ຈາກທີ່ມີຂ່າວວ່າ ຄົນລາວເຮົາ ຂັບລົດຫຼູໄປຊື້ຫວຍຢູ່ໃນຈງັຫວັດອຸດອນ, ປະເທດໄທ ແລ້ວຖືກລາງວັນ 90 ລ້ານນັ້ນ, ເຮັດໃຫ້ເກີດສຽງວິພາກວິຈານ ເຖິງຄວາມເປັນໄປໄດ້ທີ່ວ່າ ຂ່າວນີ້ອາດຈະປອມ! ເພາະວ່າຂ່າວໃນລັກສະນະນີ້ໃນປະເທດໄທ ເຈົ້າຂອງຮ້ານຂາຍຫວຍມັກໃຫ້ຂໍ້ມູນຕົວະຕະຫຼອດ!
ນອກຈາກນີ້,ຍັງມີຜູ້ສະແດງຄວາມຄິດເຫັນອີກວ່າ ຂ່າວນີ້ບໍ່ໜ້າຈະເປັນຄວາມຈິງ ເພາະວ່າທາງລັດຖະບານໄທໃຫ້ແຍກຂາຍຫວຍ ເນື່ອງຈາກ,ຕ້ອງການໃຫ້ແຈກຢາຍໄປຫຼາຍຈັງຫວັດ ຖ້າໃຜຝ່າຝືນຈະຖືກຕັດອອກຈາກໂຄວ໌ຕ້າ ບໍ່ໄດ້ຂາຍອີກຕະຫຼອດໄປ.
ຄົນລາວຈຳນວນໜຶ່ງ ເຫັນວ່າ ຜູ້ຈຳໜ່າຍຫວຍລາຍນີ້ ອາດຈະເຮັດໄປພຽງແຕ່ຕ້ອງການສ້າງກະແສ ແບບດຽວກັບລາຍອື່ນທີ່ຜ່ານມາ.
ຢ່າງໃດກະຕາມ, ຈາກເວບໄຊຂ່າວໄທລັດ ລາຍງານຈາກສຳນັກງານສະຫຼາກກິນແບ່ງລັດຖະບານ ຢືນຢັນວ່າ ຜູ້ໂຊກດີທີ່ຖືກຫວຍລາງວັນທີ່ 1 ງວດວັນທີ່ 1 ຕຸລາ 2018 ໝາຍເລກ 452643 ຈຳນວນ 15 ສະບັບ ລວມເປັນເງິນ 90 ລ້ານບາດນັ້ນ ມາຮັບເງິນໄປເປັນທີ່ຮຽບຮ້ອຍແລ້ວ ໂດຍສຳນັກງານສະຫຼາກ ໄດ້ຈ່າຍເງິນລາງວັນທີ່ຫັກພາສີ 0.5 ເປີເຊັນ ແລ້ວຈົດເຊັກທະນາຄານກຸງໄທມອບໃຫ້ໄປ.
ຜູ້ສື່ຂ່າວໄທ ໄດ້ສອບຖາມໄປຍັງຜູ້ບໍລິຫານລະດັບສູງຂອງສຳນັກງານສະຫຼາກຕື່ມ ວ່າ ຄົນທີ່ຖືກລາງວັນເປັນຄົນສັນຊາດລາວຫຼືບໍ່? ຜູ້ບໍລິຫານຕອບວ່າ ແມ່ນ! ແຕ່ບໍ່ສາມາດໃຫ້ລາຍລະອຽດ ຫຼືເປີດເຜີຍລາຍຊື່ໄດ້ ເນື່ອງຈາກວ່າ ເປັນຄວາມລັບ
ເພາະວ່າທີ່ຜ່ານມາ ສະຫຼາກກິນແບ່ງລັດຖະບານ ໄດ້ຮັບຄວາມສົນໃຈຈາກປະຊາຊົນທັງຄົນໄທ ແລະຄົນຕ່າງຊາດ ໂດຍສະເພາະປະເທດເພື່ອນບ້ານ ທີ່ມີຊາຍແດນຕິດກັບໄທ ລວມເຖິງແຮງງານຕ່າງດ້າວທີ່ເຂົ້າມາເຮັດວຽກໃນປະເທດໄທ ຈຶ່ງມີຄົນຕ່າງຊາດ ເຊັ່ນ ຄົນມຽນມາ ຖືກລາງວັນທີ່ 1 ໄປແລ້ວຫຼາຍຄົນ.
Cr.Thairath
Hits: 13
