ກອງບັນຊາການ ປກສ ເມືອງຄູນ ແຂວງຊຽງຂວາງ ໄດ້ທໍາລາຍອາວຸດເຖື່ອນ ແລະ ອາວຸດລ່າເນື້ອ ຈໍານວນ 1.000 ກວ່າກະບອກ ແລະ ເຄື່ອງຊັອດປາ ຈໍານວນ 11 ເຄື່ອງ ໃນວັນທີ 30 ມັງກອນ 2019, ມີ ທ່ານ ພອນມາລາ ວັນນາຮັກ ເຈົ້າເມືອງໆຄູນ, ພ້ອມດ້ວຍຫົວໜ້າ ປກຊ-ປກສ ເມືອງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ພັທ ເນັ້ງຊົ່ງ ຮອງຫົວໜ້າກອງບັນຊາການ ປກສ ເມືອງຄູນ ໃຫ້ຮູ້ວ່າ: ໄລຍະຜ່ານມາ, ຄະນະກອງບັນຊາການ ແລະ ຄະນະຮັບຜິດຊອບ ໄດ້ປະຕິບັດຕາມດໍາລັດຂອງທ່ານນາຍົກລັດຖະ ມົນຕີ ສະບັບເລກທີ 973/ນຍ ວ່າດ້ວຍການຈັດຕັ້ງຄຸ້ມຄອງອາວຸດທາດລະເບີດ ແລະ ແຈ້ງ ການເພີ່ມເຕີມຂອງປະທານປ້ອງກັນຊາດ-ປ້ອງກັນຄວາມສະຫງົບ ວ່າດ້ວຍການກວດກາ, ຄຸ້ມຄອງ ແລະ ເລີກຮື້ອາວຸດເຖື່ອນທຸກປະເພດຢູ່ທົ່ວແຂວງຊຽງຂວາງ ພ້ອມນໍາເອົາໄປໂຄສະນາເຜີຍແຜ່ໃຫ້ປະຊາຊົນບັນດາເຜົ່າໃນທົ່ວເມືອງຄູນ ມີຄວາມເຂົ້າໃຈ ແລະ ເຊື່ອມຊຶມມະຕິ-ຄໍາສັ່ງຂອງຂັ້ນເທິງເປັນຢ່າງດີ, ມີຄວາມຕື່ນຕົວຈິງໃຈນໍາເອົາອາວຸດທີ່ມີໄວ້ໃນຄອບຄອງ ມາມອບໃຫ້ເຈົ້າໜ້າທີ່.
ຜ່ານການປຸກລະດົມ, ປະຊາຊົນພາຍໃນເມືອງມີຈໍານວນທີ່ຫຼາຍຈິງໃຈນໍາເອົາປືນເຂົ້າມາມອບໃຫ້ເຈົ້າໜ້າທີ່; ໃນນີ້, ເກັບກູ້ຈາກກຸ່ມຊຽງ ມີປືນແກັບ ຈໍານວນ 112 ກະບອກ, ປືນຫຼວງ AK 1 ກະບອກ; ກຸ່ມສໍາພັນໄຊ ປືນແກັບ 224 ກະບອກ, ປືນຫຼວງ KB 1 ກະບອກ; ກຸ່ມສັນຫຼວງ 29 ກະບອກ; ກຸ່ມນໍ້າອຸ່ນ 144 ກະບອກ; ກຸ່ມນໍ້າພານ 11 ກະບອກ; ກຸ່ມແກ່ວແສດ 177 ກະບອກ; ກຸ່ມງານ 286 ກະບອກ; ກຸ່ມລ້ອງຊັ້ນ 140 ກະບອກ; ກຸ່ມຍຸນ 35 ກະບອກ ແລະ ໄດ້ຮັບປືນແກັບຈາກກອງບັນຊາການທະຫານເມືອງ 27 ກະບອກ, ໝໍ້ຊັອດປາ 11 ເຄື່ອງ, ໝາກແຕກ 5 ໜ່ວຍ ແລະ ເຈົ້າໜ້າທີ່ຢຶດໄດ້ປືນຄໍຫັກ 5 ກະບອກ, ປືນແກັບ 10 ກະບອກ, CK 1 ກະບອກ ລວມທັງໝົດ 1.201 ກະບອກ ຖືກທໍາລາຍຖິ້ມດ້ວຍການຈູດ ແລ້ວຝັງດິນ.
ຂໍ້ມູນຈາກ: ນສພ ຄວາມສະຫງົບ