ກອງປະຊຸມປຶກສາຫາລື ກ່ຽວກັບການປັບປຸງວຽກງານໂພຊະນາການແບບມີສ່ວນຮ່ວມ ຈາກທຸກພາກສ່ວນໃນ ສປປ ລາວ ຈັດຂຶ້ນຢູ່ໂຮງແຮມລາວພລາຊາ ໂດຍເປັນປະທານຮ່ວມຂອງທ່ານ ກິແກ້ວ ຈັນທະບູຣີ ຮອງລັດຖະມົນຕີກະຊວງແຜນການ ແລະ ການລົງທຶນ ທ່ານ ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ ແລະ ທ່ານນາງ ນິໂຄລາ ພອນທາຣາ ຫົວໜ້າຫ້ອງການຜູ້ຕາງໜ້າທະນາຄານໂລກ ປະຈຳລາວ ມີບັນດາພະນັກງານ-ວິຊາການກ່ຽວຂ້ອງທັງສູນກາງ-ທ້ອງຖິ່ນເຂົ້າຮ່ວມ.
ລັດຖະບານລາວໄດ້ກຳນົດເອົາແຂວງຊຽງຂວາງ ແລະ ແຂວງຫົວພັນ ເປັນແຂວງເປົ້າໝາຍ ຍ້ອນເຫັນວ່າ 2 ແຂວງດັ່ງກ່າວ ມີອັດຕາການຂາດສານອາຫານໃນເດັກນ້ອຍສູງ ໂດຍການຈັດຕັ້ງປະຕິບັດມີຈຸດປະສົງສຳຄັນ ໃນການຍົກລະດັບການເຂົ້າເຖິງ ແລະ ນຳໃຊ້ຜະລິດຕະພັນອາຫານທີ່ມີຄຸນະພາບ ຕະຫຼອດເຖິງການບໍລິການດ້ານສາທາລະນະສຸກຫຼາຍຂຶ້ນ ເພື່ອໃຫ້ເດັກມີຄວາມສູງໄດ້ມາດຕະຖານ ເນື່ອງຈາກປັດຈຸບັນ ສປປ ລາວ ມີເດັກທີ່ມີສ່ວນສູງຫຼຸດມາດຕະຖານ ກວມເອົາ 40% ຂອງເດັກທີ່ມີອາຍຸຕ່ຳກວ່າ 5 ປີ.
Cr.KPL