ທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກຳ ແລະ ການຄ້າ ໄດ້ອອກແຈ້ງການ ໃຫ້ຫົວໜ້າພະແນກ ອຸດສາຫະກຳ ແລະ ການຄ້າແຂວງ, ນະຄອນຫລວງວຽງຈັນ ໃຫ້ເພີ່ມທະວີຄວາມເອົາໃຈໃສ່ໃນການຄຸ້ມຄອງ ແລະ ຕິດຕາມກວດກາ ຢ່າງເຂັ້ມງວດ ຫ້າມເດັດຂາດ ບໍ່ໃຫ້ພໍ່ຄ້າຊາວຂາຍຕ່າງປະເທດ ເຂົ້າມາເກັບຊື້ເຂົ້າຢູ່ພາຍໃນແຂວງ ແລະ ປັ່ນປ່ວນລາຄາເຂົ້າ, ໂດຍບໍ່ມີໃບທະບຽນວິສາຫະກິດທີ່ຖືກ ຕ້ອງຕາມລະບຽບກົດໝາຍຂອງ ສປປ ລາວ.
ຖ້າພົບເຫັນໃນກໍລະນີມີການລະເມີດດັ່ງກ່າວ ແມ່ນໃຫ້ຢຶດ ຫລື ອາຍັດ ແລະ ປັບໃໝ ຕາມລະບຽບກົດໝາຍວາງອອກ; ໃຫ້ເອົາໃຈໃສ່ຄຸ້ມຄອງລາຄາຊື້-ຂາຍ ປະເພດເຂົ້າກິນທຸກຊະນິດ ຕາມທ້ອງຕະຫລາດ ຢູ່ພາຍໃນແຂວງຂອງຕົນ, ຫລີກລ້ຽງການສວຍໂອກາດຂຶ້ນລາຄາໂດຍພາລະການ, ກ່ອນຈະຂຶ້ນລາຄາຕ້ອງໄດ້ຮັບອະນຸດຍາດ ຈາກຄະນະຄຸ້ມຄອງລາຄາສິນຄ້າ ແລະ ຄ່າບໍລິການຂັ້ນແຂວງ ແລະ ຂັ້ນເມືອງ, ເນື່ອງຈາກວ່າ ສິນຄ້າປະເພດເຂົ້າກິນ ແມ່ນນອນຢູ່ໃນລາຍການສິນຄ້າຄວບຄຸມ ຕາມບັນຊີຂອງຂະແໜງອຸດສາຫະກຳ ແລະ ການຄ້າ; ຫ້າມບໍ່ໃຫ້ບຸກຄົນ, ຫົວໜ່ວຍທຸລະກິດ ຫລື ໂຮງສີຕ່າງໆ ຢູ່ພາຍໃນແຂວງ ເປັນຕົວແທນເກັບຊື້ເຂົ້າໃຫ້ຊາວຕ່າງປະເທດ, ໂດຍອາໃສທະບຽນວິສາຫະກິດຂອງຄົນລາວ ຫລື ເອົາເງິນທຶນໃຫ້ ເພື່ອເກັບຊື້ ແລະ ກັກຕຸນສິນຄ້າ, ສ້າງຄວາມປັ່ນປ່ວນທາງດ້ານລາຄາຊື້-ຂາຍເຂົ້າ ຖ້າພົບເຫັນການກະທຳດັ່ງກ່າວ ແມ່ນໃຫ້ຢຶດ ຫລື ອາຍັດ ແລະ ປັບໃໝ ຕາມລະບຽບກົດໝາຍຂອງ ສປປ ລາວ ວາງອອກຢ່າງເຂັ້ມງວດ.
ອ່ານເພີ່ມຕື່ມ:
http://kpl.gov.la/detail.aspx?id=39156
Hits: 9
