ຊ່ວງນີ້, ປາກົດວ່າ ຄົນຂໍທານ ເພີ່ມຂຶ້ນຫຼາຍຢູ່ໃນຕົວເມືອງໃຫຍ່ ໂດຍສະເພາະແມ່ນນະຄອນຫຼວງວຽງຈັນ ເຊິ່ງສ້າງພາບພົດ ແລະຄວາມບໍ່ເປັນລະບຽບຮຽບຮ້ອຍໃຫ້ແກ່ສັງຄົມ.
ໂດຍສະເພາະແມ່ນເສັ້ນທາງນ້ຳພຸ, ເສັ້ນທາງແຄມຂອງ ແລະທຸກເສັ້ນທາງທີ່ຄົນສັນຈອນໄປມາ ປາກົດວ່າ ມີຄົນຂໍທານບໍ່ນ້ອຍກວ່າ 03 ຄົນ ຍ່າງເຂົ້າຮ້ານນັ້ນ ອອກເຮືອນນີ້.
ແຕ່ຄົນທີ່ມາຂໍທານນັ້ນ, ຊ້ຳພັດຮ່າງກາຍດີໝົດທຸກຄົນ ເຊິ່ງຜິດກັບຄວາມຄິດຂອງພວກເຮົາທີ່ເຄີຍຄິດວ່າ ຄົນຂໍທານນັ້ນ ສ່ວນຫຼາຍເປັນພວກຮ່າງກາຍບໍ່ສົມປະກອບ ຫຼືໃບ້ບ້າເສຍຈິດ.
ຕາມຂໍ້ມູນຂອງຫ້ອງການສັງຄົມສົງເຄາະ “ຄົນຂໍທານ” ທີ່ບໍລິເວນນະຄອນຫຼວງວຽງຈັນ ມີ 4 ປະເພດຄື: ຄົນພິການ, ຄົນໃບ້ບ້າເສຍຈິດ, ຄົນຕິດຢາ ແລະຄົນທຳມະດາທີ່ຮ່າງກາຍສົມປະກອບ.
ປາກົດວ່າ ພວກຄົນຂໍທານນີ້, ພາກສ່ວນທີ່ກ່ຽວຂ້ອງ ກໍແກ້ບັນຫາມາຕະຫຼອດ ແຕ່ວ່າຈະໃຫ້ຫາຍຂາດນັ້ນ ກໍເປັນໄປໄດ້ຍາກ ຍ້ອນວ່າ “ລະດູນີ້ ເປັນລະດູຂໍທານ”.
ຍ້ອນ:
- ລະດູການເຮັດໄນ່ທຳນາຂອງຊາວບ້ານສິ້ນສຸດ.
- ຢູ່ທ້ອງຖິ່ນນັ້ນ, ຊີວິດການເປັນຢູ່ທຸກຍາກຂາດເຂີນ.
- ທຳມະຊາດບໍ່ເອື້ອອຳນວຍ (ດິນດອນເປັນປ່າໂຄກ ປູກຫຍັງບໍ່ຄ່ອຍໄດ້).
*ເຫດຜົນເຫຼົ່ານີ້ ເລີຍເຮັດໃຫ້ເຂົາເຈົ້າມາຂໍທານ.
ສ່ວນຫຼາຍແລ້ວ, ທີ່ຜູ້ຂຽນພົບພໍ້ ແລະເວົ້າປາໄສນຳພວກຂໍທານຜ່ານມາ ແມ່ນເປັນຄົນມາຈາກແຂວງສະຫວັນນະເຂດ, ແຂວງສາລະວັນ.
ທາງການເພິ່ນກໍໄດ້ສຶກສາອົບຮົມກຸ່ມຄົນເຫຼົ່ານີ້, ເພື່ອບໍ່ໃຫ້ມາຂໍທານອີກ ແຕ່ໄດ້ຮັບຜົນນ້ອຍ ເພາະວ່າ ພວກເຂົາຂໍທານກັນມາຈົນເປັນນິດໄສແລ້ວ ບໍຂໍທານແມ່ນບໍ່ໄດ້.
ຈັ່ງໃດ? ກໍຂໍເອົາໃຈຊ່ວຍທາງການເພິ່ນ
ແລະພວກເຮົາເຊັ່ນກັນ ກ່ອນຈະໃຫ້ສິ່ງໃດແກ່ກຸ່ມຄົນເຫຼົ່ານີ້, “ຕ້ອງສອນໃຫ້ເຂົາຈັບປາເປັນ ແຕ່ຢ່າເອົາໂຕປາໃຫ້ເຂົາກິນ”.
ຮູບພາບຈາກ: RFALAOS
Hits: 4
