ລັດຖະບານ ສ.ເກົາຫຼື ຈະສືບຕໍ່ຊ່ວຍເຫຼືອປັບປຸງ ແລະຟື້ນຟູ ຊີວິດການເປັນຢູ່ ຂອງປະຊາຊົນຜູ້ທີ່ໄດ້ຮັບຜົນກະທົບ ຈາກສັນເຂື່ອນເຊປຽນ-ເຊນ້ຳນ້ອຍແຕກ ຢູ່ເມືອງສະໜາມໄຊ ແຂວງ ອັດຕະປື ໃນປີ 2018 ຜ່ານມາເປັນຈຳນວນເງິນ 12 ລ້ານໂດລາສະຫະລັດ, ໃນ 5 ຂະແໜງການເປັນຕົ້ນ ດ້ານສາທາລະນະສຸກ, ການປົກປ້ອງເດັກນ້ອຍ, ສຶກສາ, ຊ່ວຍປັບປຸງຊີວິການເປັນຢູ່ຂອງປະຊາຊົນ ແລະ ການຄຸ້ມຄອງຄວາມສ່ຽງດ້ານໄພພິບັດ ເປັນໄລຍະເວລາ 5 ປີ (2019-2023), ເຊິ່ງຈະເລີ່ມຈັດຕັ້ງປະຕິບັດໂຄງການ ໃນເດືອນພຶດສະພາ 2019 ນີ້.
ທ່ານ ຊິນ ຊອງ ຊຸນ ເອກອັກຄະລັດຖະທູດ ສ.ເກົາຫລີ ປະຈຳ ສປປ ລາວ ກ່າວໃນພິທີຖະແຫຼງຂ່າວ ກ່ຽວກັບການຊ່ວຍເຫລືອ ຂອງ ສ.ເກົາຫລີ ຕໍ່ເຂດທີ່ໄດ້ຮັບຜົນກະທົບກໍຄືປະຊາຊົນ ເມືອງສະໜາມໄຊ ແຂວງ ອັດຕະປື ໃນວັນທີ 5 ມີນາ 2019 ທີ່ນະຄອນຫລວງວຽງຈັນ ວ່າ: ຫຼັງຈາກໄດ້ຮັບຂ່າວວ່າເກີດເຫດການແລ້ວ ລັດຖະບານເກົາຫຼີ ກໍ່ໄດ້ຈັດສົ່ງທີມງານກູ້ໄພສຸກເສີນມາຊ່ວຍເຫຼືອຈຳນວນ 3 ຄັ້ງຕິດຕໍ່ກັນ ພ້ອມທັງໄດ້ໃຫ້ການຊ່ວຍເຫຼືອດ້ານວັດຖຸ ແລະເງິນຄຳ, ໃຫ້ການຊ່ວຍເຫຼືອໃນການຝຶກອົບຮົມເພື່ອປົກປ້ອງເດັກໂດຍມີອົງການ NGO ແລະອົງການຈັດຕັ້ງສາກົນເຂົ້າຮ່ວມ, ພິເສດລັດຖະບານເກົາຫຼີໄດ້ໃຫ້ການຊ່ວຍເຫຼືອເຂົ້າສານຈຳນວນ 1 ພັນໂຕນ ເພື່ອນຳໄປຊ່ວຍເຫຼືອບັນເທົາທຸກແກ່ປະຊາຊົນທີ່ໄດ້ຮັບຜົນກະທົບ.
ປະຈຸບັນເຖິງວ່າທາງຄະນະສະເພາະກິດ ຍັງບໍ່ໄດ້ປະກາດຜົນຂອງການສືບສວນສາເຫດເຂື່ອນແຕກອອກມາກໍ່ຕາມ ແຕ່ລັດຖະບານ ແລະບໍລິສັດເກົາຫຼີ ກໍໄດ້ຮັບຜິດຊອບຢ່າງເຕັມທີ່ຕໍ່ປະຊາຊົນທີ່ໄດ້ຮັບຜົນເສຍຫາຍຈາກເຫດການດັ່ງກ່າວ, ປະຈຸບັນລັດຖະບານເກົາຫຼີ ກຳລັງຂຶ້ນແຜນຫຼາຍຢ່າງ ເພື່ອແນໃສ່ການຟື້ນຟູຊີວິດການເປັນຢູ່ຂອງປະຊາຊົນໃນເຂດທີ່ໄດ້ຮັບອຸທົກກະໄພ ແຕ່ສຳລັບເນື້ອໃນລາຍລະອຽດ ລະທິດທາງການຊ່ວຍເຫຼືອໃນສະເພາະໜ້ານັ້ນ ຍັງຈະໄດ້ມີການປຶກສາຫາລືກັນຕື່ມອີກ ເພື່ອໃຫ້ສອດຄ່ອງກັບສະພາບຄວາມເປັນຈິງ.
ໄປຄຽງຄູ່ກັບການຊ່ວຍເຫຼືອເພື່ອຟື້ນຟູຊີວິດການເປັນຢູ່ຂອງປະຊາຊົນທີ່ໄດ້ຮັບຜົນກະທົບຢູ່ແຂວງອັດຕະປືແລ້ວ, ລັດຖະບານສ.ເກົາຫຼີຍັງຈະເພີ່ມງົບປະມານການຊ່ວຍເຫຼືອດ້ານ ODA ແກ່ລາວຕາມນະໂຍບາຍໃໝ່ສູ່ພາກໃຕ້ຂອງລັດຖະບານສ.ເກົາຫຼີເນື່ອງຈາກ ສປປ ລາວ ເປັນປະເທດບຸລິມະສິດເພື່ອໃຫ້ການຊ່ວຍເຫຼືອເປັນພິເສດຂອງ ສ.ເກົາຫຼີ.
ສຳລັບການຊ່ວຍເຫຼືອຂອງລັດຖະບານສ.ເກົາຫຼີ ໃນໄລຍະຜ່ານມາສະເພາຢູ່ເມືອງສະໜາມໄຊແຂວງອັດຕະປື ມີມູນຄ່າທັງໝົດ 1.200,000 ໂດລາສະຫະລັດ ແລະໃນຕໍ່ໜ້າຄາດວ່າຈະໃຫ້ການຊ່ວຍເຫຼືອ 12 ລ້ານໂດລາສະຫະລັດ.
