ໂດຍປະຕິບັດຕາມກົດໝາຍວ່າດ້ວຍທາງຫຼວງ ກົດໝາຍວ່າດ້ວຍຜັງເມືອງ ຄຳສັ່ງຂອງລັດຖະມົນຕີກະຊວງໂຍທາທິການ ແລະ ຂົນສົ່ງ (ຍທຂ) ວ່າດ້ວຍການຄຸ້ມຄອງເຂດສະຫງວນຂອງທາງຫຼວງ ຄຳສັ່ງແນະນຳຂອງທ່ານເຈົ້າຄອງນະຄອນຫຼວງວຽງຈັນ (ນວ) ວ່າດ້ວຍການຄຸ້ມຄອງຄວາມເປັນລະບຽບຮຽບຮ້ອຍ ໃນການຈະລາຈອນຕາມເສັ້ນທາງ ການຄຸ້ມຄອງການປຸກສ້າງ-ສ້ອມແປງ ແລະ ການຕິດຕັ້ງປ້າຍໂຄສະນາຕ່າງໆໃນ ນວ ແລະ ຂໍ້ຕົກລົງວ່າດ້ວຍການຈັດສັນຄວາມບໍ່ເປັນລະບຽບຮຽບຮ້ອຍໃນຕົວເມືອງ ແລະ ຊານເມືອງຂອງເຈົ້າຄອງ ນວ ກໍຄືເມືອງຫາດຊາຍຟອງວາງອອກ.
ຄະນະຈັດສັນຄວາມບໍ່ເປັນລະບຽບຮຽບຮ້ອຍຫ້ອງການໂຍທາທິການ ແລະ ຂົນສົ່ງເມືອງຫາດຊາຍຟອງ ນວ ນຳໂດຍທ່ານ ພູທົງ ລັດຕະນະວົງ ຫົວໜ້າຫ້ອງການ ຍທຂ ເມືອງຫາດຊາຍຟອງເປັນຜູ້ຊີ້ນຳວຽກງານດັ່ງກ່າວ ໄດ້ເຄື່ອນໄຫວຕາມພາລະບົດບາດຢ່າງຕັ້ງໜ້າ ໂດຍສຸມໃສ່ຈັດຕັ້ງປະຕິບັດວຽກງານຈັດສັນຄວາມບໍ່ເປັນລະບຽບຮຽບຮ້ອຍຕາມເສັ້ນທາງສາຍຫຼັກ ໃຫ້ຢູ່ຂອບເຂດການຄຸ້ມຄອງ.
ທ່ານ ແສງສຸລິດ ສະກຸນສຸກ ຫົວໜ້າໜ່ວຍງານແຜນການ ຫ້ອງການ ຍທຂ ເມືອງ ກ່າວວ່າ: ເພື່ອຈັດຕັ້ງຜັນຂະຫຍາຍຂໍ້ຕົກລົງທີ່ກ່າວມາຂ້າງເທິງ ໃຫ້ເປັນແຜນງານໃນການຈັດຕັ້ງປະຕິບັດໃຫ້ປາກົດຜົນເປັນຈິງ ໂດຍສົມທົບກັບພາກສ່ວນກ່ຽວຂ້ອງ ໄດ້ລົງເຄື່ອນໄຫວຈັດສັນຕາມເສັ້ນທາງໃນໄລຍະຜ່ານມາ 3 ເສັ້ນຄື: ຖະໜົນທ່າເດື່ອ ໄລຍະທີ 1 ຍາວ 1,9 ກິໂລແມັດ ເຮັດບົດບັນທຶກມ້າງເທີບ-ເງີບ 97 ຈຸດ ເຮັດບົດບັນທຶກປ້າຍ 41 ປ້າຍ ຮື້-ຖອນ 3 ປ້າຍ ໄລຍະທີ 2 ຍາວ 11 ກິໂລແມັດ ປັດຈຸບັນ ກຳລັງສຳຫຼວດເກັບກຳຂໍ້ມູນຖະໜົນກຳແພງເມືອງ ຍາວ 2,8 ກິໂລແມັດ ຖະໜົນດົງຄຳຊ້າງ-ໜອງໄຮ-ນາໄຫ ຍາວ 6,4 ກິໂລແມັດ ປະຕິບັດໄດ້ 3,69 ກິໂລແມັດ ຮື້-ຖອນປ້າຍໂຄສະນາທີ່ບໍ່ຖືກລະບຽບໄດ້ 64 ປ້າຍ ປ້າຍນ້ອຍທີ່ຕິດຕາມຮົ້ວກຳແພງທົ່ວໄປ 121 ປ້າຍ ຍົກຍ້າຍຕູບຂາຍເຄື່ອງ 3 ຈຸດ
ສະເພາະຢູ່ດົງຄຳຊ້າງ ໄດ້ຈັດຕັ້ງປະຕິບັດສຳເລັດ ພ້ອມທັງໄດ້ສົ່ງລາຍງານໃຫ້ ນວ ຮັບຊາບ ປັດຈຸບັນກຳລັງຮື້-ຖອນປ້າຍໂຄສະນາຕ່າງໆຢູ່ຖະໜົນທ່າເດື່ອ ໂດຍຂັ້ນຕອນການຈັດຕັ້ງປະຕິບັດ ຄະນະໄດ້ເຜີຍແຜ່ລະບຽບການຕ່າງໆທີ່ກ່ຽວຂ້ອງໃຫ້ປະຊາຊົນທີ່ຢູ່ຕາມແຄມທາງໃຫ້ຮັບຊາບ ສ້າງຄວາມເຂົ້າໃຈໃຫ້ການຮ່ວມມື ເພື່ອເຮັດໃຫ້ການຈັດຕັ້ງປະຕິບັດວຽກງານຂອງຄະນະກຳມະການໄດ້ມີຄວາມສະດວກ ແລະ ສ້າງໃຫ້ສັງຄົມມີຄວາມເປັນລະບຽບດີຂຶ້ນ.
ທີ່ມາ: ວຽງຈັນໃໝ່