ບຸນອອກພັນສາປະວໍລະນາ ຖືເປັນງານບຸນສຳຄັນທາງພະພຸດທະສາສະໜາ ແລະງານບຸນສຳຄັນຂອງປວງຊົນລາວທັງຊາດ ເຊິ່ງໃນແຕ່ລະປີມີຫຼາຍກິດຈະກຳເກີດຂຶ້ນ ເຊັ່ນ: ປະເພນີໄຕ້ໂຄມໄຟ ແລະ ໄຫຼເຮືອໄຟ (ເຮືອໄຟບົກ ແລະ ເຮືອໄຟນ້ຳ) ທີ່ໄດ້ປະຕິບັດກັນມາ ປັດຈຸບັນໄດ້ມີການປັບປ່ຽນໄປຕາມຍຸກຕາມສະໄໝ.
ໃນວັນທີ 22-24 ຕຸລາ 2018 ທີ່ວັດອົງຕື້ມະຫາວິຫານຈະໄດ້ມີກິດຈະກຳໄຕ້ໂຄມໄຟ ຈຳນວນ 2.561 ດວງ ເພື່ອບູຊາພະພຸດທະສາສະໜາ ແລະ ສະຫຼອງວັນອອກພັນສາປະວໍລະນາ ໃນວັນທີ 22 ຕຸລາ 2018 ເວລາ 13:00 ໂມງ ກະກຽມເປີດສວນທຳມະຈັກ ເວລາ 16:00 ໂມງ ພິທີສູດ ແລະ ເປີດສວນທຳມະຈັກເປັນທາງການ ເວລາ 17:00 ໂມງ ກະກຽມໄຕ້ທຽນງານອອກພັນສາ ໄຕ້ອັກສອນສະຫຼອງທຳມະຈັກ ວັນທີ 23 ຕຸລາ 2018 ເວລາ 17:00ໂມງ ກະກຽມໄຕ້ທຽນງານອອກພັນສາ ໄຕ້ອັກສອນຍິນດີຕ້ອນຮັບສູ່ປີທ່ອງທ່ຽວລາວ 2018 ແລະ ວັນທີ 24 ຕຸລາ 2018 ເວລາ 7:00 ໂມງ ມີພີທີໃສ່ບາດຖວາຍທານ ແລະ ເວລາ 17:00 ໂມງ ກະກຽມໄຕ້ທຽນງານອອກພັນສາ ໄຕ້ອັກສອນ ວັນມະຫາປະວໍລະນາອອກພັນສາ ພສ 2561.
ກິດຈະກຳທັງໝົດທີ່ວ່າມານັ້ນ, ເພື່ອສົ່ງເສີມວັດທະນະທຳອັນດີງາມ ແລະ ການນຸ່ງຖືຂອງຊາດ ທັງເປັນການຍົກສູງສົ່ງເສີມພະພຸດທະສາສະໜາ ພ້ອມນັ້ນ ເພື່ອເປັນການຮັກສາປະເພນີໄຕ້ໂຄມໄຟ ແລະ ເຮືອໄຟ ເພື່ອສ້າງໃຫ້ເປັນກິດຈະກຳປະຈຳປີໃນການສົ່ງເສີມວັດທະນະທຳ ແລະ ການທ່ອງທ່ຽວ.
ສະນັ້ນ ຂໍເຊີນຊວນຊາວພຸດທະສະນິກະຊົນ ຕະຫຼອດຮອດນັກທ່ອງທ່ຽວທັງພາຍໃນ ແລະ ຕ່າງປະເທດ ທີ່ມາທ່ອງທ່ຽວຢູ່ນະຄອນຫຼວງວຽງຈັນ ເຂົ້າຮ່ວມກິດຈະກຳໃນງານບຸນອອກພັນສາປະວໍລະນາທີ່ວັດອົງຕື້ ແນໃສ່ເຮັດໃຫ້ບັນຍາກາດມີຄວາມຄຶກຄື້ນ ແລະ ຮັກສາໄດ້ຮີດຄອງປະເພນີອັນດີງາມຂອງຊາດລາວເຮົາ ສະເພາະແມ່ຍິງຈະສົ່ງເສີມໃຫ້ນຸ່ງສິ້ນບ່ຽງແພເຂົ້າວັດ ເພື່ອເປັນການເຄົາລົບ ແລະ ໃຫ້ກຽດສະຖານທີ່ພຸດທະສາສະໜາ ທັງເປັນການສົ່ງເສີມແມ່ຍິງລາວຮັກສາການນຸ່ງຖືອັນດີງາມຕື່ມອີກ.
Cr.VientianeMai
ຮູບພາບ ເປັນພຽງສ່ວນປະກອບ
Hits: 4
