ການນໍາພັກ-ລັດ, ນັກຊ່ຽວຊານ, ນັກຄົ້ນຄວ້າທາງດ້ານເສດຖະກິດ, ນັກທຸລະກິດ ແລະ ຜູ້ປະກອບການ ຈາກທຸກຂະແໜງ ເສດຖະກິດ 150 ກວ່າທ່ານ ໄດ້ພົບປະກັນເພື່ອຄົ້ນຄວ້າ, ປຶກສາຫາລື ແລະ ລະດົມຄວາມຄິດເຫັນ ຊອກທາງອອກການແກ້ໄຂ ບັນຫາທີ່ເກີດຂຶ້ນໃນພາກທຸລະກິດຂອງປະເທດ.ຫົວຂໍ້ໃນກອງປະຊຸມແມ່ນ “ພາກທຸລະກິດ, ບັນຫາໃນປັດຈຸບັນ ແລະ ທາງອອກໃນຕໍ່ໜ້າ” ທີ່ນະຄອນຫລວງວຽງຈັນ, ພາຍໃຕ້ການເປັນປະທານຂອງ ທ່ານ ຄໍາພັນ ພົມມະທັດ ຄະນະເລຂາທິການສູນກາງພັກ, ຫົວໜ້າຫ້ອງວ່າການສູງການພັກ, ໂດຍໃຫ້ກຽດ ເຂົ້າຮ່ວມຂອງ ທ່ານ ບຸນຍັງ ວໍລະຈິດ ປະທານປະເທດ ແຫ່ງ ສປປ ລາວ.
ຈຸດປະສົງເພື່ອລະດົມຄວາມຄິດເຫັນ ຂອງບັນດານັກທຸລະກິດ ແລະ ຜູ້ປະກອບການອັນດັບຕົ້ນໆ ຂອງປະເທດ ຕໍ່ສະພາບການໃນການແກ້ໄຂບັນຫາຕ່າງໆ ໃນການດຳເນີນທຸລະກິດຢູ່ພາຍໃນປະເທດ ໃຫ້ສາມາດດຳເນີນທຸລະກິດ ໄດ້ຢ່າງຄ່ອງຕົວ ແລະ ມີຄວາມຍືນຍົງ, ສາມາດແຂ່ງຂັນກັບສາກົນໄດ້.
ທ່ານ ບຸນຍັງ ກ່າວວ່າ: ໃນຫລາຍປີຜ່ານມາເຖິງປັດຈຸບັນ, ເສດຖະກິດຂອງປະເທດເຮົາ ໂດຍສະເພາະ ແມ່ນເສດຖະກິດ ມະຫາພາກ ພົບກັບຄວາມຫຍຸ້ງຍາກ ທີ່ໜັກໜ່ວງສົມຄວນ.ປັດຈຸບັນ ແມ່ນບັນຫາການຂາດດຸນ ງົບປະມານໜີ້ສິນຂອງລັດ ຕໍ່ພາຍໃນ ແລະ ຕ່າງປະເທດ (ໜີ້ສິນສາທາລະນະ), ການຂາດສະພາບຄ່ອງ ໃນລະບົບທະນາຄານຂອງລັດ ເກີດຈາກຄວາມອ່ອນແອໃນວຽກງານແຜນການ ແລະ ການເງິນ ກໍຄື ຄວາມອ່ອນແອ ໃນພາກການຜະລິດຂອງປະເທດເຮົາ.
ສະເໜີໃຫ້ບັນດາ ຜູ້ເຂົ້າຮ່ວມກອງປະຊຸມ ຄົ້ນຄວ້າ ປະກອບຄວາມເຫັນ ໂດຍສຸມໃສ່ລົງເລິກ 5 ປະເດັນ ຄື: ບັນຫາຫຍັງແດ່ທີ່ພາກທຸລະກິດ ກໍຄື ຂົງເຂດທຸລະກິດ ຂອງຕົນກຳລັງ ປະເຊີນຢູ່, ຈຸດເລັ່ງໃນການຂະຫຍາຍ ກິດຈະການຂອງຕົນ (ສ້າງຜະລິດຕະພັນອອກສູ່ຕະຫລາດ) ໃນຕໍ່ໜ້າອັນຫລັກໆແມ່ນອັນໃດ, ສິ່ງທີ່ພາກທຸລະກິດ ແລະ ຂົງເຂດຂອງຕົນເອງ ຕ້ອງປັບປຸງແກ້ໄຂ ເພື່ອສ້າງປັດໄຈຄ້ຳປະກັນ ແກ່ການແຂ່ງຂັນ ຢູ່ຕະຫລາດພາຍໃນ ແລະ ຕ່າງປະເທດມີຫຍັງແດ່, ຕ້ອງມີ ການກຳນົດນະໂຍບາຍສົ່ງເສີມ ແລະ ສ້າງ ຫລື ປັບປຸງບັນດານິຕິກຳຕົ້ນຕໍຫຍັງແດ່ ເພື່ອສະໜັບສະໜູນ ແລະ ສ້າງເງື່ອນໄຂອັນຈຳເປັນ ໃຫ້ແກ່ພາກທຸລະກິດແກ້ໄຂ ຄວາມຫຍຸ້ງຍາກ; ແລະ ສິ່ງທີ່ເປັນອຸປະສັກກົດໜ່ວງ, ຖ່ວງດຶງຕົ້ນຕໍໃນການສ້າງທຸລະກິໃໝ່, ການດຳເນີນທຸລະກິດ ຢູ່ລາວປັດຈຸບັນ ທີ່ເກີດຈາກບັນດາ ອົງການພາກລັດ ເຊິ່ງຕ້ອງໄດ້ແກ້ໄຂມີຫຍັງແດ່.
Cr.KPL
Hits: 5
