ໃນວັນທີ 19 ກັນຍາ 2018, ທີ່ຫໍປະຊຸມແຫ່ງຊາດ ນະຄອນຫລວງວຽງຈັນ, ໄດ້ມີກອງປະຊຸມຄົບຄະນະກຳມະການສົ່ງເສີມ ແລະ ຄຸ້ມຄອງການລົງທຶນ (ຄລທ) ຂັ້ນສູນກາງ, ຂັ້ນແຂວງ ແລະ ນະຄອນຫລວງ, ໂດຍການເປັນປະທານຂອງ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ປະທານຄະນະກຳມະການສົ່ງເສີມ ແລະ ຄຸ້ມຄອງການລົງທຶນ, ມີບັນດາລັດຖະມົນຕີ, ເຈົ້າຄອງນະຄອນຫລວງ, ເຈົ້າແຂວງ ພ້ອມດ້ວນຄະນະກຳມະການສົ່ງເສີມ ແລະ ຄຸ້ມຄອງການລົງທຶນ ແລະ ພາກສ່ວນກ່ຽວຂ້ອງເຂົ້າຮ່ວມ.
ກອງປະຊຸມດັ່ງກ່າວ, ຄະນະຮັບຜິດຊອບວຽກງານການລົງທຶນ ຂັ້ນສູນກາງ ແລະ ຂັ້ນທ້ອງຖິ່ນ ຈະໄດ້ປຶກສາຫາລື, ແລກປ່ຽນບົດຮຽນ ແລະ ປະກອບຄຳຄິດເຫັນ ທາງດ້ານນະໂຍບາຍ, ດ້ານວິຊາການ ແລະ ການຄຸ້ມຄອງປະສານງານ ກ່ຽວກັບວຽກງານການສົ່ງເສີມການລົງທຶນ ຜ່ານກົນໄກປະຕູດຽວ ຂອງຄະນະກຳມະການສົ່ງເສີມ ແລະ ຄຸ້ມຄອງການລົງທຶນແຕ່ລະຂັ້ນ ພາຍຫລັງທີ່ໄດ້ມີກົດໝາຍ, ນິຕິກຳ ແລະ ລະບຽບການ ໃນການຈັດຕັ້ງປະຕິບັດ ແລະ ເຄື່ອນໄຫວ ຕາມພາລະບົດບາດ ແລະ ໜ້າທີ່ ຄວາມຮັບຜິດຊອບຂອງຕົນ ໃນໄລຍະ 1 ປີ ທີ່ຜ່ານມາ.