ຫວ່າງບໍ່ດົນມານີ້, ທີ່ສະຖານເອກອັກຄະຣາຊະທູດໄທ ປະຈຳ ສປປ ລາວ, ໄດ້ຈັດພິທີສະເຫລີມສະຫລອງ ເນື່ອງໃນໂອກາດວັນຊາດໄທ, ໃຫ້ກຽດເຂົ້າຮ່ວມຂອງທ່ານ ສົມມາດ ພົນເສນາ ລັດຖະມົນຕີ ກະຊວງຊັບພະຍາກອນ ແລະ ສິ່ງແວດລ້ອມ, ທ່ານ ນາງ ຄຳເພົາ ເອີນທະວັນ ຮອງລັດຖະມົນຕີ ກະຊວງການຕ່າງປະເທດ ມີບັນດາ ຮອງລັດຖະມົນຕີ, ທູຕານຸທຸດ ແລະ ຜູ້ຕາງໜ້າ ອົງການຈັດຕັ້ງສາກົນ, ພ້ອມດ້ວຍແຂກຖືກເຊີນ ເຂົ້າຮ່ວມ.
ໂອກາດດັ່ງກ່າວ, ທ່ານ ກຽດຕິຄຸນ ຊາດປະເສີດ ເອກອັກຄະຣາຊະທູດໄທ ປະຈຳ ສປປ ລາວ ໄດ້ກ່າວວ່າ: ວັນທີ 5 ທັນວາ ຂອງທຸກປີ ນອກຈາກວັນຊາດແລ້ວ ຍັງເປັນວັນສະເຫລີມ ພະຊົນມະພັນສາ ຂອງພະບາດສົມເດັດ ພະປະຣະມິນທະຣະມະຫາພູມິພົນ ອະດຸນຍະເດດ ບໍຣົມມະນາດບໍພິດ ແລະ ວັນພໍ່ແຫ່ງຊາດ ແຫ່ງ ຣາຊະອານາຈັກໄທ ນຳອີກ.
ທ່ານ ກຽດຕິຄຸນ ຊາດປະເສີດ ກ່າວຕື່ມວ່າ: ໄທ ແລະ ລາວ ປຽບເໝືອນຍາດສະໜິດມິດສະຫາຍ, ມີວິຖີຊີວິດ, ວັດທະນະທຳຮ່ວມກັນ ແລະ ມີຄວາມເຂົ້າເຂົ້າໃຈກັນ. ສ່ວນໃນລະດັບລະຫວ່າງປະເທດ ຄວາມສຳພັນທາງການທູດ ໄດ້ພັດທະນາຢ່າງຕໍ່ເນື່ອງ ລະຫວ່າງໄທ-ລາວ ມີຄວາມຮ່ວມມືຢ່າງໃກ້ຊິດ ແລະ ເປັນຮູບປະທຳໃນທຸກລະດັບ, ມີການແລກປ່ຽນກັນໃນລະດັບສູງ ຢ່າງຕໍ່ເນື່ອງ. ນອກຈາກນີ້, ປະເທດລາວ ແລະ ໄທ ມີຄວາມເຊື່ອມໂຍງຢ່າງໃກ້ຊິດ ທັງດ້ານໂຄງສ້າງພື້ນຖານ ທາງກາຍະພາບ, ດ້ານການເງິນ ແລະ ດ້ານພົນລະເມືອງ ສະແດງອອກມູນຄ່າ ດ້ານການຄ້າລະຫວ່າງ ໄທ ແລະ ລາວ ປະມານ 5 ພັນລ້ານໂດລາສະຫະລັດຕໍ່ປີ ແລະ ມີແນວໂນ້ມເພີ່ມສູງຂຶ້ນ.
ໄທເປັນແຫລ່ງນຳເຂົ້າອັນດັບໜຶ່ງ ແລະ ເປັນຕະຫລາດສົ່ງອອກ ອັນດັບສອງຂອງ ສປປ ລາວ, ເຊິ່ງນັກລົງທຶນໄທ ເປັນນັກລົງທຶນຕ່າງປະເທດ ອັນດັບ 3 ທີ່ເຂົ້າມາລົງທຶນຢູ່ ສປປ ລາວ ສ່ວນຫລາຍແມ່ນການລົງທຶນ ພັດທະນາໂຄງການຜະລິດ ກະແສໄຟຟ້າ ທັງເປັນຜູ້ຊື້ໄຟຟ້າລາຍໃຫຍ່ ອັນດັບໜຶ່ງຈາກລາວ. ນອກຈາກນີ້, ສອງປະເທດລາວ ແລະ ໄທ ຍັງຮ່ວມມືກັນດ້ານ ການເຊື່ອມໂຍງ ລະບົບຄົມ ມະນາຄົມຂົນສົ່ງ ແລະ ໂລຈິດສຕິກພາຍໃນ ພາກພື້ນລຸ່ມແມ່ນ້ຳຂອງ ແລະ ປະເທດອາຊຽນ.
#insidelaos
Cr.KPL
ຮູບປະກອບ: BigblueAgencylaos
