9 ທີ່ ສຳນັກງານສົ່ງເສີມການຄ້າໃນຕ່າງປະເທດ ປະຈຳນະຄອນຫລວງວຽງຈັນ. ໄດ້ມີພິທີເຊັນສັນຍາ MOU ລະຫວ່າງບໍລິສັດ ສະຫຍາມໂອໂຕ້ອີເວັນຄາຣ໌ ຈຳກັດ ຜູ້ຜະລິດລົດFoodTruck ໃນປະເທດໄທ ກັບ ບໍລິສັດ ໂຄລາວ ກຣຸບ ບໍລິສັດຜະລິດລົດໃນ ສປປ ລາວ.
ທ່ານ ນາງຢານີ ສີມີໄຊ ຜູ້ອຳນວຍການສຳນັກງານສົ່ງເສີມການຄ້າໃນຕ່າງປະເທດ ປະຈຳນະຄອນຫລວງວຽງຈັນ ທ່ານໄດ້ກ່າວກັບເຮົາວ່າ: ການຈັບຄູ່ຮ່ວມທຸລະກິດຄັ້ງນີ້ແມ່ນຈະຊ່ວຍຫລຸດລາຄາ ລົດ FoodTruck ໄດ້ຫລາຍເຕີບ ເພາະໃຊ້ລົດທີ່ຜະລິດໃນລາວ ແລະ ໃຊ້ເທັກນິກການຕົບແຕ່ງໂດຍບໍລິສັດໄທ
ທ່ານຍັງໄດ້ກ່າວຕື່ມອີກວ່າ: ການທີ່ເລືອກຈັບຄູ່ 2 ບໍລິສັດນີ້ຍ້ອນວ່າ ບໍລິສັດສະຫຍາມໂອໂຕ້ອີເວັນຄາຣ໌ ກໍເປັນບໍລິສັດຜະລິດລົດ FoodTruck ທີ່ໃຫ່ຍ ແລະ ຄົບວົງຈອນທີ່ສຸດໃນໄທ ນອກຈາກນີ້ ຍັງໄດ້ຖືກຄັດເລືອກຈາກກະຊວງການຄ້າໃຫ້ເປັນຕົວແທນຂອງປະເທດເພື່ອສົ່ງອອກໄປປະເທດຕ່າງໆໃນອາຊຽນ ແລະ ບໍລິສັດໂຄລາວກຣຸບເອງ ກໍເປັນບໍລິສັດຜະລິດລົດໃນ ສປປ ລາວ ທີ່ໄດ້ຮັບຄວາມນິຍົມ ແລະໄວ້ວາງໃຈຈາກຄົນລາວ ໃນການເລືອກໃຊ້ລົດຈາກບໍລິສັດນີ້ອີກດ້ວຍ. ດ້ວຍເຫດຜົນນີ້ ທາງສຳນັກງານສົ່ງເສີມການຄ້າໃນຕ່າງປະເທດ ຈຶ່ງເລືອກທີ່ຈະດຶງທັງສອງບໍລິສັດໃຫ້ມາເຮັດທຸລະກິດຮ່ວມກັນ.
ນອກຈາກນີ້ທັງສອງບໍລິສັດໄດ້ຮ່ວມມືກັນຜະລິດລົດ FoodTruck ຕົ້ນແບບໃນລາວ ລົດຄັນດັ່ງກ່າວແມ່ນໄດ້ໃຊ້ລົດຈາກບໍລິສັດໂຄລາວ ແລະ ໃຊ້ໂຄງຮ່າງຈາກບໍລິສັດ ສະຫຍາມໂອໂຕ້ອີເວັນຄາຣ໌ ໂດຍລົດຄັນດັງກ່າວຈະໄດ້ນຳມາເປີດໂຕຢ່າງເປັນທາງການ ໃນງານ Top Thai Brands 2019 ທີ່ຈະໄດ້ຈັດຂື້ນໃນລະຫວ່າງວັນທີ 6-10 ມີນານີ້ ທີ່ ລາວ-ໄອເຕັກ (ຕຶກເກົ່າ) ແລະ ຈະໄດ້ເປີດໃຫ້ສັ່ງຈອງພ້ອມເລີຍ.