ທີ່ກະຊວງການເງິນ ໄດ້ພິທີເຊັນບົດບັນທຶກມອບເຂົ້າສານຈ້າວຄັງແຮເຂົ້າອາຊຽນ+3 ຈໍານວນ 2.221,40 ໂຕນ ລວມມູນຄ່າທັງໝົດ 16,66 ຕື້ກີບ ໃຫ້ກະຊວງແຮງງານ ແລະສະຫວັດດີການສັງຄົມ, ເພື່ອນໍາໄປຊ່ວຍເຫຼືອປະຊາຊົນ ທີ່ໄດ້ຮັບຜົນກະທົບຈາກໄພພິບັດ ຢູ່ເມືອງສະໜາມໄຊ ແຂວງອັດຕະປື, ໃຫ້ກຽດກ່າວມອບໂດຍທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ ແລະຮັບໂດຍທ່ານ ຄໍາແພງ ໄຊສົມແພງ ລັດຖະມົນຕີກະຊວງແຮງງານ ແລະສະຫວັດດີການສັງຄົມ.
ທ່ານ ນາງ ບົວເງິນ ອຸ່ນນະລາດ ຫົວໜ້າກົມສະສົມແຫ່ງລັດ ລາຍງານວ່າ: ເຂົ້າສານຈ້າວຄັງແຮເຂົ້າອາຊຽນ +3 ແມ່ນພັນທະໜຶ່ງຂອງລັດຖະບານລາວ ໃນໂຄງການສໍາຮອງເຂົ້າສຸກເສີມອາຊຽນ +3 ຊຶ່ງແມ່ນການຮ່ວມມື ໃນພາກພື້ນ ແລະແມ່ນສ່ວນໜຶ່ງຂອງເຂົ້າສະສົມແຫ່ງລັດ ຊຶ່ງກົມສະສົມແຫ່ງລັດ ກະຊວງການເງິນ ເປັນຜູ້ຄຸ້ມຄອງ ຕາມການມອບໝາຍຂອງລັດຖະບານ ເພື່ອຕອບສະໜອງຄວາມຮຽກຮ້ອງຕ້ອງການ ອັນຈໍາເປັນ ໃນເວລາປະສົບບັນກາສຸກເສີນດ້ານສະບຽງອາຫານ ຫຼື ເກີດໄພພິບັດທໍາມະຊາດ ແລະມີເປົ້າໝາຍເພື່ອຊ່ວຍເຫຼືອສຸກເສີນປະຊາຊົນທີ່ໄດ້ຮັບຜົນກະທົບຈາກໄພພິບັດ, ປະກອບສ່ວນໃນການປົວແປງຈິດໃຈ ແລະແກ້ໄຂບັນຫາຊີວິດການເປັນຢູ່ຂອງປະຊາຊົນ ໃຫ້ກັບສູ່ສະພາບປົກກະຕິຕາມເວລາອັນເໝາະສົມ.
ລັດຖະບານ ລາວ ເລີ່ມສະສົມເຂົ້າຄັງແຮອາຊຽນ +3 ໃນປີ 2015 ຈໍານວນ 3 ພັນໂຕນ ໄດ້ກໍານົດເປັນປະເພດເຂົ້າຈ້າວ ເກັບຮັກສາ ຢູ່ນະຄອນຫຼວງວຽງຈັນ, ຍ້ອນບໍ່ມີຄວາມພ້ອມດ້ານພື້ນຖານໂຄງລ່າງການສະສົມ ຈຶ່ງໄດ້ກໍານົດ ເງື່ອນໄຂເຊົ່າສາງນໍາຜູ້ປະກອບການ ທີ່ຊະນະການປະມູນແບບເປີດກວ້າງ ຊຶ່ງຜູ້ປະກອບການຕ້ອງມີເງື່ອນໄຂ ໃນການຕອບສະໜອງເຂົ້າ, ມີສາງເພື່ອເກັບຮັກສາ, ມີປະກັນໄພເຂົ້າ ແລະສາງ, ຮັບຜິດຊອບການປ່ຽນຖ່າຍພາຍໃນກໍານົເເວລາ 6 ເດືອນ ແລະຮັບຜິດຊອບຕະຫຼາດຮອງຮັບ ໃນເວລາເຂົ້າໃກ້ຈະໝົເອາຍຸການນໍາໃຊ້. ເຂົ້າສານຈ້າວ ຈໍານວນ 3 ພັນໂຕນ ນີ້ ໄດ້ເບີດຈ່າຍອອກຊ່ວຍເຫຼືອປະຊາຊົນ ທີ່ໄດ້ຮັບຜົນກະທົບຈາກນໍ້າຖ້ວມໃນປີ 2017 ຈໍານວນ 664,5 ໂຕນ ລວມມີ 6 ແຂວງຄື: ອຸດົມໄຊ, ຫົວພັນ, ຊຽງຂວາງ, ໄຊຍະບູລີ, ວຽງຈັນ, ແລະແຂວງບໍລິຄໍາໄຊ; ໃນປີ 2018 ໄດ້ເບີກຈ່າຍຈໍານວນ 114,1 ໂຕນ ເພື່ອຊ່ວຍເຫຼືອປະຊາຊົນ ທີ່ໄດ້ຮັບຜົນກະທົບຈາກນໍ້າຖ້ວມ ຢູ່ ແຂວງວຽງຈັນ ມີ 3 ເມືອງຄື: ເມືອງເຟືອງ, ກາສີ ແລະເມືອງໜື່ນ. ສ່ວນທີ່ເຫຼືອຈໍານວນ 2.221,40 ໂຕນ ແມ່ນມອບໃຫ້ ກະຊວງແຮງງານ ແລະສະຫວັດດີການສັງຄົມ ເພື່ອນໍາໄປຊ່ວຍເຫຼືອປະຊາຊົນ ເມືອງສະໜາມໄຊ ແຂວງອັດຕະປື ທີ່ໄດ້ຮັບຜົນກະທົບ ຈາກຄູກັນນໍ້າເຂື່ອນເຊປຽນ-ເຊນໍ້ານ້ອຍແຕກໃນທ້າຍປີ 2018 ຜ່ານມາ.
