີ່ມີໃບທະບຽນຖືກຕ້ອງເທົ່ານັ້ນ.
Cr.ລາວພັດທະນາ
ຮູບພາບ: www.prachachat.net
Hits: 10
