ອີງຕາມຂໍ້ມູນ ຂອງສະຫະພັນແມ່ຍິງ ແຂວງອຸດົມໄຊ ໃຫ້ຮູ້ວ່າ:
ອີກບັນຫາໜຶ່ງທີ່ກໍາລັງເປັນປະກົດການຫຍໍ້ທໍ້ ໃນສັງຄົມ ປີ 2018, ມີເອື້ອຍນ້ອງແມ່ຍິງ ພາຍໃນແຂວງ ໂດຍສະເພາະແມ່ນ 3 ເມືອງຄື ເມືອງນາຫມໍ້, ເມືອງໄຊ ແລະ ເມືອງງາ ໄດ້ແຕ່ງງານກັບຄົນຕ່າງປະເທດ ເປັນຕົ້ນແມ່ນຄົນຈີນ ທີ່ເຂົ້າມາເຮັດວຽກງານ ໃນໂຄງການກໍ່ສ້າງເສັ້ນ ທາງລົດໄຟ ລາວ-ຈີນ ແລະ ເຄື່ອນໄຫວໃນວຽກງານອື່ນໆ ນັ້ນ ແມ່ນມີຕົວເລກເພີ່ມຂຶ້ນຢ່າງຕໍ່ເນື່ອງ ເຊິ່ງລວມທັງຫມົດ 132 ຄູ່. ໃນນີ້, ມີຜູ້ແຕ່ງງານທີ່ບໍ່ຖືກຕ້ອງຕາມລະບຽບກົດຫມາຍ ເຖິງ 92 ຄູ່ ແລະ ມີທ່າອ່ຽງຈະເພີ່ມຂຶ້ນໃນປີໜ້າ.
ສຳລັບສາເຫດທີ່ເຮັດໃຫ້ເອື້ອຍນ້ອງແມ່ຍິງ ແຕ່ງງານກັບຄົນຕ່າງປະເທດ ແມ່ນມາຈາກຫລາຍປັດໄຈ ເປັນຕົ້ນແມ່ນ ຖືກຕົວະຍົວະຫລອກລວງ, ຊື້ຈ້າງຈອບອອຍ, ຍ້ອນຄອບຄົວທຸກຍາກ ແລະອື່ນໆ.
ສ່ວນແມ່ຍິງທີ່ແຕ່ງ ດອງບໍ່ຖືກຕ້ອງຕາມກົດຫມາຍ ສ່ວນໃຫຍ່ແມ່ນຈະຖືກຊັກຊວນ ໃຫ້ເດີນທາງໄປນໍາຝ່າຍຊາຍທີ່ຕ່າງປະເທດ, ຈາກນັ້ນ ກໍຈະຖືກຂາຍຕໍ່ ຫລື ເອົາເປັນເມຍຄົນບ້າໄບ້, ເສຍຈິດ, ຄົນພິການ, ເຖົ້າແກ່, ຖືກບັງຄັບໃຫ້ເປັນໂສເພນີ, ອອກແຮງງານໜັກ ເກີນ 8 ຊົ່ວໂມງ ໂດຍບໍ່ໄດ້ຮັບຄ່າຕອບແທນ, ພ້ອມທັງປິດທຸກເສັ້ນທາງ ໃນການຕິດຕໍ່ຫາຄອບຄົວ, ຍາດຕິພີ່ນ້ອງ ຖ້າປະຕິເສດຈະຖືກນາຍຈ້າງທຸບຕີ ແລະ ທໍລະມານ ເຮັດແມ່ຍິງຕ້ອງຍິນຍອມ.
ຕໍ່ກັບບັນຫາດັ່ງກ່າວ ທາງພາກສ່ວນກ່ຽວຂ້ອງ ໂດຍສະເພາະ ແມ່ນສະຫະພັນແມ່ຍິງແຂວງ ໄດ້ມີການລົງເຄື່ອນໄຫວໂຄສະນາເຜີຍແຜ່ກົດຫມາຍ ແລະ ປຸກລະດົມຈິດໃຈແມ່ຍິງ ລວມທັງຜູ້ປົກຄອງ ໃຫ້ຮັບຮູ້ເຖິງກົນອຸບາຍຕົວະຍົວະຂອງກຸ່ມຄົນບໍ່ດີ.
#insidelaos
#ອິນໄຊລາວ
ພາບປະກອບ: http://raosukunfung.com
ທີ່ມາ: KPL