ກົມຊົນລະປະທານ ກຽມຟື້ນຟູ-ສ້ອມແປງ ຊົນລະປະທານທັງໝົດ 242 ໂຄງການໃນຂອບເຂດທົ່ວປະເທດ ເປັນຕົ້ນແມ່ນຄອງເໝືອງ, ລະບົບຫົວງານ, ອ່າງເກັບນ້ຳ, ຝາຍນ້ຳລົ້ນ, ປະຕູນ້ຳ, ຈັກສູບນ້ຳ; ເພື່ອທົດແທນຜົນເສຍຫາຍໃນການຜະລິດລະດູຝົນຜ່ານມາ, ທັງຮັບປະກັນໃຫ້ການຜະລິດລະດູແລ້ງທ່ວງທັນກັບສະພາບການ ເພື່ອຮັບປະກັນການຄ້ຳປະກັນສະບຽງອາຫານ.
ທ່ານ ໄມກອງ ພອນພົມມະວົງ ຫົວໜ້າກົມຊົນລະປະທານ ໃຫ້ສຳພາດວ່າ: ຍ້ອນໄພພິບັດທາງທໍາມະຊາດໄດ້ເກີດຂຶ້ນໃນເດືອນມິຖຸນາ-ກໍລະກົດຜ່ານມາ ເຮັດໃຫ້ລະບົບຊົນລະປະທານໃນຂອບເຂດທົ່ວປະເທດໄດ້ຮັບຜົນກະທົບທັງໝົດ 650 ໂຄງການ, ຊຶ່ງຄວາມເສຍຫາຍເບື້ອງຕົ້ນຕາມການປະເມີນແມ່ນ 238 ຕື້ກີບ, ພາຍຫຼັງນ້ຳບົກ ພາກສ່ວນກ່ຽວຂ້ອງ ໄດ້ມີການແຕ່ງຕັ້ງຄະນະຮັບຜິດຊອບ ເພື່ອລົງເກັບກຳຂໍ້ມູນຜົນກະທົບ ສົມທົບກັບທ້ອງຖິ່ນ ຊຶ່ງຄັດຈ້ອນເອົາແຕ່ໂຄງການທີ່ຈຳເປັນ, ຈຶ່ງເຫັນວ່າໃນຂອບເຂດທົ່ວປະເທດເສຍຫາຍທັງໝົດ 242 ໂຄງການ ນັບທັງຄອງເໝືອງ ແລະລະບົບຫົວງານ ທີ່ມີການເປ່ເພ ຕ້ອງໄດ້ມີການສ້ອງແປງຈຶ່ງສາມາດໃຊ້ງານໄດ້ ໂດຍສະເພາະ ການຜະລິດລະດູແລ້ງສົກປີ 2018-2019.
ດັ່ງນັ້ນ ລັດຖະບານໄດ້ມີການຄົ້ນຄວ້າ ແລະຈັດສັນງົບປະມານ 35 ຕື້ກີບ ເພື່ອຟື້ນຟູ-ສ້ອມແປງສຸກເສີນໃນຈຳນວນ 242 ໂຄງການ ລວມມີ 11 ແຂວງໃນຂອບເຂດທົ່ວປະເທດ ເພື່ອແນໃສ່ເຮັດໃຫ້ການສະໜອງນ້ຳໃນເຂດເນື້ອທີ່ຊົນລະປະທານລະດູແລ້ງປີ 2018-2019 ທັນກັບສະພາບການ ໂດຍສະເພາະແມ່ນ ການຜະລິດເຂົ້ານາແຊງໃຫ້ໄດ້ 1 ແສນເຮັກຕາ ແລະພືດ 1,85 ແສນເຮັກຕາ, ຕາມມະຕິຕົກລົງຂອງກອງປະຊຸມເປີດກວ້າງ ກະຊວງກະສິກຳ ແລະປ່າໄມ້ ທີ່ໄດ້ເຫັນດີເປັນເອກະພາບຕົວເລກແຜນການຜະລິດລະດູແລ້ງ ທົດແທນຜົນເສຍຫາຍໃນການຜະລິດລະດູຝົນຜ່ານມາ, ໃນນັ້ນມີ 65 ພັນເຮັກຕາ ແມ່ນນອນຢູ່ໃນເຂດຊົນລະປະທານ.