ບໍລິສັດ ABB ປະເທດໄທ ຈຳກັດ ຈັດສຳມະນາພາຍໃຕ້ຫົວຂໍ້ “ເຮົາຈະກ້າວໄປຮູ້ການພັດທະນາໃນດ້ານອຸດສາຫະກຳເຕັກໂນໂລຊີທີ່ທັນສະໄໝ” ແນໃສ່ເພື່ອເປັນການໃຫ້ຄວາມຮູ້ ແລະ ອັບເດດຂໍ້ມູນທາງດ້ານເນັກນິກທີ່ກ່ຽວຂ້ອງກັບອຸດສາຫະກຳໃນອະນາ ຄົດໃຫ້ຜູ້ທີ່ມີຄວາມສົນໃຈໂດຍສະເພາະຜູ້ປະກອບການໄດ້ຮັບຮູ້ ເຂົ້າໃຈ ແລະ ກ້າວໄປສູ່ການພັດທະນາຮ່ວມກັນໃນຕໍ່ໜ້າ.
ສໍາມະນາດັ່ງກ່າວຈັດຂຶ້ນທີ່ທ້າຍອາທິດຜ່ານມາ, ທີ່ໂຮງແຮມຄຣາວພາຊາ ໂດຍເປັນປະທານຂອງທ່ານ ໄຊຢົດ ປິຍະວັນນະຣັດ ກຳມະການຜູ້ຈັດການບໍລິສັດ ABB ປະຈຳປະເທດໄທ ມຽນມາ ກຳປູເຈຍ ແລະ ລາວ ມີ ທ່ານ ພູມມີ ເນຕິບັນດິດ ຮອງຜູ້ອຳນວຍການໃຫຍ່ບໍລິສັດ ຜະລິດ ໄຟຟ້າລາວ ມະຫາຊົນ ທ່ານ ກິຕິກອນ ກຳນາຣາຍ ຜູ້ຊ່ວຍຜູ້ຈັດການຝ່າຍການຕະຫຼາດບໍລິສັດ ABB ປະຈຳລາວ ແລະ ແຂກຖືກເຊີນເຂົ້າຮ່ວມ.
ທ່ານ ກິຕິກອນ ກຳນາຣາຍ ໄດ້ກ່າວວ່າ: ບໍລິສັດ ABB ເປັນຜູ້ນຳ ພາເຕັກໂນໂລຊີທີ່ກ້າວໜ້າໃນຂົວໄຟຟ້າ ຜະລິດຕະພັນໄຟຟ້າ ອຸດ ສາຫະກຳ ແລະ ຫຸ່ນຍົນ ລວມທັງການເຄື່ອນໄຫວບໍລິການລູກຄ້າໃນດ້ານອຸດສາຫະກຳ ການຂົນສົ່ງ ແລະ ໂຄງລ່າງຟື້ນຖານທົ່ວ ໂລກ ບໍລິສັດສ້າງມາໄດ້ຫຼາຍກວ່າ 130 ປີ ແລະ ໄດ້ດຳເນີນໃນ 100 ກວ່າປະເທດ ສະນັ້ນ ABB ຈຶ່ງມີຄວາມມຸ້ງໝັ້ນໃນການນຳໃຊ້ເຕັກນິກທາງເຕັກໂນໂລຊີທີ່ທັນສະໄໝ ແລະ ມີມາດຖານມາໃຊ້ໃນລາວ ເປັນຕົ້ນ ອຸປະກອນໄຟຟ້າໃນຄົວເຮືອນ ອຸປະກອນໄຟຟ້າໃນອຸດສາຫະກຳ ມີນະວັດຕະກຳໃນການໃຊ້ຫຸ່ນຍົນມາແທນການໃຊ້ແຮງງານຄົນ.
ສຳລັບໃນງານຄັ້ງນີ້ ABB ໄດ້ນຳເອົາອຸປະກອນຢ່າງຫຼວງຫຼາຍມາຈັດວາງສະແດງ ແລະ ເຝີກອົບຮົມໃຫ້ບັນດາ ນັກວິຊາການໃນລາວ ເພື່ອຮຽນຮູ້ຂໍ້ມູນໃໝ່ໆ ໂດຍສະເພາະແມ່ນເຕັກໂນໂລຊີຮຸ່ນໃໝ່ທີ່ໃຊ້ເຂົ້າໃນຂະແໜງການຜະລິດໄຟຟ້າ ບໍ່ແຮ່ ແລະ ຂະແໜງການອຸດສາຫະກຳອື່ນໆ.
Cr.Vientianemai